საყდრისის კომიტეტმა დღეს გამართულ ბრიფინგზე წარმოადგინა სქემა, რომელიც, მათი განცხადებით, ძალიან ბევრ კითხვას აჩენს. კომიტეტი ვარაუდობს, რომ კომპანია „RMG”-ს უკან გარემოს დაცვის კომიტეტის თავმჯდომარე კახა კუჭავა დგას და ის ლობირებს კომპანიას.
კომიტეტის წევრების თქმით, „არემჯი ჯგუფის“ მეპატრონემ დიმიტრი ტროიცკიმ და ინგლისურმა კომპანიამ დააარსეს ერთობლივი კომპანია „ჯორჯია ვოტერ ენდ გოლდ“-ი, რომლის გენერალური დირექტორი იყო კახა კუჭავა.
_ როცა იგი დეპუტატი გახდა, მისი პოზიცია დაიკავა რევაზ ბერიძემ, რომელიც კახა კუჭავას ბიზნეს პარტნიორია და მათ საერთო მფლობელობაში კიდევ ბევრი კომპანია აქვთ, _ განაცხადეს კომიტეტის წევრებმა.
საყდრისის კომიტეტი გარემოს დაცვის სამინისტროსგან „RMG“-ს მიერ გარემოსთვის მიყენებული ზარალის ოდენობის განსაზღვრას ითხოვს.
_ ზარალი რამდენიმე ასეულ მილიონს აჭარბებს და განსაზღვრა შეგნებულად ჭიანურდება. ამის მიზეზი კი ის არის, რომ ახლო მომავალში მიღებული იქნება ახალი კანონმდებლობა, რომელიც მორგებული იქნება კომპანია „არემჯი“-ზე და მათ გარემოზე მიყენებული ზარალის კოლოსალური რაოდენობა შესაძლოა მთლიანად ჩამოეწეროთ, _ აღნიშნეს კომიტეტის წევრებმა ბრიფინგზე.
მათივე ინფორმაციით, 2015 წელს ბოლნისის რაიონში 5 წყლის და 15 მიწის სინჯი იქნა აღებული და კვლევის შედეგების თანახმად ვითარება საგანგაშოა.
კომიტეტმა ბრიფინგზე ამ კვლევის შედეგები და ცხრილებიც წარმოადგინა, რომლის მიხედვით ქიმიური ელემენტები დასაშვებ ზღვარს რამდენჯერმე აღემატება.
კომიტეტის წევრები კომპანია RMG-დან ბოლნისის რაიონში მოსახლეობის ეპიდემიური კვლევის დაფინანსება, ნიადაგისა და ერთწლოვანი კულტურების კვლევას მაი ჩართულობით ითხოვენ.
