აგვისტოს მიწურულს და სექტემბრის დასაწყისში, თვის შუა რიცხვებამდე, განსაკუთრებული ფუსფუსი გვმართებს ჩვენს ბოსტნებში, რომ დამდეგ ზამთარსა და შემდეგ გაზაფხულზე უხვად გვექნეს ოხრახუში, ქინძი, ნიახური, სტაფილო, წიწმატი, ბოლოკი, მრავალშვილა ხახვი, ე.წ, სოხვი, სტაფილო და ნიორი. ეს აგრარული კულტურები სწორედ ამ პერიოდში განსაკუთრებული მონდომებით უნდა დავთესოთ.
უმთავრესი _ ნაკელის შეტანა, კომბინირებული სასუქის მცირე დოზით ნიადაგის განოყიერება და ნაკვეთის დაყოფა პირველი სამუშაო ეტაპია. განსაკუთრებით სტაფილოს, სოხვის, ბოლოკის და ნივრის ნათესების მოვლისთვის საჭირო ღონისძიებათა კომპლექსში დიდი მნიშვნელობა ენიჭება გამეჩხერებისა და გამარგვლის შემდეგ, ნიადაგის გაფხვიერებას მწკრივთაშორისებში.
დათესვის შემდეგ, ბოსტნეული განსაკუთრებით სწრაფად ამოდის, რადგან სპეციფიური პერიოდია. ამ კულტურების მოვლის პირველი ოპერაციები _ ბრძოლა ნიადაგის ქერქთან, პირველი გათოხნა და გამეჩხერება _ მიმართული უნდა იყოს იქითკენ, რომ შეიქმნას აუცილებელი პირობები მცენარეთა ნორმალური ზრდისთვის, განვითარების და საწყის ფაზაში უზრუნველყოფილი იქნეს სამომავლოდ მათი სათანადო სიხშირე. შემდგომი მოვლის მიზანია მწკრივთაშორისების პერიოდული გაფხვიერებით შევქმნათ უფრო ხელსაყრელი პირობები ფესვების ინტენსიური ზრდისა და აქედან გამომდინარე, საგაზაფხულოდ საუკეთესო შედეგის მისაღებად. აღნიშნული აგრარული კულტურების განუწყვეტელი ზრდისა და განვითარებისთვის, სექტემბრიდან ვიდრე გაზაფხულამდე, აუცილებელია ნიადაგში, გარდა ტენისა, განუწყვეტლივ აღწევდეს ჟანგბადის ნაკადი.
ზოგადად, ფესვთა სისტემასთან ჰაერის მიდენის გაუმჯობესებისთვის, ბიოქიმიური პროცესების გაძლიერებისა და ნიტრატების დაგროვების გადიდებისთვის, განსაკუთრებით მაშინ, თუ ნიადაგი უსტრუქტუროა და ასეთი ახასიათებს გურიას, ბოსტნეული კულტურების მწკრივთაშორისები უნდა ვაფხვიეროთ მთელი სავეგეტაციო პერიოდის განმავლობაში.
დიდი მნიშვნელობა აქვს გაფხვიერების სიღრმესა და ვადებს _ თუ მაღალი ტემპერატურის პირობებში 2-10 სმ სიღრმეზე ვაფხვიერებთ, ნიადაგს გაფხვიერების ჰორიზონტებში არ აქვს ტენის საკმარისი მარაგი და ძლიერ მკვრივდება. ამ პირობებში ნიადაგი ცუდად იფშვნება, გაფხვიერებისას ამოტრიალდება დიდი ბელტები, კოშტები და ზიანდება მცენარეთა ფესვთა სისტემა. ამიტომ უმჯობესია უფრო ღრმა გაფხვიერება, რომ არ წარმოიშვას ნიადაგის ძლიერ გამკვრივებული შრე, ეგრეთ წოდებული, ნიადაგის შიგნითა ქერქი. ის აჩერებს ჟანგბადის შეღწევას, მავნედ მოქმედებს მცენარეთა კვებაზე და განვითარებაზე, ფესვები ჩამორჩება ზრდაში, ხოლო თუ მაღალი ტემპერატურაა, ზრდა საერთოდ წყდება.
სხვადასხვა ნიადაგებში შიგა ნიადაგური ქერქი სხვადასხვა ინტენსივობით წარმოიქმნება. უფრო მძიმე ნიადაგებში ის უფრო სწრაფად წარმოიშობა _ ზედაპირთან ახლოს იგი უფრო მკვრივია.
შიგა ნიადაგური ქერქის წარმოქმნის თავიდან ასაცილებლად, გამეჩხერების შემდეგ პირველი გაფხვიერება 10-12 სმ სიღრმეზე უნდა მოვახდინოთ, ხოლო თუ ნიადაგი მძიმე და შეკრულია, სადაც ნიადაგის წყლები ახლოს მდებარეობს _ 12-14 სმ სიღრმეზე.
ყველა შემთხვევაში, გურიაში არსებულ მწირ ნიადაგებს, რომელიც უკანასკნელ ათწლეულში კიდევ უფრო გამოიფიტა, საგულდაგულო მიხედვა სჭირდება, თუნდაც აგრარული კულტურების საოჯახო გარემოში მოსაყვანად. ხოლო თუ მცირე ბიზნესს მაინც ვაწარმოებთ ამ კუთხით, მით უფრო. უკვე ყველასთვის ცნობილია ჩვენს რეგიონში რომ მიწა სასწრაფო და საგანგებო მიხედვას ითხოვს.
