ოზურგეთის მუნიციპალიტეტის სოფელ სილაურში, მდინარე სუფსის კალაპოტში კარიერული წარმოების შეჩერებასთან დაკავშირებით, აქცია კვლავ გრძელდება. როგორც უკვე ვწერდით, ადგილობრივები აქ ითხოვდნენ კარიერზე მომუშავე კომპანიის ხელმძღვანელის და გარემოს დაცვის სამინისტროს გურია- აჭარის რეგიონის წარმომადგნელთა მოსვლას.
შპს „ქიუ ემ სის“ წარმომადგენელი კობა ლექვინაძე აქციის მონაწილეებთან მალე მოვიდა.
_ყველაფერი კეთდება კანონის სრული დაცვით. დავიწყოთ იმით, რომ ადრე ვინ რას აკეთებდა, მე ნუ მომაწერთ. მე მოვედი აქ, ერთი თვეც არ არის. მანამდე სხვა მუშაობდა. დღეში ოთხჯერ-ხუთჯერ ამოდიან გარემოს დამცველები, შემაწუხებელია, მეტი რომ არაფერი. ხომ ერკვევით კარგად, სალიცენზიო ტერიტორია იმიტომ არსებობს, რომ იქ მე მაქვს კანონიერი მოპოვების უფლება, ყველაფერი კეთდება კანონის სრული დაცვით, _ უთხრა მან აქციის მონაწილეებს.
გარემოს დამცველმა, ირმა გორდელაძემ მოითხოვა დოკუმენტაცია, რამდენად კანონიერად ხდება ხრეშის ამოღება და ზოგადად კარიერიული წარმოება.
_აუცილებლად უნდა მოხდეს ჩვენი შეხვედრა, თქვენი საბუთები არანაირად არ არის წესრიგში. „ნატა 2000-მა“ თქვენ გაგიფორმათ ხელშეკრულება, რადგან მას ჰქონდა დაყადაღებული ლიცენზიები. აუცილებლად გვჭირდება ის საბუთები, რის საფუძველზე მოგცათ თქვენ ლიცენზია წიაღისეულის სააგენტომ, რადგან ის ქვა-ღორღი, რაც უნდა ამოიღოთ, 270 ათასი ტონა წელიწადში, ამ კალაპოტს არ გააჩნია. 120 მანქანა გადის აქედან დღეში, ამოტომ მიძვრებით ფსკერში, კეთდება აუზები, რომ სასწრაფოდ ჩაიტანოს მდინარემ ნატანი და მაქსიმალურად ამოართვათ ფსკერი. თქვენ მოახდინეთ მდინარის ტრაექტორიის ხელოვნურად შეცვლა, ჩადიხართ დიდ სიღრმეზე და ამას დაგიმტკიცებთ_ უთხრა გორდელაძემ ლექვინაძეს.
_რამდენ მეტრზე ვარ ჩასული?
_ათ მეტრზე ხართ და ამას დაგიმტკიცებთ.
_სამ მეტრზე მეტ სიღრმეზე არ ჩავდივართ. მოდით, დავნაძლევდეთ მაშინ. კოვში არის 6 მეტრიანი, ათ მეტრზე როგორ ჩავალთ?
_ბატონო იაკობ, სამზე მეტი ხომ არის ექვსი? თქვენ ძალიან დააზიანეთ მდინარის ფსკერი, დაგიმტკიცებთ!
_მაშინ დააყენეთ თქვენი წარმომადგენელი. ეს გზა სახელმწიფო მნიშვნელობის გზა არის. კეთდება სახელმწიფო მნიშვნელობის პროექტი. თუ დაზიანდება, გააკეთებს სახელმწიფო, _ კვლავ სახელმწიფო ინტერესები მოიშველია ლექვინაძემ.
აქციის მონაწილეებმა: ნუგზარ გორგაძემ, მიხო ქილიფთარმა, ნარგიზ რიჟამაძემ, გულნარა ფუტკარაძემ და სხვებმა კატეგორიულად მოთხოვეს ლექვინაძეს, მოეტანა დოკუმენტაცია, რამდენად სამართლიანად მოიპოვებენ მდინარის კალაპოტში მასალას.
_ვის იგდებთ თქვენ აბუჩად? ანკესს გადააგდებდი და თევზი მოსული იყო. ახლა სად ნახავ თევზს, ან ყანა სადაა, წაიღო კალაპოტშეცვლილმა და ფსკერგამორთმეულმა მდინარემ მიწაც და საყანეებიც.
აქციის მსვლელობისას ათეულობით სატვირთო მანქანა, ატვირთული თუ დაუტვირთავი მდინარე სუფსის ხიდთან და ასევე კარიერის ამოსასვლელ გზაზე გააჩერეს.
იაკობ ლექვინაძემ არაერთხელ სცადა, ერთმანეთს დათანხმებოდნენ, გასცა დაპირებებიც შესაძლებლობის ფარგლებში, თუმცა აქციის მონაწილეები ამ დრომდე არ თანხმდებიან შემოთავაზებულ პირობებს.
მოსახლეობის მიმართვაზე, დღეს და ხვალ კარიერზე არ შესულიყვნენ და შეეჩერებინათ მუშაობა სათანადო დოკუმენტაციის წარმოდგენამდე, ლექვინაძემ უარი განაცხადა, მუშაობას ვერ შევაჩერებთ და თუ დანაშაულს ჩავდივარ, გპირდებით, პასუხს ვაგებ, აგერ ვარ , არსად გავრბივარო.
აქციის მონაწილეები ამ დრომდე კატეგორიულად ითხოვენ აჭარა-გურიის გარემოს დამცველთა მოსვლას, რომელთაც არაერთხელ დაურეკეს.
_რავა მოვლენ, დინამიტს აფეთქებენო , რომ დაურეკო ან „კაჭკითთ“ სილა მიაქვს ვიღაცას სუფსის სანაპიროდანო, იმ წუთს დაგვაცხრებიან და დაგვაჯარიმებენ. ახლა რატომ ითრევენ ფეხს? მარა არ მოესვლებათ აქ. მოდიან და ამოწმებენ, ვითომ, კარიერს. მაგფერი „ექსპერტობით“ რო გამოირჩეოდნენ, იმიტომა არის რვა კაცი დაჭერილი მაგ გარემოს დაცვიდან. მაგარ საქმეს აკეთებდნენ ერთად. ხალხის მოსატყუებლად ყველა მაგარია, _ ბრაზობენ აქციის მონაწილეები, თუმცა მოპატიჟებული გარემოს დამცველები ამ დრომდე არ ჩანან.
„გურიანიუსი“ მოგვიანებით კვლავ შემოგთავაზებთ ინფორმაციას აქ არსებული ვითარების შესახებ.
