ცოტა ხნის წინ “გურია ნიუსში” გამოქვეყნდა სტატია _ “21-ე საუკუნეში, პირუტყვთან ერთად, სადგომში ვცხოვრობ”, რომელშიც საუბარი იყო ოზურგეთის მუნიციპალიტეტის სოფელ სილაურში მცხოვრები მარტოხელა მოხუცის, დურმიშხან სოსელიას შესახებ.
ჩვენი რესპონდენტი, დიდი ხანია, ითხოვს იმ დახმარების გადაცემას, რომელიც მას ოზურგეთის მუნიციპალიტეტის გამგეობამ 2014 წელს გამოუყო, როგორც სტიქიით დაზარალებულს.
როგორც “გურია ნიუსმა” გაარკვია, დურმიშხან სოსელიას სახელმწიფოსგან მართლაც გადაეცა როგორც ხის მასალა და თუნუქის სახურავი, ასევე, 500 ცალი საკედლე ბლოკი და ოთხი ტონა ცემენტი. თუმცა, როგორც სოსელია ამბობს, რომ მას სახლში მხოლოდ ხის მასალა და დასახური შიფერი მიუტანეს, ბლოკი და ცემენტი კი “გაქრა”.
ოზურგეთის მუნიციპალიტეტის მერიის პრესსამსახურის უფროსმა ეკა მგელაძემ “გურია ნიუსს” მოაწოდა მიღება-ჩაბარების აქტი და შესაბამისი დოკუმენტაცია, საიდანაც ირკვევა, რომ “სოსელიამ ოზურგეთში, გურიის ქუჩაზე მდებარე მაღაზიით ისარგებლა. კერძოდ, ინდმეწარმე კახა კანდელაკმა უსასყიდლოდ გადასცა სოსელიას 500 ცალი ღრუტანიანი წვრილი საკედლე ბლოკი და ოთხი ტონა ცემენტი. მიღება-ჩაბარების აქტს ხელს აწერენ თავად სოსელია და ტერიტორიული ერთეულის წარმომადგენელი ზურაბ ტუღუში”.
სამწუხაროდ, ერთი წლის წინ, სოფელ სილაურის გამგებელი ზურაბ ტუღუში გარდაიცვალა, ხოლო დურმიშხან სოსელია, მისი თქმით, “დღემდე სამართალს ეძებს” და ითხოვს ცემენტსა და ბლოკს, რომელიც მას შინ არ მიუტანეს. ხოლო რაც მიუტანეს, ის კი არ დაუკარგავს, როგორც თავად გვაჩვენა, მეზობლის _ დინა მორჩილაძის ოჯახში ინახება.
ინდმეწარმე კახა კანდელაკი “გურია ნიუსთან” ამბობს, რომ მისი მაღაზიიდან ბლოკი და ცემენტი სოფელ სილაურის მაშინდელმა გამგებელმა ზურაბ ტუღუშმა წაიღო:
_ მე როგორ გავცემდი ისე, თუ გამგეობა თანხას არ ჩამომირიცხავდა? ხელშეკრულება დაიდო ჩემსა და მუნიციპალიტეტის გამგეობას შორის. გამარტივებული ელექტრონული ტენდერის ჩატარების შედეგად, გავაფორმეთ ხელშეკრულება სახელმწიფო შესყიდვის შესახებ, _ ამბობს ის. აღნიშნული ხელშეკრულება მართლაც არის დადებული 2014 წლის 18 დეკემბერს.
როგორც კახა კანდელაკი ამბობს, მართალია, ხელშეკრულება გაფორმდა და ბლოკი და ცემენტი მიღება-ჩაბარების აქტის მიხედვით დურმიშხან სოსელიას ეკუთვნოდა, თუმცა, მაღაზიიდან წაიღო ზურაბ ტუღუშმა, როგორც ტერიტორიული ერთეულის წარმომადგენელმა: _ ორივე იყო აქ და მახსოვს, რომ სოსელიამ, მგონი, სესხის სახით მისცა. რაღაც ასეთი საუბარი იყო მათ შორის. შემდეგ რა მოხდა, არ ვიცი, _ გვითხრა კანდელაკმა.
