„სილქნეტმა“ „ჯეოსელი“ იყიდა_ამის შესახებ დღეს სილქნეტის დამფუძნებელი კომპანიის ,,სილქ როუდ ჯგუფის“ სამეთვალყურეო საბჭოს თავმჯდომარემ, გიორგი რამიშვილმა განაცხადა.
როგორც ცნობილია, კომპანიის გასხვისება საერთაშორისო ტენდერის საშუალებით განხორციელდა, სადაც უცხოური კომპანიებიც მონაწილეობდნენ.
ტენდერი 7 თვეს გაგრძელდა, გამარჯვება კი ,,სილქნეტმა“ შეძლო.
კომპანიამ „ჯეოსელი“ ,,Telia Company”-სგან თიბისი ბანკის და საქართველოს საბანკო კონსორციუმის კრედიტით,153 მლნ აშშ დოლარად შეიძინა.
„ხელი მოვაწერეთ ყიდვა-გაყიდვის ხელშეკრულებას ,,Telia Company”-თან. ძალიან რთული და ძნელი 7 თვიანი ტენდერის ჩატარების შემდეგ, ამისთვის იყო ძალიან დიდი ბრძოლა, მაგრამ გავიმარჯვეთ, ქართულმა ჯგუფმა, ქართული საბანკო კონსორციუმის და ,,თიბისი“ ბანკთან ერთად, რაც ჩვენთვის ძალიან მნიშვნელოვანია. სწორედ ამ სინერგიამ, ამ მნიშვნელოვანმა ურთიერთთანამშრომლობამ მოახდინა კარგი შედეგი და გამოიწვია ასეთი ეფექტი. სიამაყით შემიძლია ვთქვა, რომ ,,სილქნეტმა“, ,,ჯეოსელი“ შეიძინა“, _ განაცხადა რამიშვილმა.
,,გურია ნიუსის“ კითხვაზე, აღნიშნული გაერთიანებით კომპანია ,,სილქნეტი“ ხომ არ გახდება ბაზარზე მონოპოლისტი, ,,სილქ როუდ ჯგუფის“ სამეთვალყურეო საბჭოს თავმჯდომარემ უპასუხა, რომ ეს არ მოხდება.
,,თუ ვინმე ფიქრობს, რომ „სილქნეტი“ ამით მონოპოლისტი ხდება, ეს მცდარი მოსაზრებაა, რადგან ამ ტრანზაქციის შედეგად, არც მობილური კომპანიების რიცხვი და არც ფიქსირებული კომპანიების რიცხვი არ შეცვლილა. უკვე მოხდა პრეცედენტი, როცა „მაგთმა“ შეიძინა ,,კავკასუსი“ და ,,დელტა“ და ერთი კონვენგეტური ოპერატორი წარმოიქმნა მარკეტზე პირიქით ზუსტად ამის საპირწონედ, ,,სილქნეტის“ და ,,ჯეოსელის“ შერწყმა გამოიწვევს ძალიან კარგ ბალანს. წინააღმდეგ შემთხვევაში, იქნებოდა ერთი კომპანია, რომელსაც ექნებოდა ყველაფერი, ყველანაირი პროდუქტი, დანარჩენი კი იქნებოდა ცალკ-ცალკე. ამ შემთხვევაში კი იქნება ბალანსი. ორი ძლიერი კომპანია იქნებ ბაზარზე, რომელიც შეძლებს ძალიან ჯანმრთელ კონკურენციას, იმისათვის, რომ გააკეთოს და შესთავაზოს ქართველ აბონენტებს საუკეთესო პროდუქტი. ორივე კომპანია იქნება, ძალიან ძლიერი და ძალიან ნოვატორული“, _ განმარტა რამიშვილმა.
მან, ასევე, აღნიშნა, რომ არის მესამე მობილური ოპერატორი, რომელიც ძალიან დაბალ ფასებს სთავაზობს აბონენტებს, რაც ნიშნავს, რომ ვერავინ გაზრდის ფასებს და ისეთი მზარდი ფასების ზრდა არ იქნება მოსალოდნელი, რომ ქართველი აბონენტებისთვის, ეს იყო პრობლემატური.
