კოლხეთის ეროვნულ პარკთან დაკავშირებით შექმნილი მდგომარეობა და ამ საკითხთან მიმართებით სოფლის მეურნეობის სამინისტროში გამართული შეხვედრა იყო მთავარი სასაუბრო თემა პედაგოგ სოსო კვაჭაძის მიერ გამართულ ბრიფინგზე. სოსო კვაჭაძე ერთ-ერთია, ვინაც ეროვნული პარკის პრობლემის გაჩენის დღიდან ამ საკითხითაა დაინტერესებული და საკმაოდ ბევრი რამ იცის არსებული სიტუაციის ირგვლივ.
როგორც ბრიფინგზე ითქვა, ლანჩხუთის მერიასთან მონადირეებისა და ფერმერების მიერ რამდენიმე დღის წინ გამართული ფართომასშტაბიანი აქციის კვალდაკვალ, რომლითაც გააპროტესტეს ის შეზღუდვები, რომლებიც კოლხეთის ეროვნული პარკის ფუნქციონირების გამო მათ დაუწესდათ, მუნიციპალიტეტის ხელმძღვანელობის ძალისხმევით შეხვედრა შემდგარა სოფლის მეურნეობის სამინისტროში და სწორედ აღნიშნულ მტკივნეულ საკითხს მოიცავდა მთლიანად.
კვაჭაძის თქმით, ამ შეხვედრას მასთან ერთად მხარის გუბერნატორი ზურაბ ნასარაია, მერი ალექსანდრე სარიშვილი და საკრებულოს წევრი გიორგი ჩახვაძე ესწრებოდნენ.
„არ შემიძლია, თავიდანვე არ ვთქვა, რომ ძალიან გახარებული ვარ, ის მრავალწლიანი ომი, რომელიც გვქონდა ეროვნულ პარკთან მიმართებაში, ლანჩხუთელთა სასარგებლოდ დასრულდა, ყოველ შემთხვევაში, ამ ეტაპზე მაინც. საქმე იმაშია, რომ ახალგაზრდების მიერ მოწყობილი აქციის შემდეგ, დაინტერესდნენ პრობლემით და სოფლის მეურნეობის სამინისტროში შეხვედრა გაიმართა“, _ აღნიშნა სოსო კვაჭაძემ, რომლის თქმითაც, მინისტრის მოადგილესთან შეხვედრაზე მიწვეული იყო ყველა ის ადამიანი, ვისაც რაიმე შეხება აქვს კოლხეთის ეროვნულ პარკთან.
როგორც ბრიფინგზე ითქვა, სოფლის მეურეობის მინისტრის მოადგილესთან შეხვედრა საკმაოდ ხანგრძლივი გამოდგა და ყველა იმ საკითხს მოიცავდა, რომელიც დღესდღეობით აქტუალურია ეროვნულ პარკთან მიმართებით.
„მთლიანობაში საკმაოდ გულახდილი საუბარი გამოვიდა, ყველა მტკივნეული პრობლემა მიმოვიხილეთ. მე ყველას შევახსენე ის კანონები თუ კონვენციები, რომლებიც უბრალო ადამიანებს არ ტოვებდნენ უუფლებოდ, თუნდაც ბუნების დაცვის მსოფლიო ფონდი, კანონი დაცული ტერიტორიების სისტემების შესახებ, რომელშიც მოსახლეობის გარკვეულ ჯგუფებს, გაერთიანებებს და მონადირეებს აქვთ გარკვეული უფლებები, რომელიც რატომღაც სრულიად უგულვებელყოფილია. ასევე წარვადგინე ის ათიათასკაციანი ხელმოწერები, რომელიც თავის დროზე მოსახლეობამ გააკეთა და ეს საპროტესტო მუხტი გამოიწვია იმ მძაფრმა წინააღმდეგობამ, რომელიც ეროვნული პარკიდან მოდის. რატომ ხდება ასე, თავიდანვე მკაცრად დაცულ ზონად გამოცხადებას გვახვევდნენ თავზე, მაშინ, როცა ადგილობრივი ხელისუფლების არცერთი წარმომადგენელი ამას არ ეთანხმებოდა, ყველა გამგებელი თუ საკრებულოს თავმჯდომარე ერთ აზრზე იყო და დღესაც ასეა. ვერ ნახავთ ადამიანს, ვინც ხელს მოაწერს ამ კანონის ამოქმედებაზე.