ოზურგეთის მუნიციპალიტეტის გამგებლის წარმომადგენელი სოფელ სილაურში გოგიტა ჯანხოთელი, ხელშეკრულების შეწყვეტის შემდეგ, გასული წლის ნოემბრიდან აღნიშნულ თანამდებობაზე აღარ მუშაობს, თუმცა, საქმის შესახებ ინფორმაციას ფლობს:
_ მე დღემდე არ ვიცოდი, თუ სოსელიას კუთვნილი ცემენტი და ბლოკი რაიონიდან წამოღებული იყო. მას რაც მისცეს, ერთ-ერთ ოჯახში შენახული აქვს. რომ გვიჯერებდეს, ყველა დავეხმარებოდით. წესიერი, მუშა კაცია, მაგრამ სმაც უყვარს. 7 ათას კვ.მეტრ მიწის ფართს ფლობს და ერთი ძირი ხე არ აქვს დარგული. ძალიან კარგი ნათესავები ჰყავს. თუმცა, არც მათ უჯერებს. არ გამოვრიცხავ, რომ მართლაც ასესხა ტუღუშს აღნიშნული მასალა, თუმცა, ამის თაობაზე, არც ერთს და არც მეორეს ჩემთან არასდროს არაფერი უთქვამთ. ახლა ვხედავ, რომ დადის და ითხოვს ცემენტს და ბლოკს. ძალიან უხერხული სიტუაციაა. დღეს არ ვმუშაობ სოფლის ხელმძღვანელად, მაგრამ თუ რაიმე შემიძლია, დავეხმარები, თუ დაიჯერებს. ამ საქმეში კი ნამდვილად არაფერი შემიძლია, _ გვითხრა ჯანხოთელმა.
სოფელ სილაურის მაჟორიტარი დეპუტატი ოზურგეთის საკრებულოში გოჩა კილაძე “გურია ნიუსთან” საუბრისას განმარტავს, რომ დურმიშხან სოსელიასთვის თანადგომა არასდროს არავის დაუშურებია:
_ რაოდენ დაუჯერებლადაც უნდა მოგეჩვენოთ, ამ ცემენტის და ბლოკის შესახებ ახლა გავიგეთ. რა უნდა ვთქვა, როცა ადამიანი გარდაცვლილია? თქვენც ხომ ნახეთ სოსელიას სახლი და ეზო? თვითონ ხშირად ნასვამია. პატიოსანი ადამიანია, შრომა შეუძლია, თუმცა, არავისი სჯერა. არასოდეს უთქვამს, რომ ზურაბ ტუღუშთან ერთად ცემენტი და ბლოკი გაიტანა მაღაზიიდან. ახლა ვის თხოვს? ხელმეორედ ვინ მისცემს? თუ რამ შემიძლია, დავეხმარები. მაგრამ ასეთ სიტუაციაში რა ვქნა? _ გვითხრა კილაძემ.
ჩვენ ვეცადეთ, ზურაბ ტუღუშის მეუღლეს, ელზა ტუღუშს დავკავშირებოდით, თუმცა, მან ჩვენს სატელეფონო ზარს არ უპასუხა. როგორც გოგიტა ჯანხოთელმა გვითხრა, შვილი გერმანიაში სწავლობს, მეუღლე კი, შესაძლოა, შინ არ იყოს:
_ მე კიდევ ერთხელ ვეცდები, გავარკვიო, სოსელიას და ტუღუშს შორის რა ზეპირი მოლაპარაკება არსებობდა _ მართლა შეთანხმდნენ მეზობლურად, რომ დროებით ხელი გაემართათ ერთმანეთისთვის თუ არა. ისე კი, ძალიან უხერხული სიტუაციაა _ ჩემი აზრით, სოსელია ხელისუფლებას ხელმეორედ დახმარებას არ უნდა თხოვდეს. ის სრულ გონზეა, ხომ კარგად ახსოვს, ვის შეუთანხმდა და რატომ მისცა თავისი კუთვნილი დახმარება? ჩემთვის ერთხელ მაინც რომ ეთქვა, სანამ თქვენთან მოვიდოდა, რაღაცას მაინც ხომ გავარკვევდი? _ გვითხრა გოგიტა ჯანხოთელმა.
“გურია ნიუსი” აუცილებლად დაუკავშირდება ზურაბ ტუღუშის ოჯახის წევრებს და მათ მოსაზრებას გააცნობს მკითხველს.
