დავით ჭავჭავაძე (1924 – 2014) დაიბადა ლონდონში, მამის, პავლეს, მხრიდან ის პოეტ და საზოგადო მოღვაწის ალექსანდრე ჭავჭავძის შთამომავალია, დედა რუსი მეფეების რომანოვების წარმომადგენელი. მამამისი პავლე (პოლ) ჭავჭავაძე ცნობილი ამერიკელი მწერალია. ის რამდენიმე ცნობილი წიგნის ავტორია, მათ შორისაა The Mountains of Allah ,,მთები ალაჰისა”, სადაც შამილის მიერ წინანდლიდან ალექსანდრე ჭავჭავაძის ოჯახის გატაცებაა აღწერილია. სანამ თხრობას გავაგრძელებდე, პავლესთან და მის წინაპრებთან დაკავშირებული ერთი ამბავი მინდა მოგიყვეთ: ერთხელ პავლეს დიდი პაპა გულბაათ ჭავჭავაძე თავის სიმამრს, დავით დადიანს ესტუმრა. დავით დადიანი მდიდარი კაცი იყო და კარგი მარანიც ჰქონდა. ჰოდა, გულბაათმა უთხრა, ჩამიშვი ერთი მაგ შენს მარანშიო, მაინტერესებს, რა ღვინოები გაქვსო. ამან შვილი გააყოლა, ცოლისძმა, და უთხრა, რაც გასინჯოს და რითაც გასინჯოს, გაატანეო, აჩუქეო.
მარანში მრავლად ეწყო ვერცხლისგან ნაჭედი, ანდა მოოქროვილი სასმისები, რომელთა შორის მთავარი იყო სულ ნაირგვარი ზომის აზარფეშები, გაწყობილი სულ ნაირ-ნაირი ძვირფასი ქვებით. ჩავიდა გულბაათი და დაიწყო ღვინის სინჯვა და დაიწყო და დაიწყო, აღარ დაამთავრა. ბოლოს მარტო დარჩა იქ, ცოლისძმა და მსახურები შემოეცალნენ. სინჯავდა ამ აზარფეშებით ღვინოს და გვერდზე აწყობდა სასმისებს. დადიანმა უთხრა თავისიანებს, ჩააკითხეთ ერთიო, არ მოკვდეს, არ ჩაიხრჩოს იმ ღვინოშიო. ჩავიდნენ და გადასარევად იყო. არაფერი სჭირდა და ეს ვერცხლი კიდევ გვერდით ელაგა.
კაი ღვინოები გქონია, სიმამროო, – უთხრა, – კაი ღვინოებიო, და წამოზიდა საჩუქრები. მისი შვილთაშვილი, პავლე (პოლი) 1917 წელს პირველად 18 წლისა ეწვია მათ საგვარეული მამულს, წინანდალს. დიდი სუფრა გაიშალა თურმე და პავლემ დიდი პაპას ხსოვნა არ შეარცხვინა – ორკვარტიანი (კვარტა =1,14 ლიტრს) ყანწი სულმოუთქმელად გამოსცალა, რითაც აღფრთოვანებაში მოიყვანა დამსწრე საზოგადოება.
