საქართველოში გერმანიის კანცლერის, ანგელა მერკელის ვიზიტზე ,,გურია ნიუსი“ საერთაშორისო ურთიერთობების ექსპერტს, თორნიკე შარაშენიძეს ესაუბრა.
_ ბატონო თორნიკე, დღეს საქართველოში ვიზიტად მყოფმა ანგელა მერკელმა ღიად ისაუბრა საქართველოს ტერიტორიების ოკუპაციაზე. გუშინ კი გერმანიის კანცლერს სიტყვა ოკუპაცია მედიასთან არ უხსენებია და ჟურნალისტის კითხვაზე _ რუსეთის პრეზიდენტთან შეხვედრისას რაიმე ფორმით განიხილებოდა თუ არა საქართველოს ტერიტორიების ოკუპაცია? _ პასუხი არ გასცა. როგორ ფიქრობთ, გერმანიის კანცლერმა რატომ არ უპასუხა აღნიშნულ შეკითხვას?
_ უტაქტო კითხვაა, როცა ეკითხები, შენ თქვი თუ არა პუტინთან საუბრისას სიტყვა ოკუპაცია, ეს არის უტაქტო, უაზრო კითხვა და ამ კითხვას პასუხი როგორც გასცა, აბსოლუტურად გასაგებია, მერკელი არ არის ვალდებული ანგარიში ჩააბაროს ვინმეს.
_ როდესაც საქართველოში ჩამოდის გერმანიის კანცლერი, რომელსაც შეხვედრა ჰქონდა ოკუპანტი ქვეყნის პრეზიდენტთან, ბუნებრივია, ქართულ მხარეს აინტერესებს, რაიმე ფორმით განხილული იყო თუ არა საქართველოს ტერიტორიების ოკუპაცია. რატომ აცხადებთ, რომ ამ კითხვაზე პასუხის გაცემა ანგარიშის ჩაბარებას ნიშნავს და მედიის მხრიდან დასმული შეკითხვა უტაქტობაა?
_ შეიძლება პირად საუბარში განიხილო ეს თემა, მაგრამ ამ საკითხზე საჯაროდ საუბარი გერმანიის კანცლერს არ უნდა მოვთხოვოთ.
_ რაც შეეხება მის ვიზიტს საქართველოში, რამდენად მნიშვნელოვანია საქართველოსთვის გერმანიის კანცლერის სტუმრობა და როგორ ფიქრობთ, მერკელის ვიზიტი რა გავლენას იქონიებს საქართველოს ევროატლანტიკურ მომავალზე?
_ არ მგონია, რომ მის ვიზიტს დიდი გარღვევა მოჰყვეს. გერმანია მომხრე არის საქართველოსთან ზომიერი ურთიერთობების და საქართველოსთვის, რა თქმა უნდა, გერმანია არის საკმაოდ საინტერესო პარტნიორი. ამაზე მეტყველებს ის, რომ, თუ არ ვცდები, საქართველოში მუშაობს ხუთი გერმანული ფონდი, გერმანელები საქართველოში ძალიან დიდ ფულს ხარჯავენ მოყოლებული 90–იანი წლებიდან.
გერმანია ეს არის 80-მილიონიანი ძალიან ძლიერი სახელმწიფო. ამ სახელმწიფოს აქვს თავისი ეროვნული ინტერესი, რომელიც ყოველთვის არ ემთხვევა ამერიკის ეროვნულ ინტერესებს, რაც ყველამ უნდა გაიგოს.
_ ოპოზიცია საქართველოს პრემიერ-მინისტრ მამუკა ბახტაძეს აკრიტიკებს იმის გამო, რომ მან გერმანიის კანცლერთან საუბრისას საქართველოში არსებულ პრობლემები კონკრეტული მაგალითების ფონზე არ განიხილა. როგორ ფიქრობთ, რამდენად ოპტიმალურად იყო გამოყენებული გერმანიის კანცლერისა და საქართველოს პრემიერ-მინისტრის ერთობლივი ტრიბუნა?
_რა იციან, რაზე ისაუბრეს მერკელმა და ბახტაძემ ერთი ერთში? შეიძლება ბახტაძე, ჯერჯერობით, არ არის, უდიდესი სახელმწიფო მოღვაწე, მაგრამ რა იციან, რაზე ისაუბრეს მხარეებმა. ოპოზიცია იმისთვის არის, რომ გააკრიტიკოს. ოპოზიცია ყოველთვის იტყვის, რომ ქვეყანა დაიქცა, მთავრობა ყოველთვის იტყვის, რომ ქვეყანა აყვავდა. არც ერთი არ არის ხოლმე მართალი.
_ბატონო თორნიკე, როგორ ფიქრობთ, გერმანია მტკიცე მხარდამჭერია საქართველოს ნატოსა და ევროკავშირში ინტეგრაციის?
_ მერკელი საქართველოს ნატოში ინტეგრაციის წინააღმდეგია, რასაც არ მალავს. მიაჩნია, რომ ეს ძალიან გაართულებს რუსეთთან ურთიერთობას. გერმანიამ პოზიცია რომ შეიცვალოს, მაშინ კეთილი უნდა ინებონ საქართველოში და ამ ქვეყანასთან ორმხრივი ურთიერთობები უნდა გააძლიერონ, უნდა დანიშნონ სერიოზული დიპლომატი ელჩად. რაც შეეხება ევროკავშირში ინტეგრაციას, მერკელი გვიჭერს მხარს, მაგრამ საკითხავია, ევროკავშირში ინტეგრაციისთვის ჩვენ მზად ვართ? რით ვაკმაყოფილებთ მის სტანდარტებს _ ეკონომიკით თუ დემოკრატიით?
