ოზურგეთის მუნიციპალიტეტში არსებული სკოლების ხელმძღვანელებმა, საგანმანათლებლო რესურსცენტრში უკვე წარადგინეს ინდივიდუალური გეგმები.
საზოგადოების მხრიდან დიდია ინტერესი, თუ როგორ აპირებენ სკოლები სასწავლო წლის წარმართვას, როგორ უნდა იქნეს დაცული დისტანცია, დისტანცირებული სწავლება შეეხება თუ არა ყველა კლასს (განსაკუთებით დაწყებით კლასებს), გადავლენ თუ არა სკოლები ორცვლიან სწავლაზე და თუ ასე იქნება, ერთსა და იმავე კლასთან მომუშავე მასწავლებლებს როგორი ანაზღაურება ექნებათ? კლასებში, რომელშიც ოცდაათ ბავშვზე მეტი ირიცხება, დისტანციური აუცილებლობის პირობებში, როგორ დაიცავენ დისტანციას? მოხერხდება თუ არა ჰიგიენური პირობების სათანადო დონეზე დაცვას? _ ეს და კიდევ უამრავი კითხვა დაგროვდა, რომლებზეც პასუხებს პედაგოგები, მშობლები თუ მოსწავლეები დიდი ინტერესით მოელიან.
ჩვენი ახალგაზრდული გაზეთი ოზურგეთის საგანმანათლებლო რესურსცენტრის უფროსს, ლელა იმედაშვილს ესაუბრა.
როგორც იმედაშვილმა აღნიშნა, რამდენიმე დღეში იწყებენ ყველა სკოლასთან რეგულაციებზე შეთანხმებას.
_ ახალი სასწავლო წელი ჩვენთან, ოზურგეთში, ყველა სკოლაში დაიწყება 15 სექტემბერს. გათვალისწინებული იქნება ჯანდაცვის რეკომენდაციები. სექტემბრის დასაწყისისთვის ყველა სკოლა ჩამოყალიბებული იქნება თავის წესებზე. ისინი ინდივიდუალურად იღებენ გადაწყვეტილებებს. რაც შეეხება დისტანციურ სწავლებას, ეს არ შეეხება არანაირად დაწყებით, I-IV კლასებს. ზედა კლასებში კვირაში ორი დღის გამოყენების უფლება ექნებათ. ესეც დამოკიდებულია სკოლებზე, გამოიყენებენ თუ არა… ახლა ვართ 24-საათიან შრომაში იმისთვის, რომ სკოლებთან ერთად შევქმნათ მათზე მორგებული რეჟიმი. რაც მთავარია, ჯანდაცვის სამინისტროს მხრიდან რა წესებიც არის განსაზღვრული, ჩვენ მიერ ყველა იქნება დაცული, _ გვითხრა იმედაშვილმა.
თუ როგორ აპირებენ რეგულაციების მიხედვით მუშაობას სკოლების დირექტორები, პედაგოგები, რა აზრი აქვთ მათ, ჩვენ ამის შესახებ ვესაუბრეთ არაერთ მათგანს.
ოზურგეთის მეორე საჯარო სკოლის დირექტორმა ფატი სიორიძემ, ძირითადად, ისაუბრა სასწავლო პროცესის წარმართვის ნიუანსებზე, როცა მთავარი მოსწავლე, მასწავლებელი და სწავლის პროცესია:
_ ჩვენ სწავლას ვიწყებთ ორ ცვლაში, სხვანაირად არც მოხერხდება. იქნება, ასე ვთქვათ, შეჭრილი დრო სწავლის დაწყებისა: პირველ-მეოთხე კლასში ვიწყებთ ცხრა საათზე, მეშვიდე-მერვე-მეცხრე კლასებში ცხრა საათსა და ოცდაათ წუთზე, დღის პირველ საათზე ვიწყებთ მეორე-მესამე კლასში, ხოლო 14 საათზე მეათე, მეთერთმეტე და მეთორმეტე კლასებში. რაც შეეხება ონლაინსწავლებას, მხოლოდ სამშაბათს და ხუთშაბათს იქნება, ხოლო დანარჩენ დღეებში _ ორშაბათს, ოთხშაბათს და პარასკევს ჩვეულებრივად, სკოლაში ისწავლიან. ონლაინ სწავლების დღეებში, მასწავლებლები ჩვეულებრივად შევლენ საკლასო ოთახებში და ჩაატარებენ გაკვეთილებს მოსწავლეებთან ონლაინ კავშირით. გაკვეთილების ჩაწერა მოხდება გადაცემული მასალების მიხედვით. რაც შეეხება ცვლების მიხედვით პედაგოგთა ანაზღაურების წესს, აქ არაფერი იცვლება. მასწავლებლებს დამატებითი საათების ჩატარება არ მოუწევთ და შესაბამისად, არც ხელფასი გაეზრდებათ. მხოლოდ დროში გადაადგილება ხდება და ეს მე მგონი, ადვილი გასაგებია.
