სურსათის მაღალი ფასების დარეგულირებაზე ბიზნეს გარემოსა და ასევე, მომხმარებელთა რიგებში, კარგა ხანია, აქტიურად ისმის საუბარი.
თუმცა, ამბობენ იმასაც, რომ ეს უარყოფით გავლენას მოახდენს ბიზნესზე და რომ ფასების კონტროლი ხარისხის გაუარესებას გამოიწვევს.
ბიზნესის, დისტრიბუტორთა ასოციაციის წარმომადგენლები იშველიებენ მხოლოდ ევროკავშირის დირექტივას, რომელიც ფასების მხოლოდ ბაზარზე დაბალანსებას ეხება.
რა ხდება ამ ზოგადი მიდგომის მიღმა რეგიონებში, კონკრეტულად კი, ოზურგეთში?
ოზურგეთში, თითქმის, ერთი თვეა, პურის ფქვილის ფასი საგრძნობლად შემცირდა.
საშუალოდ, 25-კილოგრამიან ფქვილს 8-12 ლარით ნაკლებ ფასში იყიდით.
“გურია ნიუსი” დაინტერესდა, დაიწევდა თუ არა უახლოეს მომავალში პურის ფასი. ოზურგეთში. დღეისთვის ხუთი თეთრით მხოლოდ “ვასაძის პური” გაიაფდა. ამ საცხობში მრავალი დასახელების პურს აცხობენ.
_ ყველა სახის პური ხუთი თეთრით გაიაფდა. უმეტესად კი, ხალხი “ქვის პურს” ყიდულობს. როგორც შეფუთულს, ისე _ შეუფუთავს ხუთი თეთრით ნაკლებ ფასად შეიძენთ, _ გვითხრეს საცხობში.
შპს “ვასაძის პურის” დირექტორი, ირაკლი სირაძე ამბობს, რომ მუდმივად ატარებენ მონიტორინგს, რა შეიძლება გაკეთდეს. კითხვაზე, აპირებენ თუ არა მოკლე დროში პურზე ფასის დაკლებას, ამბობს, რომ ეს მოსალოდნელია:
_ ჩვენ მოვიქცევით ისე, რომ, პირველ რიგში, მომხმარებელიც არ დარჩეს უკმაყოფილო და წარმოებაც არ დაზარალდეს.
რიგითი მომხმარებლებმა ნინო ვადაჭკორიამ, იამზე ჭელიძემ და ცისანა ღლონტმა, რომლებმაც ჩვენი იქ ყოფნისას პური შეიძინეს, თქვეს, რომ უფრო ქმედით ნაბიჯებს ელოდებიან.
_ ჯერ მხოლოდ ხუთი თეთრით დაიკლო. პური ისეთი პროდუქტია, ხუთი თეთრით გაიაფებაც კარგია. თუმცა, ხალხს უჭირს და როცა პურის ფქვილი საკმაოდ გაიაფდა, პურის ფასმაც მეტად უნდა დაიწიოს, _ გვითხრეს მათ.
“გურია ნიუსი” სხვა საცხობებსაც ეწვია, თუმცა, ჯერ ოზურგეთში, სხვა სავაჭრო ობიექტებზე, სადაც პურს აცხობენ, ფასის კლება (არც თონეებში) არ შეინიშნება. მიუხედავად იმისა, რომ პურის ფქვილი საგრძნობლად გაიაფდა, მზა პურზე ფასის დასაკლებად ნება და სურვილი არ ჩანს.
როგორი მდგომარეობაა წინასააღდგომოდ რძის ნაწარმისა და განსაკუთრებით, კვერცხის ფასზე, რომელიც ძირითად პროდუქტს წარმოადგენს ამ დღესასწაულზე?
დღეისთვის ოზურგეთში განსაკუთრებით ბევრგან შეხვდებით ყუთებით დადგმულ კვერცხს, რომელსაც დიდი ასოებით აწერია: “ფასი 50 თეთრი”.
_ დღეისთვის კი ვაფასებთ 50 თეთრს, თუმცა, აღდგომამდე ორ კვირაზე მეტი დროა. ვფიქრობთ, გაძვირდება. შეიძლება, ფასი გაორმაგდეს კიდეც. შარშან, მაგალითად, ასე მოხდა. ამიტომ უმჯობესია, მსურველმა, მომხმარებელმა ახლა იყიდოს და შეინახოს _ შეინახეთ მაცივარში, _ ღიმილით გვეუბნება გულიკო მოდებაძე, რომელიც, მისივე თქმით, სოფლიდან ჩამოტანილ კვერცხს იბარებს, მერე კი ყიდის და ასე მიაქვს შინ “პურის ფული” თუ კონკრეტულად, პური.
იაფი არაა, თუმცა, დაიკლო რძის და რძის ნაწარმის ფასმა. ერთი ლიტრი რძე ორი ლარი ღირს. ერთი თვის წინ 2,50-3 ლარი ღირდა. ასევე, შესაძლებელია ერთი კილოგრამი ყველის 11 ლარად ყიდვა. ცოტა ხნის წინ კი, ერთი კილოგრამი ყველი 14-15 ლარი ღირდა.
ერთი კილოგრამი ხორცი (საქონლის) 20 ლარი ღირს. გოჭი, ცოცხალი წონით 14-15 ლარი ღირს ერთი კილოგრამი. სავარაუდოდ, როგორც აქ ამბობენ, სააღდგომოდ გაძვირდება, ან პირიქით, შესაძლებელია, მოხდეს ისე, რომ გაიაფდეს.
_ ახლა გაზაფხულის პირია. ყველი, კვერცხი, რძე, ამ დროს, ყოველთვის იკლებს ფასს, რადგან მატულობს მეწველი პირუტყვის რაოდენობა. ქათამიც უფრო აქტიურად დებს კვერცხს. ეს ბუნებრივი მდგომარეობაა ამ დროისთვის. გოჭის ფასი როგორ იქნება, ვერ გეტყვით, რადგან, გასულ წელს ღორის დაავადებამ კვლავ აქტიურად იჩინა თავი და საგრძნობლად იკლო სულადობის რაოდენობამ. ჩვენთანაც ნაკლები რაოდენობით შემოჰყავთ გოჭები, _ გვეუბნებიან ოზურგეთის ბაზარში, შინაური ფრინველის და ცხოველების გაყიდვაზე მომუშავე ქალბატონები.
სასურსათო მაღაზიებში საგრძნობლად გაიაფდა ზეთი. თითქმის, ყველა მაღაზიაშია შესაძლებელი 3,90 ლარად ერთი ლიტრი ზეთის შეძენა. თუ დიდი ტევადობის ჭურჭლით იყიდით, უფრო ნაკლებ ფასად შეიძენთ.
მომხმარებლები, მართალია, კმაყოფილებას გამოთქვამენ ფასების კლების გამო:
“შეღავათი ზეთის და შემდეგ შაქრის ფასზე ნამდვილად იგრძნობა, თუმცა ზოგადად თუ შევხედავთ პროდუქტის ფასს, რის გამო ვშრომობთ , ფაქტობრივად, არც ისე მნიშვნელოვნად იგრძნობა ფასდაკლება”, _ ამბობენ ისინი.
ავტორი
