BBC-ის ინფორმაციით, რუსეთმა განაცხადა, რომ შესაძლოა დახუროს თავისი მთავარი გაზსადენი გერმანიაში, თუ დასავლეთი განაგრძობს რუსული ნავთობის აკრძალვას.
რუსეთის ვიცე-პრემიერმა ალექსანდრე ნოვაკმა თქვა, რომ ”რუსული ნავთობის უარყოფა გამოიწვევს კატასტროფულ შედეგებს გლობალურ ბაზარზე, რის შედეგადაც ბარელზე ფასი გაორმაგდება”.
ინფორმაციისთვის, ამერიკის შეერთებული შტატები მოკავშირეებთან ერთად განიხილავს პოტენციურ აკრძალვას, როგორც რუსეთის დასასჯელ საშუალებას უკრაინაში შეჭრისთვის, მაგრამ გერმანიამ და ნიდერლანდებმა ორშაბათს უარყვეს გეგმა.
ცნობისთვის, ევროკავშირი გაზის დაახლოებით 40%-ს და ნავთობის 30%-ს რუსეთიდან იღებს და არ ჰყავს მარტივი შემცვლელი, თუ მიწოდება შეფერხებულია. დიდ ბრიტანეთში კი პირდაპირ გავლენას არ მოახდენს მიწოდების შეფერხება, რადგან ის თავისი გაზის 5%-ზე ნაკლებ იმპორტს ახორციელებს რუსეთიდან, მასზე გავლენას მოახდენს ფასების მატება გლობალურ ბაზრებზე ევროპაში მოთხოვნის ზრდის გამო.
რუსეთის სახელმწიფო ტელევიზიით გამოსვლისას ნოვაკმა თქვა, რომ „შეუძლებელი იქნება ევროპის ბაზარზე რუსული ნავთობის შემცვლელის სწრაფად პოვნა“.
ნათან პაიპერმა, Investec-ის ხელმძღვანელმა, თქვა, რომ სანქციების დაწესება რუსეთის ნავთობისა და გაზის ექსპორტზე მიმზიდველია, “პრაქტიკულად ეს არის გამოწვევა”.
„ახლა ისმის კითხვა, მზად არიან თუ არა აშშ და ევროპელი ლიდერები გაუძლონ ნავთობისა და გაზის მაღალ ფასებს, რათა სანქციების სიაში დაემატოს ენერგიის ექსპორტი“, – განუცხადა მან BBC-ს.
Capital Economics-ის ანალიტიკოსები ვარაუდობენ, რომ ნავთობის ფასი შეიძლება გაიზარდოს 160 დოლარამდე ბარელზე, თუ დასავლეთი სანქციებს დააწესებს რუსულ ექსპორტზე, მაგრამ დევიდ ოქსლიმ, გლობალურმა ეკონომისტმა განუცხადა BBC-ს, რომ რუსული გაზის შეფერხება უფრო მძიმედ დააზარალებს ქვეყნებს.
მისი თქმით, ევროპის მასშტაბით შეიძლება დაზარალდეს ენერგო ინტენსიური მრეწველობა, რადგან ნავთობთან შედარებით გაზის შემცვლელი მომწოდებლების პოვნა გაცილებით რთულია. ევროკავშირის ქვეყნებს, რომლებიც დიდად არიან დამოკიდებულნი რუსულ გაზზე, როგორიცაა გერმანია, შეუძლიათ გაზიდან ნახშირზე გადასვლა, მაგრამ ეს ეწინააღმდეგება ბლოკის კლიმატის ამბიციებს და არ იქნება გრძელვადიანი გამოსავალი.
მიუხედავად ამისა, პასუხი რუსეთის წინადადებაზე, რომ შესაძლოა დახუროს მთავარი მილსადენი, რომელიც ჩრდილოეთ ევროპას ართმევს გაზის დიდი ნაწილის მიწოდებას, ჯერჯერობით დუმილია.
მართალია, რუსეთი იმუქრება ემბარგოს დაწესებით – გაზის ექსპორტის შეწყვეტით, თუ დასავლეთი გააგრძელებს რუსული ნავთობის აკრძალვას. მაგრამ შეერთებული შტატების ზეწოლის მიუხედავად, ასეთი აკრძალვა ნაკლებად სავარაუდოა. ევროპელმა ლიდერებმა ამ იდეას უკვე დაასხეს ცივი წყალი – ასე რომ, რუსეთის საწინააღმდეგო მუქარას შედარებით მცირე წონა აქვს. და შემდეგ არის ის ფაქტი, რომ რუსეთი კვლავ იღებს უზარმაზარ თანხებს ევროპაში ნავთობისა და გაზის გაყიდვიდან ყოველდღე, რაც ეხმარება მისი ომის დაფინანსებას, მაგრამ დიდი ზარალია, თუკი თავის მუქარას განახორციელებს.
