სეზონური გრიპების მომატებული შემთხვევები ოზურგეთში

საახალწლო დღეებში მასიური თავშეყრისა და მაღალი მობილობის პირობებში, განსაკუთრებით საყურადღებოა ჰაერ-წვეთოვანი გზით გადამდები დაავადებების თავიდან აცილება.

რა ვირუსები ცირკულირებს ამ ეტაპზე და რა მდგომარეობაა ოზურგეთში _ ამის შესახებ “გურია ნიუსი” ოზურგეთის საზოგადოებრივი ჯანდაცვის ცენტრის ეპიდემიოლოგ ელზა სიმონიშვილს ესაუბრა.

“როგორც ცნობილია, ქვეყანაში ცირკულირებს ე.წ. ჰონგ-კონგის ტიპის სეზონური გრიპის ვირუსი. გამონაკლისი არ გახლავთ არც ჩვენი მუნიციპალიტეტი, სადაც სეზონური გრიპის შემთხვევათა მატება დაფიქსირდა მე-40 კვირიდან, ანუ ოქტომბრის თვიდან. შემთხვევათა პიკი გვქონდა 48-ე კვირაზე, შემდეგ დაფიქსირდა მცირედი კლება, ხოლო ამჟამად გვაქვს ისევ მომატებული სტატისტიკა. სეზონური გრიპის შემთხვევები გადანაწილებული გახლავთ სხვადასხვა ასაკობრივ ჯგუფში. ამ მხრივ განსაკუთრებით საყურადღებოა მცირე ასაკის ბავშვები, ორსულები, ხანდაზმული პირები, სხვადასხვა ქრონიკული დაავადების მქონე პაციენტები”,_ ამბობს სიმონიშვილი.

რაც შეეხება  სეზონური გრიპის ახალი შემთხვევების ტიპურ მიმდინარეობას, სიმონიშვილის თქმით, მას ახასიათებს  ტემპერატურის მკვეთრი მატება, ყელის, თავის, სახსრების ტკივილი, საერთო სისუსტე და ინტოქსიკაციის ზოგადი ნიშნები.

სიმონიშვილი ჩვენთან საუბრის დროს აღნიშნავს, რომ სეზონური გრიპი  გაცილებით უფრო მძიმედ მიმდინარეობს, ვიდრე კორონავირუსის მუტაცია–ომიკრონი, რომელიც დღეს ჩვენში ცირკულირებს.

“აღნიშნულ დაავადებებს თავდაპირველი სიმპტომატიკა მსგავსი აქვთ, ამიტომ შემდგომი გართულებების თავიდან ასაცილებლად საჭიროა ტესტირება კორონავირუსზე, რაც ჩვენს მუნიციპალიტეტში მიმდინარეობს საზოგადოებრივი  ჯანდაცვის ცენტრსა და სხვა ტესტირების პუნქტებში უფასოდ. უმნიშვნელოვანესია სწორი დიაგნოსტირება, რადგან არც ჩვენს მუნიციპალიტეტში და მასიურად არც ქვეყნის მასშტაბით სეზონურ გრიპზე ტესტირება არ მიმდინარეობს (ზოგიერთი გამონაკლისი შემთხვევის გარდა). ამას გადამწყვეტი მნიშვნელობა აქვს, რადგანაც გრიპისა და კორონავირუსის მკურნალობა აბსოლუტურად განსხვავებული პრეპარატებით ხორციელდება. დღეისათვის სეზონურ გრიპთან ბრძოლის ყველაზე ეფექტურ ღონისძიებებს მიეკუთვნება პრევენციული ღონისძიებების დაცვა და ვაქცინაცია, რომელიც ჩვენში შემოდგომიდან დაიწყო–ფრანგული წარმოების ოთხ კომპონენტიანი ვაქცინით.

ხოლო პრევენციულ-პროფილაქტიკურ ღონისძიებებში იგულისხმება დისტანცირება, პირადი დაცვის საშუალებათა გამოყენება, ნებისმიერი მწვავე რესპირატორული სიმპტომის გამოვლენისთანავე იზოლირება, სიმპტომებზე დაკვირვება, ოჯახის ექიმის საქმის კურსში ჩაყენება, მკურნალობის სრულყოფილად განხორციელება, ხოლო ბაქტერიული ინფექციის თანდართვისას, შესაბამისი ანტიბიოტიკო -თერაპია, სპეციალისტის დანიშნულებით და არავითარ შემთხვევაში საკუთარი შეხედულებით.

სეზონური გრიპის პიკი, როგორც წესი, მოდის დეკემბერ-იანვრის თვეებზე, შესაბამისად, შეიძლება მივიჩნიოთ, რომ ამჟამად ვიმყოფებით სწორედ ამ პერიოდში, ამიტომ ყურადღება გვესაჭიროება ყველას და განსაკუთრებით  ბავშვთა დაწესებულებებისა და ხანდაზმულთა პანსიონის სამედიცინო პერსონალსა და მენეჯერებს, ასევე სხვა რისკ-ჯგუფებს, რათა შევინარჩუნოთ ჯანმრთელობა და არ დავუშვათ ვირუსული გრიპის შემთხვევათა მასიური გავრცელება და ეპიდაფეთქების შემთხვევები”,_ ამბობს სიმონიშვილი.