ოზურგეთი-ბათუმის ცენტრალური გზის მონაკვეთი, მდინარე ჩოლოქის ხიდამდე ექვს კილომეტრამდე მანძილს ითვლის. ბოლო წლების მანძილზე ამ გზის დაზიანების ხარისხმა პიკს მიაღწია და გარკვეულ მონაკვეთებზე ასფალტის საფარიც აღარ არსებობს. ორმოები, ღრმულები, გადათხრილი და ჩაზნექილი ადგილები ისეა ერთმანეთზე გადახლართული, რომ მძღოლები გვერდის ავლას გაჭირვებით ახერხებენ. აღნიშნულ მონაკვეთზე, სოფელ ქაქუთის და ჭანიეთის მხრიდან მომავალი ღეელეებისთვის არსებობს წყალგამტარი გვირაბები, რომელთა ზედაპირზე გზა იმდენად დაზიანებული და ჩაზნექილია, შესაძლოა, ყოველ წუთს ტრაგედია დატრიალდეს.
აღნიშნული გზის მონაკვეთზე, მრავალი წელია, მხოლოდ ორმულ შეკეთებას თუ ახერხებდნენ და მართალია, ცენტრალურ ქალაქებს შორის არსებული გზატკეცილის სტანდარტს ვერ აკმაყოფილებდა, მაგრამ შეუფერხებელი მოძრაობა შესაძლებელი იყო. მერე კი, რაც ამ გზაზე ჩინური ტვირთმზიდი მანქანები გამოჩნდნენ და როგორც „გზამშენი 18“-ს ხელმძღვანელი თემურ ჯახვა ამბობს, 16 ტონა ტვირთის ნაცვლად, ორმოცი ტონის გადატანა დაიწყეს. ფაქტობრივად, ტრასა ორმოებად და ასფალტის საფარის ნაფლეთებად იქცა.
„გურია ნიუსი“ გასულ წლის გაზაფხულზე ესაუბრა თემურ ჯახვას. მაშინ მან გვითხრა, რომ ივნისის დასაწყისითვის გზის რეაბილიტაცია დასრულებული იქნებოდა, თუმცა, ეს დაპირებად დარჩა, თუ არ ჩავთვლით პერიოდულად აქა-იქ ორმოების ხრეშით ამოვსებას და ე.წ. „დაკერებას“.
„გურია ნიუსი“ გზის ამ მონაკვეთზე მოძრავი ავტომანქანების მძღოლებს გაესაუბრა.
მამია სურმანიძე: „მე აქეთ ძალიან ხშირად არ დავდივარ, მაგრამ როცა ვმოძრაობ, ჩემზე მეტად მანქანა მეცოდება. მუქთად კი არავის მოუცია, რომ ერთ გავლაზე მოვსპო. ღამით ხომ აქ გავლა არ შეიძლება. ამდენი ხანი ამ ყველაფრის ასე მიფუჩეჩება და ადამიანების ბედზე ასე თამაში, ყოველგვარი უპასუხისმგებლობის ზღვარს სცილდება. ასე იაფი ღირს კაცის სიცოცხლე? რას ჰგავს ეს ყველაფერი, ამაზე ლაპარაკი შეიძლება? საქართველოში დღეს სადმე გეგულებათ ასე დაზიანებული ცენტრალური გზა? ყველაფერი უნდა გადადოს მთავრობამ და ეს გააკეთოს. რამდენი ადამიანი მოძრაობს ამ გზაზე, ითვლიან?“
ზურაბ ქიმუცაძე, ჭანიეთის მკვიდრი: „ყოველდღე მიწევს ამ გზაზე ავტომობილით მოძრაობა. სამსახურში დავდივარ. უნდა ნახოთ, ღამის საათებში რა ხდება. დღისით ვერ უვლიან გვერდს ერთმანეთს ავტომანქანები და ღამით ხომ საათობით დგანან. კი არ მიდიან, მიხოხავენ. იკარგება დრო და ნერვები და რაც მთავარია, აქ გარდაუვალია ტრაგიკული შემთხვევა, თუ სასწრაფოდ არ მიხედეს. ღმერთი იფარავს, ალბათ, ხალხს“.
_ გვარს და სახელს რატომ მეკითხებით? წადით და ნახეთ ლეკიანში, საყანე ფართობების გზა ამაზე უკეთესი თუ არაა! რა არის ეს? ვიდეომასალას რომ მოამზადებდეთ, ის სჯობს. დადექით აქ ღამით, გაათიეთ ერთხელ და ნახეთ, რა ხდება, _ უკმაყოფილება გამოთქვა სამარშრუტო მიკროავტობუსის მძღოლმა, რომელმაც მანქანა მანქანა ორმოებზე ძლივს გადაატარა.
