საქართველოს მეოთხე პრეზიდენტი გიორგი მარგველაშვილი ოქტომბრის საპრეზიდენტო არჩევნებში მონაწილეობას არ მიიღებს. პრეზიდენტმა აღნიშნულის შესახებ დღეს განაცხადა.
როგორც ჩანს, მარგველაშვილი საპრეზიდენტო არჩევნებში მონაწილეობაზე დიდხანს ფიქრობდა, რასაც მის მიერ გაკეთებული განცხადება ადასტურებს.
,,ამ არჩევნებში მონაწილეობის მიღებას აღარ ვაპირებ, სხვანაირად, სხვა ფორმით თქვენთან ერთად გავაგრძელებ ჩვენი ქვეყნის სამსახურს“, _ განაცხადა მარგველაშვილმა.
,,გურია ნიუსმა“ პოლიტიკის ექსპერტს, გია ხუხაშვილს მიმართა კითხვით _ რა იყო მთავარი მიზეზი, რის გამოც მარგველაშვილმა საპრეზიდენტო არჩევნებში მონაწილეობაზე უარი თქვა?
ხუხაშვილის თქმით, ერთადერთი მიზეზი იყო პოლიტიკური ცხოვრება, რომელსაც მარგველაშვილი ტვირთად აღიქვამდა.
,,ერთადერთი მიზეზია ფუნდამენტური, რაც გახლავთ ის, რომ მისთვის პოლიტიკა იყო ტვირთი. მისი ბუნებრივი მდგომარეობა იყო, რაც მის ბიოგრაფიაში ჩანს, სამოქალაქო საზოგადოების პლატფორმიდან სამსახური და სახელმწიფო მოღვაწეობა. ალბათ, ის ბრუნდება სამოქალაქო სექტორში, რაც მისთვის ბევრად უფრო კომფორტულია. დანარჩენი ყველაფერი არის შეთქმულების თეორია და ემოციები“, _გვითხრა ხუხაშვილმა.
მმართველი პარტიიდან ზაქარია ქუცნაშვილი აცხადებს, რომ მეოთხე პრეზიდენტმა თავი ვერ გაართვა იმ ფუნქციების შესრულებას, რომელთა გათავისება ქვეყნის პრეზიდენტის მთავარი ამოცანა უნდა ყოფილიყო.
,,პრეზიდენტის მხრიდან ეს არის ძალიან სწორი გადაწყვეტილება. ისეთ კონსტიტუციურ სისტემაში, როცა პრეზიდენტი ქვეყნის მართვაში არ მონაწილეობს, მისი ღვაწლის შეფასება უნდა მოხდეს, არა გაკეთებული საქმეებიდან, რაც ქვეყნის მართვასთან არის დაკავშირებული, არამედ იმ შეხედულების, ავტორიტეტისა და ქვეყნის პოპულარიზაციიდან გამომდინარე, რაც მას შეეძლო გაეკეთებინა.
აქედან გამომდინარე, მისი საზომია არა ბიუჯეტის ზრდა და დაგებული გზები, არამედ ქვეყნის ცნობადობის გაზრდა საერთაშორისო ასპარეზზე. ბუნებრივია, მას ჰქონდა შესაძლებლობა, რომ გამხდარიყო ქართველი ოფიცრების ეთიკის კოდექსის ავტორი, გამხდარიყო, ქართველი მეცნიერების და ხელოვნების მიღწევების შეფასების ავტორი, გამხდარიყო შეწყალების პოლიტიკის ავტორი.
სამწუხაროდ, მე გამიჭირდება გითხრათ, რომ მან შეძლო ამ პოლიტიკის განხორციელება, რაც კანონზომიერებას, ლოგიკას და თანმიმდევრობას დაეფუძნება“, _ გვითხრა ქუცნაშვილმა.
გიორგი მარგველაშვილი თანამდებობაზე 2013 წლის 17 ნოემბერს დაინიშნა.