საკმაოდ ამომწურავი ინფორმაციაც მივაწოდეთ ყველა დაინტერესებულ მხარეს და ჩვენი მხრიდან შეკითხვაც დაისვა, რომ მართალია კოლხეთის ეროვნული პარკი, რომელიც წარმოადგენს საერთაშორისო მნიშვნელობის ჭარბტენიან და განსაკუთრებით გადამფრენი ფრინველების საბინადროდ ვარგის ტერიტორიას, კლასიკური გაგებით ეს არ არის ჭაობიანი ტერიტორია, ეს ტორფიანი ადგილია ზამთრის საძოვრებით, რატომ უნდა აიკრძალოს ნადირობა, თევზაობა, თიბვა, საქონლის ძოვება, სხვა ფერმერული საქმიანობა, მაშინ როცა ეს ხელს არ უშლის ეროვნული პარკის ფუნქციონირებას?! ჩვენ ხომ არ ვითხოვთ ტორფის ამოღებას და სხვა მავნე ეკოლოგიურ ზემოქმედებას, არამედ ვითხოვთ, უბრალოდ, კანონით დადგენილ უფლებებს.
მოკლედ დაგპირდნენ, რომ მაქსიმუმ ორ დღეში ქვეყნის პრემიერთან ერთად გაივლიდნენ ამ საკითხს და გამოსავალსაც მონახავდნენ. პირადად ჩემდა გასახარად ძალიან მალე, ანუ ლანჩხუთისკენ გზად მომავალს გვაცნობეს, რომ პრობლემა მოგვარდებოდა. პირადად მე დამირეკა გუბერნატორმა და მითხრა, რომ ბახტაძესთან საუბარი უკვე გაიმართა და მიმდინარე წლის პირველ მარტამდე, მოსახლეობას პარკის ტერიტორიაზე ყველა საქმიანობის შეზღუდვა მოეხსნება, ეს იქნება თევზაობა, თიბვა, საქონლის ძოვება თუ სხვა რამ. ანუ ნადირობის სეზონის დასრულებამდე, ნადირობაც დასაშვები იქნება, ოღონდ მკაცრად იქნება გაკონტროლებული ბრაკონიერობის შემთხვევები და ასეთი მაგალითები უმკაცრესად დაისჯება“, _ აღნიშნა სამინისტროში გამართული შეხვედრის შედეგით კმაყოფილმა სოსო კვაჭაძემ.
მისივე თქმით, ეს დროებითი რეგულაციებია და არსებული პრობლემების აღმოსაფხვრელად სამომავლოდ მსჯელობა კვლავაც გაგრძელდება.
„რა თქმა უნდა ეს რეგულაციები დროებითია, მაგრამ საქმისადმი ასეთი მიდგომა უდავოდ გამოსარჩევია. პრემიერმა დაგვანახა, რომ უბრალო მოსახლეობის ინტერესების უგულვებელყოფა დაუშვებელია და ეს პირველი წინგადადგმული ნაბიჯია. თუმცა ამით არაფერი მთავრდება და შემდგომში მუშაობა გაგრძელდება. კერძოდ, ვგეგმავთ ადგილზე, ჩვენი სამუშაო ჯგუფის შექმნას, რომელიც შეისწავლის ამ ტერიტორიებს, იგივე ტორფის ამოღების საკითხსაც, რაც არანაკლებ მნიშვნელოვანია, რამეთუ იქ არსებული ორგანული სასუქები, მინერალები და ჰუმუსი აღმოაცენებს ჩვენს გამოფიტულ და დაბერწებულ მოსავალს. მთელი მსოფლიო გრამობით ეძებს ასეთ ეკოლოგიურად სუფთა მინერალებს, როცა ჩვენ ასეული ტონობით შეგვიძლია მისი მოპოვება ისე, რომ არ დავაზიანოთ არსებული ეკოსისტემა. თუ არ შეიძლება იქედან ტორფის ამოღება, ესეც მეცნიერულად უნდა იქნას შესწავლილი და დასაბუთებული, რაც გამორიცხავს ამ საკითხით გაჩენილ გაურკვევლობას. საერთოდაც, ერთხელ და სამუდამოდ უნდა შედგეს ის კონსენსუსი, რომელიც ყველა მხარეს თავის ფუნქციებს მკაცრად და სამართლიანად განუსაზღვრავს ეროვნული პარკის ტერიტორიაზე და ამით სარგებელიც მეტი იქნება და ადგილობრივი მოსახლეობაც, ფერმერებიც იხეირებენ. გადასახედია ისიც, რომ ჩვენი მუნიციპალიტეტის ტერიტორიების ძალიან დიდი პროცენტული მაჩვენებელი აისახა პარკის საზღვრებში და იქნებ მოხდეს ამის კორექტირება. მოკლედ სამუშაო ძალიან ბევრია და მიხარია, რომ ამ ეტაპზე მიღწეული ეს ცივილური შედეგი, რომელიც მოსახლეობას, უბრალო ადამიანებს აძლევს კანონით მინიჭებულ უფლებას ტერიტორიების ტრადიციული გამოყენების შესახებ მკაცრი გამოყენების ზონაშიც კი, რაც პირდაპირ სამომავლო საქმიანობის ეფექტურობის საწინდარი იქნება უსათუოდ“, – დასძინა ბრიფინგის დასასრულს სოსო კვაჭაძემ.