ჯუმბერ სურგულაძე, ოზურგეთი: „ამ გზაზე, დიდი ხანია, გავლაც არ შეიძლება, მაგრამ რა ვქნა? მძიმე ტვირთმზიდმა მანქანებმა სასტიკად რომ დააზიანა ეს ტრასა, ამისთვის თავიდან უნდა მიექციათ ყურადღება. ტვირთის გადატანას ვერ დაუშლი, ქვეყანაში საქმე კეთდება, მაგრამ კონტროლი სადაა? მაინცდამაინც ტრაგედია უნდა დატრიალდეს? მიკვირს, აქამდე რას უყურებენ. ხრეში მაინც მოზიდონ კვირაში ერთხელ, რომ ტრანსპორტმა ისე იმოძრაოს, ქვეითად მოსიარულემ არ გაასწროს.
ჯუმბერ მახარაძე, ოზურგეთი: „აქ უცხო ადამიანი შეიძლება დაიღუპოს. შეაკეთონ მაინც, სანამ სრული რეაბილიტაცია მოხდება ან როდის იწყება ეს რეაბილიტაცია? რახანია ეს გზა დანგრეულია, წელს კი უკვე მთლიანად გამოვიდა მწყობრიდან“.
მარი მართალიშვილი, ნონა ბაჯელიძე, მგზავრები: ჩვენ გვაკვირვებს ერთი რამ, ამ გზების უფროსი არ ნახულობს, აქ რახდება? ყველა ხედავს, რომ ოზურგეთი-ბათუმის გზის ამ მონაკვეთზე სიკვდილი გვიცდის. ვიღაცას შეიწირავს ეს გაუთავებელი ორმოები და გადავარდნილი გზის კიდეები. ვის უშენებენ ახალ გზას, ვისთვის გადააქვთ ამ უზარმაზარ მანქანებს ეს ტვირთი, პარალელურად რომ სიცოცხლის მოსასპობად დადიან? ერთხელ დაწერა და თქმა არ უშველის ამ საქმეს. მინისტრი ჩამოიყვანეთ აქ და აჩვენეთ, რას ჰგავს.
„გურია ნიუსი“ შპს „გზამშენი-18“-ის უფროსს თემურ ჯახვას ესაუბრა.
_ ბატონო თემურ, რატომ გაიწელა ასე ძალიან ოზურგეთი-ბათუმის ცენტრალური გზის ექვსკილომეტრიანი მონაკვეთის რეაბილიტაცია? იცით ამ დროისთვის რა მდგომარეობაშია?
_ დიახ, გეთანხმებით. ავაწრიალე მაგისთვის სამინისტრო. დეპარტამენტის თავმჯდომარე ოცი დღის წინ იყო ოზურგეთში ჩამოსული და გეგმაში ჩაისვა. ხელი მოეწერა ამ ექვსკილომეტრიანი გზის რეაბილიტაციას.
_ გასულ წელსაც თქვით, რომ ზაფხულში გაკეთდებოდა.
_ კი, მაგრამ არ ჩაისვა, ვერ მოხერხდა.
_ თუ დადიხართ ამ გზაზე და თუ ხედავთ, რა რაოდენობის ტვირთი გადააქვთ, ხრეშის სახით ჩინურ მანქანებს აჭარის მიმართულებით?
_ კი, მათ მოსპეს ეს გზა. ორმაგი ტვირთი მიაქვთ, 16 ტონის ნაცვლად, ორმოც ტონას რომ წაიღებს, აბა, რა იქნება?
_ სად მიაქვთ ეს ტვირთი?
_ ბეტონის ქარხნებს ამარაგებენ აჭარაში.
_ კონტროლის მექანიზმი ვინ უნდა აამოქმედოს?
_ უნდა იდგეს სასწორი, არის კონტროლის ასეთი ფორმა, სადაც შეაყენებენ დატვირთულ მანქანას და აწონიან. თუ ზედმეტს მაინც წაიღებს, ხუთი ათასი ლარით დაჯარიმდება ურჩი მძღოლი. მე მინდა, ეს ნატანებში დაიდგას.
_ მერე რატომ არ სვამთ საკითხს?
_ ათასჯერ მაქვს ნათქვამი ადგილობრივ ხელისუფლებასთან.
_ და ეს ადგილობრივი ხელისუფლების მოსაგვარებელია?
_ პატრული უნდა აწესრიგებდეს, უფრო შინაგან საქმეთა სამინისტრო.
_ მიაწოდეთ მკითხველს ობიექტური ინფორმაცია, როდის იწყება აღნიშნული გზის რეაბილიტაცია?
_ მომავალი წლის თებერვალს არ გადაშორდება ტენდერი. გამარჯვებული კომპანია დაიწყებს გზის შეკეთებას.
_ ბატონო თემურ, გზას როდის შეაკეთებთ ისე, რომ, როგორ მძღოლები ამბობენ, აქ „ჩასაფრებული სიკვდილი“, თავიდან ავიცილოთ?
_ გპირდებით, ხვალვე დავიწყებთ მოხრეშვას.
