ოზურგეთის მუნიციპალიტეტის მერიამ ა(ა)იპ-ების რეორგანიზაცია დაასრულა _ ოფიციალურად მოწოდებული ინფორმაციის თანახმად, მუნიციპალიტეტში 17 არასამეწარმეო არაკომერციული იურიდიული პირი ფუნქციონირებს.
„ოზურგეთის მუნიციპალური მომსახურების სერვისცენტრის“ ხელმძღვანელად მერმა საკუთარი კადრი _ თენგიზ ქუტიძე დანიშნა; „ქალაქ ოზურგეთის მუნიციპალიტეტის გრ. კილაძის სახელობის მუსიკალური სკოლის“ ხელმძღვანელად ლელა შარაშენიძე დატოვეს; ცვლილება არ შეხებია „ოზურგეთის მუნიციპალიტეტის სამუზეუმო გაერთიანებას“, რომელსაც ისევ გოგა ტრაპაიძე ხელმძღვანელობს.
უცვლელია „ქალაქ ოზურგეთის მუნიციპალიტეტის სამხატვრო სკოლის“ და „ქალაქ ოზურგეთის მუნიციპალიტეტის თანამედროვე სახვითი ხელოვნების ცენტრი _ სურათების გალერეის“ ხელმძღვანელები _ ამ თანამდებობებზე ისევ კახა ვასაძე და ავთანდილ თავართქილაძე დაინიშნენ; ახალი ხელმძღვანელი ჰყავს საფეხბურთო კლუბი „მერცხალს“ _ ეს თანამდებობა მურთაზ აბაშიძემ დაიკავა.
ასევე, ახალი კადრია დანიშნული „ოზურგეთის მუნიციპალიტეტის სკოლამდელი აღზრდის ცენტრის“ დირექტორად _ ეს თანამდებობა კონსტანტინე შარაშენიძემ მაკა ჭყონიას ჩააბარა.
ოფიციალური დოკუმენტის თანახმად, ქორეოგრაფიული ანსამბლ „გურიას“ ისევ ნათია დუნდუა უხელმძღვანელებს; „ქალაქ ოზურგეთის მუნიციპალიტეტის საბავშვო თეატრს“ _ ლაშა კუტალაძე; „ოზურგეთის მუნიციპალიტეტის ცენტრალური ბიბლიოთეკას“ _ ლიკა ბაქანიძე.
„ოზურგეთის მუნიციპალიტეტის საზოგადოებრივი ჯანდაცვის ცენტრის“ ხელმძღვანელის თანამდებობაზე მაია ქუტიძეა დანიშნული; შპს „ტექნოსერვისის“ _ დავით რუსიეშვილი; შპს „სატისის“ ხელმძღვანელი დავით ცერცვაძეა; შპს „მუნიციპალური ტრანსპორტის“ _ ამბაკო გოგოტიშვილი; ხოლო „ოზურგეთის მუნიციპალიტეტის დაბა ურეკის კულტურის სახლის“ ხელმძღვანელად _ ქეთევან ლორთქიფანიძე.
ამ დროისთვის უცნობია, ვინ უხელმძღვანელებს „ოზურგეთის მუნიციპალიტეტის სპორტულ გამაჯანსაღებელ დაწესებულებათა გაერთიანებას“ _ ეს თანამდებობა შარაშენიძეს ჯერ არავისთვის ჩაუბარება.
ცნობილია კიდევ ერთი ახალი ა(ა)იპი და მისი ახალი ხელმძღვანელი _ „ოზურგეთის მუნიციპალიტეტის მოსწავლე ახალგაზრდობისა და სარეკრეაციო დაწესებულებათა გაერთიანების“ დირექტორად თამარ ნადირაძეა დანიშნული.
აღსანიშნავია, რომ ამ ახალი ა(ა)იპ-ის დასახელებაში „სარეკრეაციო დაწესებულების“ გამოჩენამ გაურკვევლობა გამოიწვია _ სამოქალაქო განათლების ლექსიკონის თანახმად, რეკრეაცია „საფრანგეთში, ინგლისსა და ზოგ სხვა ქვეყანაში ნიშნავს დასვენებას გაკვეთილებს შორის სკოლაში“. ამავე ლექსიკონში გარკვევით წერია, რომ მეცნიერულად ეს ტერმინი აღნიშნავს დასვენებას, ადამიანის ძალების აღდგენას, რაც დაეხარჯა მას შრომის პროცესში.
„recreatio _ აღდგენა. გამოფიტული ნიადაგის, გაჩეხილი ტყის აღდგენა; სასწავლო დაწესებულებებში _ დასვენებისათვის განკუთვნილი დარბაზი ან შენობა” _ წერია ლექსიკონში.
იმის გასარკვევად, თუ რას გულისხმობენ ოზურგეთში „სარეკრეაციო დაწესებულებებში“, მერიას დავუკავშირდით:
„მოხდა ოზურგეთის მუნიციპალიტეტის მერიის ა(ა)იპ მოსწავლე-ახალგაზრდობისა და ა(ა)იპ ოზურგეთის მუნიციპალიტეტის დასვენებისა და კულტურის პარკის გაერთიანება, რომელიც მოიცავს ატრაქციონებს და გასართობ ობიექტებს. სარეკრეაციო ზონა არის ზონა, რომელიც მდებარეობს განაშენიანებული ტერიტორიების საზღვრებში და მოიცავს გამწვანებულ ტერიტორიას (პარკი, ბაღი, ბულვარი, სკვერი, გაზონი), ღია სათამაშო მოედნებს და მსგავსი ტიპის სხვა ტერიტორიებს, სადაც შესაძლებელია სარეკრეაციო ზონის ფუნქციონირებისათვის აუცილებელი შენობა-ნაგებობების არსებობა კანონმდებლობის შესაბამისად“, _ მოგვწერა ოზურგეთის მერიის საზოგადოებასთან ურთიერთობის განყოფილების ხელმძღვანელმა ეკატერინე მგელაძემ.