პავლეს მშობლები მტრულად იყვენენ საბჭოთა წყობილებისადმი განწყობილი, ისინი ბოლშევიკებს გამოექცნენ, რომელთაც მათ ნათესავები დაუხოცეს, მაგრამ მიუხედავად იმისა, ისინი ბევრის გასაკვირად თანაუგრძნობდნენ იმ მოვლენებს, რამაც რევოლუცია გამოიწვია. ისინი პაციფისტები იყვნენ და თავისი ამერიკელი მეგობარი ინტელექტუალების, დოს პასოსისა და ედმუნდ უილსონის მსგავსად, მხარს უჭერდნენ სოციალიზმის მშენებლობას 1920-იან წლებში. 1927 წელს ჭავჭვაძეების ოჯახი ამერიკაში, კერძოდ ნიუ იორკში გადასახლდა საცხოვრებლად. დავითს სამხედრო ცხოვრება ბავშობიდან აინტერესებდა, ის შეუერთდა მაღალი საზოგადოების ბავშვებისთვის შექმნილ სამხედრო პროგრამას Knickerbocker Grays, სადაც გამოიგონა რთული სამხედრო თამაშები, რომელიც ასანთის ღერების დახმარებით თამაშდებოდა. მეორე მსოფლიო ომის დროს, 1942 წელს დავითი იელის უნივერსიტეტში მიიღეს და ამასთან ის აშშ-ს შეიარაღებულ ძალების რეზერვშიც ჩაეწერა, 1944 წელს მას უმცროსი ლეიტენანტის წოდება მიენიჭა. მეორე მსოფლიო ომის დროს რუსულის ბრწყინვალედ მცოდნე დავითი მთარგმნელად მუშაობდა. ომის დასრულების შემდეგ კი თარჯიმნის ფუნქციებს ასრულებდა იმ შეხვედრებზე, სადაც აშშ-ს, საბჭოთა კავშირის, დიდი ბრიტანეთისა და საფრანგეთის წარმომადგენლები გერმანიის მომავალსა და ომის შემდგომი მსოფლიო ბედი შესახებ ბჭობდნენ. სამსახურიდან გამომდინარე დავითი ერთხანს გერმანიაში ცხოვრობდა. 1950 წლიდან მან ახლად შექმნილ CIA-ში _ ცენტრალურ სადაზვერვო სამმართველოში დაიყო სამსახური საბჭოთა კავშირის განყოფილებაში. საკუთარი ცხოვრების ახალ და ძალზე მნიშვნელოვან ეტაპს ის ასე აღწერდა: ,,აგვისტოს ბოლოს დეპეშა მოვიდა: გთხოვთ, 1950 წლის 5 სექტემბერს ანგარიში ჩააბაროთ ვაშინგტონს… და ცენტრალურ სადაზვერვო სამსახურში ჩემი ოცდახუთწლიანი კარიერაც ამით დაიწყო; მე ვიყავი რომანოვების ოჯახის ერთადერთი ნათესავი, რომელიც ბოლშევიკების წინააღმდეგ იმუშავებდა”. სამმართველოში ჭავჭავაძის საქმიანობა საბჭოთა სამსახურების მუშაობაზე თვალთვალი და ფარული კავშირების დამყარება წარმოადგენდა. CIA-ში გატარებულ წლების შესახებ ის იხსნებდა, რომ მას ყოველთვის ჰქონდა ცდუნება, რათა ადამიანებისთვის მოეყოლა ის საინტერესო და ტაბუდადებული ამბები, რომელიც მან იცოდა, თუმცა მოგვიანებით ამ ცდუნებამ გადაუარა. 1974 წელს ის გადადგა და თავდაპირველად პროფესიონალურ სიმღერაში მოსინჯა ბედი _ დავით ჭავჭავაძე რუსული რომანსებისა და საბჭოთა დროის პერიოდის სიმღერების ბრწყინვალე შემსრულებლად ითვლება. მოგვიანებით მან ისტორიისა და პოლიტიკის თემაზე რამოდენიმე წიგნი შექმნა: The Grand Dukes ,,დიდი ჰერცოგები” (1989), ასევე მოგონებები Crowns and Trenchcoats: A Russian Prince in the CIA ,,გვირგვინები და სანგრები: რუსი ბატონიშვილი ცენტრალურ სადაზვერვო სამმართველოში” (1989) ის პარალელურად კითხულობდა ლექციებს ამერიკის უმაღლეს სასწავლებლებში, ასევე კერძო კომპანიების შეკვეთით სწავლობდა და იკვლევდა ტერორიზმის საკითხს და ინგლისურად რამოდენიმე რუსული ნაწარმოები თარგმნა. დავითის ქალიშვილი მარუსია კონსტანტინე სიდამონ-ერისთავის მიერ დაარსებული ასოციაციის ,,საქართველოს ამერიკელი მეგობრების” აღმასრულებელი დირექტორია.
