სერტიფიკატის მოპოვება სწავლების გვერდის ავლით?

მიზეზი იმისა, რომ მეორე ცვლის მასწავლებლები ტრენინგს მიღმა დარჩნენ, წყაროს მტკიცებით, არის ის,

რომ ფული არ არის სამყოფი, რომ ყველა გადაამზადონ: “თუმცა, სასერტიფიკაციო სიაში მოხვდნენ ადმინისტრაციული სფეროს თანამშრომლებიც. ტრენინგი, რომელიც დასასრულს უახლოვდება, მხოლოდ მასწავლებლებისთვის და მეთოდისტებისთვის არის განკუთვნილი”, _  ამბობს წყარო.

წყარო იმასაც ამტკიცებს, რომ სკოლამდელი აღზრდის ცენტრში, ტრენინგის პარალელურად, თითოეული თანამშრომლისგან ათ ლარს აგროვებენ და თუ რისთვისაა ეს თანხა განკუთვნილი, დადგენა ძნელი არ უნდა იყოს:

_ რაოდენ გასაკვირიც უნდა იყოს, სასერტიფიკაციო სიაში შეიყვანეს ოზურგეთის მუნიციპალიტეტის ადრეული და სკოლამდელი აღზრდის განყოფილების უფროსი თემურ მოქია; ასევე, ადმინისტრაციის სხვა თანამშრომლებიც, _ გვეუბნება წყარო და დასძენს, რომ “მათ სერტიფიკატი ტრენინგის გაუვლელად უნდა გადასცენ. მიზეზი და მიზანი ამისა კი არის ის, რომ, სავარაუდოდ, სკოლამდელი აღზრდის დაწესებულებების კვლავ განათლების სისტემისთვის დაქვემდებარებას ვარაუდობენ და ადგილს იმზადებენ”.

“გურია ნიუსი” ოზურგეთის მუნიციპალიტეტის სკოლამდელი აღზრდის ცენტრის დირექტორს, მაკა ჭყონიას ესაუბრა:

_ ქალბატონო მაკა, რა სახის ტრენინგი ტარდება ახლა სკოლამდელ დაწესებულებაში და მართალია თუ არა, რომ პედაგოგთა წარდგენა სუბიექტური შერჩევით მოხდა?

_ ეს არის ხუთდღიანი ტრენინგი: “სასკოლო მზაობის სტანდარტები და ბავშვებზე ძალადობა, ძალადობის ფორმები და პრევენცია”. შარშან, როგორც გვითხრეს, სოფლების ბაღების აღმზრდელებს ჰქონდათ გავლილი. მოვიკითხეთ და ვისაც არ ჰქონდა გავლილი, ისინი ჩავრთეთ. ასევე, დავუძახეთ ქალაქის საბავშვო ბაღების აღმზრდელებს. სულ 64 პედაგოგი მონაწილეობს და გაიცემა 64 სერტიფიკატი. ნელ-ნელა ყველა გაივლის ტრენინგს და არავინ არ დარჩება ტრენინგგაუვლელი. სრული სიცრუეა, რომ შერჩევა ვიღაცის სურვილის მიხედვით მოხდა.

_ ჩვენი წყაროს ინფორმაციით, თემურ მოქიაც მოხვდა იმ სიაში, ვისაც სერტიფიკატი უნდა გადაეცეს ტრენინგის გაუვლელად.

_ რა სისულელეა? რაში სჭირდება თემურ მოქიას ეს სერტიფიკატი? საერთოდ არ მისულა იქ. მე პასუხისმგებელი ვარ იმაზე, რომ 64 პედაგოგი მონაწილეობს ტრენინგში და 64 მიიღებს სერტიფიკატს. სიცრუეა მოქიას მიმართ ასეთი ინფორმაციის გავრცელება…

_ ასევე, გვაცნობეს, რომ სკოლამდელი აღზრდის ერთ-ერთი თანამშრომელი 10 ლარს აგროვებს თითოეული პედაგოგისგან. რა თანხაა ეს და რამდენს იხდით თქვენ თითოეული პედაგოგისთვის ამ ტრენინგში?

_ მე ვერ გეტყვით, რა თანხაა ეს. შესაძლოა, თავად სურთ რაიმე ღონისძიების ჩატარება. ეს მათი საქმეა. არ ვიცი ამის შესახებ. რაც შეეხება პედაგოგთა გადამზადებას, თითოეულისთვის 60 ლარს ვიხდით.

მაკა ჭყონიამ, ასევე, გვითხრა, რომ თუ საჭირო იქნება, სასკოლო მზაობის ტრენინგზე წარდგენილი პედაგოგების სიას წარმოგვიდგენენ, დამადასტურებელი საბუთებით.

“გურია ნიუსი”, ასევე, ესაუბრა ოზურგეთის მუნიციპალიტეტის მერიის ადრეული და სკოლამდელი აღზრდის განყოფილების უფროსს, თემურ მოქიას, რომელმაც გაიკვირვა ინფორმაცია იმის შესახებ, რომ თითქოს სკოლამდელი დაწესებულების აღმზრდელის სერტიფიკატი სურს.

_ რაში მჭირდება ეს სერტიფიკატი? მე მაქვს სერტიფიკატი, როგორც სკოლის დირექტორს. ასევე, მაქვს სერტიფიკატი, როგორც ქართული ენის მასწავლებელს. ასევე, მაქვს სკოლამდელ დაწესებულებაში რეესტრის წარმოების სერტიფიკატი. მე შეურაცხყოფას არ ვაყენებ აღმზრდელის პროფესიას, მაგრამ აღმზრდელი არასდროს ვყოფილვარ. ეს სერტიფიკატი სჭირდება მას, ვინც აღმზრდელია და გარკვეული დროის შემდეგ იქნება აღმზრდელ-პედაგოგი.

_ ამბობენ, რომ სკოლამდელი დაწესებულებები კვლავ განათლების სისტემას უნდა შეუერთდეს…

_ შეიძლება არ შეუერთდეს და მართვის კუთხით, გარკვეული დროის შემდეგ, შესაძლოა, სკოლებიც მუნიციპალურში გადმოვიდეს. კანონი სკოლამდელთა აღზრდის შესახებ განათლების სამინისტრომ მოამზადა, მეთოდური კუთხით მაინც სამინისტროა ჩართული და რომც მოხდეს გადმოსვლა, მეთოდურ მხარეს მაინც სამინისტრო დაიტოვებს. ამ თემას რაც შეეხება, საბავშვო ბაღებთან კავშირი, სამსახურიდან გამომდინარე მაქვს. აღმზრდელი არასდროს ვყოფილვარ და არც სურვილი მაქვს. ვიმეორებ, შეურაცხყოფას არ ვაყენებ ამ პროფესიას, მაგრამ რაში მჭირდება აღმზრდელის სერტიფიკატი? _ გვითხრა მოქიამ.