ჩვენ უკვე ვწერდით, რომ სოციალურ ქსელში ჩოხატაურელმა კობა ნინიძემ პოსტი გამოაქვეყნა _ “ცენტრალური საათი ერთ მხარეს მოსკოვის დროს აჩვენებს და მეორე მხარეს _ ევროპის. შესული ვართ უკვე ნატოში”, _ დაწერა ნინიძემ და ჩოხატაურის ცენტრში, ერთ-ერთ შენობაზე განთავსებული კედლის საათის ფოტოც გამოაქვეყნა.
ამ ერთი შეხედვით უწყინარმა პოსტმა ჩოხატაურის საკრებულოს თავმჯდომარის ირაკლი კუჭავას გაღიზიანება გამოიწვია.
“როცა 2018 წელს ამ საათებს ვამონტაჟებდით, ცნობილი გურული ჰანგებით, მაშინ არ გამოუდიათ თავი “ჩოხატაურის კეთილისმსურველებს”… საქილიკო რაა? 4 წლის განმავლობაში ერთხელ მექანიზმმა “აურია”… მალე გამოსწორდება, ეშველება… ეს არაა პრობლემა. პრობლემა ცინიზმი და ქილიკი უფრო მგონია, რომელსაც ეშველება?” _ დაწერა კუჭავამ პასუხად.
კუჭავასგან განსხვავებით ზემოთ ნახსენებმა პოსტმა გურულთა ერთი ნაწილი გაამხიარულა კიდეც: “მგონი, ნამდვილად არაა სანერვიულო. უბრალოდ, ნამდვილი გურული იუმორია! ამის მეტი არ დაეშავებინოს ჩვენს ხელისუფლებას და მაი აფერი. კი გაგვამხიარულა მაგ ნინიძემ ამ მოწყენილობისას, როცა რუსეთ-უკრაინის ომია და მთელი ფეისბუქი კიდევ ერთმანეთის დაჭმაზეა გადასული. მართლა კაი იუმორია.
ასეთი იუმორით ნათქვამზე ამდენი სერიოზულობა როგორ შეიძლება?! იუმორზე ვიცინით, თორემ, ეგ უბრალო საათი კი არა, რამდენიმე ათასდოლარიანი საათი ჩერდება ხანდახან, რა მოხდა მერე? ისე კი მსოფლიო იქით მიდის, ხვალ ცოცხალს დაგვტოვებენ თუ არა, ვინ იცის და გავიცინოთ, ძამა, ჯობია იუმორზე, დამიჯერეთ!
თქვენც გაიღიმეთ, თუ თქვენ გეხებათ მაგ საათის პრობლემები. ამ დაქცეულ ქვეყანაში მაგისთვის არავინ დაგიჭერთ, დამეჯერება კონტროლის პალატის ყოფილ რევიზორს”, _ რჩევას აძლევს ირაკლი კუჭავას ფეისბუქმომხმარებელი ია ჩხაიძე.
კუჭავას განსხვავებული აზრის მიღებას ურჩევს მარიამ ნინიძე: “ბატონო ირაკლი, იუმორი გამოხატვის თავისუფლებაა, რომელიც ყველა დემოკრატიულ სახელმწიფოში მცხოვრები ადამიანის უფლებაა. საბჭოთა კავშირში დიდი ხანია, აღარ ვართ, სადაც ცენზურა ედო ყველაფერს და აზრკრიმინალები თითოეულ სიტყვას აკონტროლებდნენ. არავის აქვს უფლება, თავისუფალ მსოფლიოში ადამიანს აზრის გამოხატვა შეუზღუდოს _ არც ჩინოვნიკს და არც _ უჩინოს.
მესმის, რომ წინა თაობის ადამიანებს გიჭირთ პიროვნული თავისუფლების იდეის მიღება, რადგან საბჭოეთი მენტალობიდან ჯერ არ გამოსულა, მაგრამ განსხვავებული აზრის მიღება უნდა ვისწავლოთ. სარკაზმსა და ირონიას, რაც გურულებს ოდითგანვე მოგვდგამს, იუმორითვე ვუპასუხოთ და არა აგრესიით”.
ირაკლი კუჭავა კი წერს, რომ ვერც იუმორით ნათქვამს ვერ მიიღებს(?!), თუ ის ჩოხატაურს “საღადაო” თემად აქცევს.
“იუმორით, თუნდაც ხალასით, ჩემი მუნიციპალიტეტის “საღადაო” ობიექტად ქცევა არ მომწონს, არასდროს შევგუებულვარ და არც მომავალში შევეგუები… კრიტიკა მიმიღია და მომავალშიც მივიღებ.
ეს არაა აგრესია, ესაა იმ ადამიანის პასუხი, რომელსაც ბევრი აქვს ნაფიქრი კონკრეტულად ამ თემაზე, ნაშრომიც, სხვათა შორის, თანამოაზრეებთან ერთად, მელოდიის შერჩევიდან დაწყებული საათების ოსტატის მოძიებით დამთავრებული. აქედან გამომდინარე, მე მაქვს ჩემი მოსაზრების გამოთქმის უფლება და მეტიც, ვალდებულებაც”.
ხარვეზი მალევე აღმოიფხვრა. ამის შესახებ კუჭავამ ისევ სოციალურ ქსელში დაწერა.
“ჩოხატაურის “ბიგ-ბენი” ზუსტ დროს აჩვენებს… ხარვეზი გამოსწორებულია…” _ დაწერა ბატონმა კუჭავამ.
