ადამიანები საახალწლო სამზადისთან დაკავშირებულ საკითხებზე ნაადრევად იწყებენ ფიქრს. ბუნებრივია, ყველას აინტერესებს, რა ეღირება ყველაზე მნიშვნელოვანი პროდუქტი _ გოჭი, ქათამი, ინდაური და ყველი საახალწლო დღეებში.
18 დეკემბერს “გურია ნიუსი” ჩოხატაურის აგრარულ ბაზარში იმყოფებოდა, სადაც, ტრადიციულად, საკვირაო ბაზრობა იმართება. ხალხის თქმით, ფასები თითქმის ყველა პროდუქტზე მომატებულია.
“რა უნდა იყიდოს ადამიანმა, როცა ყველაფერს ცეცხლის ფასი ადევს? ფულს ძალა არ აქვს. თუ აქამდე 50 ლარად ყველა საჭირო პროდუქტის ყიდვას შეძლებდა ადამიანი, ახლა მაგ ფულით წესიერად ვაჭრობა შეუძლებელია”, _ ამბობს “გურია ნიუსთან” საუბრისას ერთ-ერთი მომხმარებელი, რომელმაც სახელისა და გვარის გამხელა არ ისურვა.
18 დეკემბერს ჩოხატაურის აგრარულ ბაზარში პროდუქტებზე ფასები ასე გამოიყურებოდა: ქათამი 25 ლარი ღირდა, მამალი ინდაური _ 90 ლარი; ყველის ფასი 16-18 ლარს შორის მერყეობდა; 1 კილოგრამი გოჭი (ცოცხალი წონა) კი, 13 ლარი ღირდა.
ასევე, ვიკითხეთ ნიგვზის ფასი _ 1 კილოგრამი, ე. წ. “ჩინური”, 17-18 ლარია, ერთი კილოგრამი სიმინდის ფქვილის ფასი, როგორც წინა კვირას, ახლაც 5 ლარი იყო.
“ფასების მომატება ან დაკლება სულ იყო _ ეს უცხო არავისთვის არ არის. ყველამ ვიცით, რომ როგორც ყოველთვის, ისე წელსაც, წინა საახალწლოდ ფასები აიწევს. კარგი იქნება, პროდუქტს ისეთი ფასი დაედოს ყველამ შეძლოს ყიდვა”, _ გვითხრა ჩვენმა რესპონდენტმა.
მამაკაცი, რომელსაც გასაყიდად გოჭები ჰყავდა გამოყვანილი, ამბობს, რომ გასულ წლებთან შედარებით, მყიდველი ნაკლებია.
“მთელი დღეა, აქ ვდგავარ. მარტო იმის გასაგებად მოდიან, რას ვაფასებ გოჭს. ერთი კილოგრამი ცოცხალი წონა 13 ლარია. ფასი, იქნებ, კია მაღალი, მაგრამ გოჭის შენახვას და გაზრდას რომ ფული ჭირდება, იმას თუ იანგარიშებთ, მაშინ აღარაა ძვირი.
მოიმატებს ფასები გლეხის მიერ მოწეულ პროდუქტზე, აბა, რა იქნება _ ყველაფერს ცეცხლი უკიდია, პურის ფქვილიდან დაწყებული, ქატოთი და თივით დამთავრებული. მაღაზიაში ვერ შეხვალ, პროდუქტზე იმხელა ფასებია, მაგრამ სოფლის პროდუქტებზე მომატებული ფასები უფრო აღიზიანებს ხალხს. მარტივი და კაი გასაზარდი და მოსავლელი რომ იყოს, ყველა იყოლიებდა ძროხასაც და ღორსაც, _ გვეუბნება ბესიკ ბერიაშვილი.
კიდევ ერთი რესპონდენტი ქალბატონი გვეუბნება, რომ ახალი წლის მოსვლა აღარ ახარებს, რადგან მისი ოჯახი დიდ სიდუხჭირეში ცხოვრობს:
_ რა გამახარებს _ სადღაა ახალი წელი და მხიარულება?! ყანის იმედი გვქონდა და ისე ჩაიარა, რაც უნდა აგვეღო, იმის მეხუთედი მოსავალიც ვერ ავიღეთ. სიმინდით და ლობიოთი გაგვაქვს გაჭირვებულ ხალხს თავი ზამთარში. ხან ვყიდით და სხვა პროდუქტს ვყიდულობთ. წელს შიმშილი გველოდება ზამთარში. რა დროს ახალი წელი და საახალწლო სუფრაა. თუ რამე თქვი და ხმა ამოიღე, ინტრიგანი ხარ. ა, ბატონო, არ ვამბობ არაფერს, ჩემს სახელს და გვარსაც არ გეტყვით. შიმშილით რომ ამოგვძვრება სული, მეძახონ მერე ინტრიგანი, _ გვითხრა ქალბატონმა და უკმაყოფილოდ გაგვშორდა.
