“საყურადღებო სიტუაციაა ბავშვთა ინფექციების გავრცელების მხრივ” – ეპიდემიოლოგი

ოზურგეთში ბავშვთა ინფექციების გავრცელების მხრივ საყურადღებო ვითარებაა,_ ამის შესახებ “გურია ნიუსს” ოზურგეთის საზოგადოებრივი ჯანდაცვის ცენტრის ეპიდემიოლოგმა ელზა სიმონიშვილმა განუცხადა.

“სააღდგომო, სადღესასწაულო დღეებთან დაკავშირებით, ყოველთვის იზრდება სხვადასხვა ინფექციური დაავადებების გავრცელების რისკი, ამ მხრივ დღეისათვის ქვეყნისა და ჩვენი მუნიციპალიტეტის მასშტაბით შეიქმნა განსაკუთრებით საყურადღებო სიტუაცია ბავშვთა ინფექციების გავრცელების მხრივ.

კერძოდ: ბავშვთა ასაკში მოიმატა ინფექციური დაავადებების ჩუტყვავილასა და ქუნთრუშას შემთხვევებმა. თუმცა, მიუხედავად იმისა, რომ აღნიშნული დაავადებები ბავშვთა ასაკის ინფექციებს მიეკუთვნება, ადგილი ჰქონდა მოზრდილ ასაკშიც პედაგოგიურ პერსონალში, ინფიცირების შემთხვევას. მინდა მივმართო მოსახლეობას, რომ ვინაიდან აღნიშნული დაავადებები საკმაოდ მაღალ -კონტაგიოზურია, ანუ ადვილად ვრცელდება, განსაკუთრებული ყურადღება მიქციონ სადღესასწაულო დღეებში მაღალი მობილობის პირობებში, დაავადების გადადების რისკებს”,_ განაცხადა სიმონიშვილმა.

რაც შეეხება დაავადებების გავრცელებას, ძირითად წყაროს ჰაერ-წვეთოვანი გზა წარმოადგენს, გარდა ამისა არის გავრცელების კონტაქტური მექანიზმიც. დაავადებებისთვის დამახასიათებელი სიმპტომების ქონის შემთხვევაში, ეპიდემიოლოგი ამბობს, რომ საზოგადოებრივი თავშეყრის ადგილებს უნდა მოვერიდოთ.

“ორივე დაავადება ძირითადად ვრცელდება ჰაერ-წვეთოვანი გზით (ლაპარაკის, ხველის, დაცემინების დროს), ასევე კონტაქტური მექანიზმით-  ამ გამონაყოფებით, აგრეთვე ჩუტყვავილასათვის დამახასიათებელი ბუშტუკების შემცველი სეროზული სითხით დაბინძურებული ზედაპირებიდან, ნივთებიდან. ამიტომაც მაქსიმალურად უნდა ვეცადოთ, რომ სიმპტომების არსებობის შემთხვევაში, როგორებიცაა: ტემპერატურული რექცია, გამონაყარი, მწვავე რესპირატორული ინფექციებისათვის დამახასიათებელი ნებისმიერი სიმპტომი, ვეცადოთ, რომ ბავშვი ან მოზრდილი არ მივიდეს მასობრივი თავშეყრის ადგილებში, რადგან მომატებული ეპიდემიოლოგიური ფონის არსებობიდან გამომდინარე, არის ალბათობა, რომ დამახასიათებელი სიმპტომების ალაგების შემდგომაც შენარჩუნებული იქნას დაავადების გადადების, ანუ ინფიცირების საშიშროება”,_ ამბობს სიმონიშვილი.

როგორც ცნობილია, აღნიშნულ დაავადებებს აქვთ სხვადასხვა ხანგრძლივობის ინკუბაციური პერიოდი. დაავადების წყარო (ინფიცირებული, დაავადებული ადამიანი) ქუნთრუშას შემთხვევაში საშიშია გამონაყრამდე 1-2 დღით ადრე და 3-7 დღე გამონაყრის შემდგომ, საშუალოდ 2-7 დღე. ჩუტყვავილას ინკუბაციური(ფარული) პერიოდი გრძელდება 10-21 დღემდე, საშუალოდ კი 14 დღეს შეადგენს.

“გთხოვთ, რომ დამახასიათებელი სიმპტომების არსებობის პირობებში მიმართოთ ოჯახის, ექიმს, სკოლის ექიმს, პედიატრს, რათა დადგინდეს დიაგნოზი და ცნობილი გახდეს ინფიცირებულის იზოლირების ხანგრძლივობის ვადა, დიაგნოზის არარსებობის ან სხვა ნებისმიერ შემთხვევაში კი მაინც მოარიდოთ სიმპტომებიანი პიროვნება ხალხმრავლობას. აქვე მინდა, კიდევ ერთხელ შევახსენო ბავშვთა დაწესებულებების სამედიცინო პერსონალს, რადგანაც დაავადებები ვრცელდება ჰაერ–წვეთოვანი და კონტაქტური მექანიზმით, პროფილაქტიკურ ღონისძიებებს სააღმზრდელო დაწესებულებებში მიეკუთვნება ინფიცირებულის იზოლირება, ადგილობრივი სამედიცინო პერსონალის მიერ მკაცრი მონიტორინგი ახლო კონტაქტების სიმპტომებზე, ბავშვთა კოლექტივებში ჯგუფური იზოლაციის დაცვა, ხშირად შეხებადი ზედაპირების, სათამაშოების დამუშავება–დეზინფიცირება ყოველდღიურად, სასწავლო–სააღმზრდელო დაწესებულებებისათვის არსებული რეგლამენტის შესაბამისად.ავადმყოფ ბავშვს ისე უნდა მოვუაროთ, რომ მან საფრთხე არ შეუქმნას ოჯახის სხვა წევრებს და სხვა პირებს, განსაკუთრებით კი სადღესასწაულო დღეებში. გთხოვთ გაითვალისწინოთ,რომ ზემოთ ჩამოთვლილის ცოდნა და პრევენციის ღონისძიებების დაცვა, თავიდან აგვაცილებს დაავადების აღმოცენების, გავრცელებისა და ეპიდაფეთქებების საფრთხეს”,_ ამბობს სიმონიშვილი.