საქართველოს ერთ-ერთ უძველეს ქალაქს, რუსთავს, წელს 70 წელი შეუსრულდა. „რუსთავქალაქობის“ აღსანიშნავი ღონისძიებები 15 სექტემბერს დაიწყო და 22 სექტემბრამდე გაგრძელდება.
ქალაქ რუსთავის მშენებლობას, ქართლის ცხოვრების უძველესი ავტორი ლეონტი მროველი ქართველთა წინაპრის, ქართლოსის ცოლს მიაწერს. ამ მოსაზრებას მხარს უჭერს არქეოლოგიური მონაცემები, რომლის თანახმად, რუსთავში ბრინჯაოს ხანაში ძლიერი სამოსახლო არსებობდა. არსებობს ლეონტი მროველის მეორე ცნობაც, რომ ალექსანდრე მაკედონელს ქართლში ლაშქრობისას დიდი მცხეთა, ურბნისი, უფლისციხე, სარკინე, რუსთავი და სხვა ქალაქები დახვდა.
როგორც ცნობილია, IV საუკუნის შუა წლებიდან რუსთავი იქცა რევიანთა რეზიდენციად, უფლისწულთა ქალაქად ანუ ვოსტან ქალაქად. „ვოსტან“ ირანული წარმოშობის სიტყვა და უფლისწულისთვის გამოყოფილ მამულს ნიშნავს. IV საუკუნის ბოლო მეოთხედში გამეფებულმა თრდატ რევის ძემ, ბოსტან-ქალაქში მტკვრიდან ყარაიას ველებამდე გაიყვანა სარწყავი არხი, ანუ რუ. სწორედ ამ არხიდან მიიღო ქალაქმა მეორე სახელწოდება _რუსთავი. ამ სახელს ქალაქი ვოსტან-ქალაქის პარალელურად VI საუკუნიდან ატარებდა. IX საუკუნიდან კი ქალაქს რუსთავი ეწოდება.
XII—XIII საუკუნეებში რუსთავში საქალაქო ცხოვრებამ განვითარების უმაღლეს საფეხურს მიაღწია. ქალაქში ყვაოდა ხელოსნობის ისეთი დარგები, როგორიცაა კერამიკის, მინის, ლითონის, ტყავის, ძვლის, ხის, ასევე საფეიქრო წარმოება. რუსთაველი ხელოსნების მიერ დამზადებული ნაწარმი გამოირჩეოდა მაღალი ხარისხით. რუსთავი იმავ დროს ჩართული იყო მახლობელი აღმოსავლეთის სავაჭრო გზების ქსელში.
1265 წლის ბექა-ყაენის ლაშქრობის შედეგად რუსთავმა არსებობა შეწყვიტა, მეოცე საუკუნემდე კი მხოლოდ ქალაქის ციხის ნანგრევებმა მოაღწია.
მეოცე საუკუნის მეორე ნახევრიდან რუსთავში განთავსდა იოსებ სტალინის სახელობის რუსთავის მეტალურგიული კომბინატი, რომელიც 90-მდე სხვა მსხვილ თუ საშუალო საწარმოსთან ერთად, ამიერკავკასიის რეგიონში მნიშვნელოვან ინდუსტრიულ ცენტრს წარმოადგენდა. 1948 წლის 19 იანვარს რუსთავმა ქალაქის სტატუსი მიიღო. ამავე წელს დაარქვეს რუსთავის პირველ ქუჩებს სახელები. პირველ ქუჩას_ „ახალგაზრდა კომუნარების“, მეორეს _ „რუსთავის მშენებელთა“, მესამეს კი _ „ბოსტან-ქალაქი“ დაერქვა.
1991 წელს, საბჭოთა კავშირის დაშლის შემდეგ რუსთავის თითქმის ყველა ქარხანა დაიხურა.