საკომუნიკაციო ეროვნული კომისიის ბაზრის რეგულირების დეპარტამენტის ხელმძღვანელის, დავით გოგიჩაიშვილის განცხადებით, კომისია დიდი ხანია აკვირდება აღნიშნულ გარიგებას და მიმართვის შემთხვევაში ბაზრის შესაბამის სეგმენტზე საჯარო ადმინისტრაციულ წარმოებას დაიწყებს.
,,მიუხედავად იმისა, რომ ჯერ მხარეებს, კომისიისთვის ოფიციალურად არ მიუმართავთ, წინასწარი თანხმობის მოპოვების მიზნით, კომისია დიდი ხანია უკვე, საქმის კურსშია, აკვირდება ამ გარიგებას. ოფიციალურად მომართვის შემთხვევაში კომისია დაიწყებს ბაზრის შესაბამის სეგმენტზე საჯარო ადმინისტრაციულ წარმოებას კვლევისა და ანალიზის მიზნით. დაადგენს ექნება თუ არა ამ ტრანზაქციას გავლენა იმ მომსახურებებზე, რასაც საქმიანობს ცალკ-ცალკე ,,სილქნეტი“ და ,,ჯეოსელი“ და ექნება თუ არა გავლენა კონკურენციაზე. ამის შემდეგ კომისია მიიღებს კანონით დადგენილ გადაწყვეტილებას თანხმობაზე ან თანხმობას სპეციფიკურ ვალდებულებებზე, რომელიც კანონით არის განსაზღვრული. ეს არის:_ დაშვებადობის ვალდებულება, სატარიფო ვალდებულება, დისკრიმინაციის აკრძალვის ვალდებულება, სუბსიდირების ვალდებულება, რომელიც შეიძლება დაეკისროს მხარეებს“, _ განმარტა გოგიჩაიშვილმა.
მან, ასევე აღნიშნა, რომ კომისიის გადაწყვეტილების მისაღებად განსაზღვრულია 3 თვიანი ვადა, თუმცა ეს არის 2-ფაზიანი. 15 დღის განმავლობაში უნდა დაიწყოს წარმოება ან პირდაპირ გასცეს თანხმობა, ხოლო ამის შემდეგ, აითვლება სამი თვე და დაინიშნება საჯარო მოსმენები და განხილვები. განხილვების შედეგად კი კომისია მიიღებს გადაწყვეტილებას.
აღნიშნული კომპანიების შერწყმით, ხომ არ წარმოიშობა ოლიგოპოლიის ან ,,მაგთიკომთან“ კარტერულ გარიგებაში შესვლის საშიშროება.? _ აღნიშნული კითხვით ,,გურია ნიუსმა“ ბაზრის რეგულირების დეპარტამენტის ხელმძღვანელს მიმართა.
,,აქ მონოპოლიას ადგილი არ ექნება, იმიტომ რომ „მაგთიკომი“ უკვე ფლობს ასეთ ქსელს, ფიქსირებულს და მობილურ ქსელს, ორივეს ერთად. შეიძლება გაჩნდეს ოლიგოპოლიური სიტუაცია, თუმცა მომხმარებლისთვის არ არის საზიანო და სახიფათო. ოლიგოპოლიური სიტუაციის შემთხვევაში მომხარებელს შეუძლია იგივე სარგებელი მიიღოს მომწოდებლისგან, როგორსაც მიიღებდა სრულყოფილი კონკურენციის პირობებში. მინდა აღვნიშნო რომ, როცა ორი კომპანია ერთმანეთს ეჯიბრება ფასებში და მოცულობაში, შესაძლებელია მივიღოთ კონკურენცია. რაც შეეხება გარიგებას, ასე ბევრი რამის დაშვება შეიძლება. ეს აქამდეც შეიძლება მომხდარიყო, ამ ტრანზაქციაზე, ამას გავლენა არ აქვს, შეთანხმება მანამდეც შეიძლებოდა და ყოველთვის შეიძლება შეთანხმება“, _ განმარტა გოგიჩაიშვილმა.
თიბისი ბანკი და რეგიონის საბანკო კონსორციუმი, „სილქნეტის“ მიერ ,,ჯეოსელის“ ყიდვას, 120 მილიონი დოლარის დაფინანსებით უზრუნველყოფს, აქედან თიბისი ბანკი 75 მილიონი დოლარით, რეგიონის საბანკო კონსორციუმი კი 45 მილიონი დოლარით.