ამჟამად, რუსთავი არის თვითმმართველი ქალაქი. ქალაქის წარმომადგენლობითი ორგანოა ქალაქის საკრებულო, ხოლო აღმასრულებელო ორგანო _მერია. ადმინისტრაციულად რუსთავი იყოფა 4 ტერიტორიულ ორგანოდ: დავით აღმაშენებლის, ვახტანგ გორგასალის, შოთა რუსთაველის, ჟიული შარტავას სახელობის ტერიტორიული ორგანოები.
რაც შეეხება, წელს „რუსთავქალაქობის“ აღსანიშნავად დაგეგმილი ღონისძიებების განრიგს, რომელსაც რუსთავის მერია ავრცელებს, ასე გამოიყურება:
18 სექტემბერი
12:00 სთ -„მე + რუსთავი“
12:00 – 14:00 სთ -მერის საჩუქარი პირველკლასელებს -საბავშვო სპექტაკლი -კულტურის ცენტრი
16:00 – 19:00 სთ – სპორტული ღონისძიებები
20:00 სთ – კონცერტი -ლაშა ღლონტი და ,,ალილო’’ – რუსთავის კულტურისა და დასვენების პარკი, ამფითეატრი
19 სექტემბერი
11:00 სთ – დასაქმების ფორუმი, რომელშიც ოცდახუთი კომპანია (ათი ადგილობრივი) მიიღებს მონაწილეობას – გ. ლორთქიფანიძის სახ. რუსთავის დრამატული თეატრის შენობა
16:00 – 19:00 სთ – სპორტული ღონისძიებები
12:00 სთ -„მე + რუსთავი“
17:30 სთ – ,,გერმანელი ტყვეები და რუსთავი’’ (გააცოცხლე რუსთავის ისტორია) ჭყონდიდელის დასახლება
20 სექტემბერი
16:00 – 19:00 სთ – სპორტული ღონისძიებები
12:00 სთ -„მე + რუსთავი“
15:00 სთ – ეთნოფესტივალი -კულტურისა და დასვენების პარკი, ,,რუსთავის ციხის’’ ტერიტორია
15:00 სთ – საბავშვო კონცერტი -კულტურისა და დასვენების პარკი, ამფითეატრი
21 სექტემბერი
16:00 – 19:00 სთ -სპორტული ღონისძიებები
12:00 სთ -„მე + რუსთავი“
16:00 სთ -ავტოშოუ – წმ. ნინოს ქუჩა, ,,ფოლადის’’ სტადიონის მიმდებარე ტერიტორია
20:00 სთ – ,,ჟიული შარტავა და რუსთავი’’ (გააცოცხლე რუსთავის ისტორია) –
ჟიული შარტავას ძეგლის მიმდებარე ტერიტორია
20:00 სთ – ქუჩის თეატრი- ჭყონდიდელის დასახლება, რჩეულიშვილის ქუჩა
22 სექტემბერი
16:00 – 19:00 სთ – სპორტული ღონისძიებები
15:00 სთ – მარათონი სირბილში
16:00 სთ – დასკვნითი ღონისძიება ,,კეთილი ადამიანები’’
17:00 სთ – „გააცოცხლე რუსთავის ისტორია“
კოსტავას გამზირი, ,,არკის’’ მიმდებარე ტერიტორია
20:30 სთ – კონცერტი – ჯგუფი ,,რეგიონი“
გიორგი ლეონიძის სახელობის სკვერი
„რუსთავქალაქობა 2018“_ის ფარგლებში, ასევე მოეწყო ფერების ფესტივალი, ოქროსა და ვერცხლის მედალოსანი მოსწავლეების დაჯილდოება, „რუსთავქალაქობა 2018“ და ქალაქის 70 წლისთავისადმი მიძღვნილი ერთკვირიანი დღესასწაული კი რუსთავის თეატრში გამართულმა ღონისძიებამ ,,გააცოცხლე რუსთავის ისტორია“ გახსნა. ქალაქში ასევე გახსნეს ვაჟა-ფშაველას ბიუსტიც. „რუსთავქალაქობა 2018“ 22 სექტემბერს დასრულდება.