დისტანციის დაცვას რაც შეეხება _ ერთმეტრიანი მანძილით იქნება ყველა საკლასო ოთახში მერხების დაშორება. სკოლაში შემოსასვლელი ორივე მხრიდან მოხდება შემოსვლა, თერმოსკრინინგის გავლით. 37 გრადუსზე მეტი ტემპერატურა თუ ექნება მოსწავლეს, რომელიც ვერცხლისწყლიანი თერმომეტრით გადამოწმდება, გამოვიძახებთ მშობელს და ჩავაბარებთ ბავშვს. მშობელთა შემოსვლა, ზოგადად, არ იქნება დასაშვები. სწავლის დაწყებამდე ჩვენ ვაპირებთ მშობელთა კრების ჩატარებას ღია სივრცეში და მივაწოდებთ სრულ ინფორმაციას, როგორ უნდა იმოქმედონ. ყველა კლასს მივაწოდებთ ცხრილს, სადაც მითითებული იქნება გაკვეთილის დაწყების და დამთავრების დრო. ჰიგიენას რაც შეეხება, საკლასო ოთახები და დერეფნები უზრუნველყოფილი იქნება თავდახურული, ფეხის “პედლიანი ” სანაგვე ურნებით. ასევე, აღჭურვილი იქნება საკლასო ოთახები სადეზინფექციო საშუალებებით. მაქსიმალურად მოწესრიგებული გვაქვს სველი წერტილები, სადაც გვექნება თხევადი საპონი, შესამშრალებელი ტილოები, ჰიგიენური ქაღალდი… საკლასო ოთახებში არ იმოძრავებენ ბავშვები. მხოლოდ დასვენებაზე გამოვლენ დერეფანში. ცვლის შუალედში ჩატარდება ოთახების დეზინფექცია, _ გვითხრა ფატი სიორიძემ.
პედაგოგი ეკა დარჩია, რომელიც ოზურგეთის მეოთხე საჯარო სკოლის დაწყებით კლასებში ასწავლის ამბობს, რომ ადვილი არ იქნება რეგულაციების დაცვა და სწავლების განსხვავებულ რეჟიმზე გადასვლა:
_ ახალი სასწავლო წელი, ახალი წელივით მღელვარე და ფერადია. შემოქმედებითობის ჟამია. მასწავლებელს ყოველთვის ენატრება სკოლა და ბავშვები. ადვილი არაა ჯანდაცვის მიერ მოწოდებული რეგულაციების შესრულება. დაწყებით კლასებში ბავშვებთან კომუნიკაცია ერთ-ერთი მნიშვნელოვანი ფაქტორია. წელს პირველ კლასს ვიღებ. პირველი კომუნიკაცია ახლა უმნიშვნელოვანესია. მშობლებს სურთ, მეტად დაინახონ შვილების პირველი აქტივობები. წელს ეს გამორიცხულია. მადარდებს რესურსების საკითხი. ჩემ მიერ დამზადებული რესურსებით, ძალიან ადვილად, თამაშით სწავლობენ ბავშვები… რეგულაციების მიხედვით, ეს რესურსი უკვე ინფექციის წყაროა. ამის გარეშე კი ჩემთვის გაკვეთილი წარმოუდგენელია. თითქმის, მთელი ზაფხულის მანძილზე ვქმნიდი ხოლმე რესურსებს ჩემი პატარებისთვის… ახლა ყველა გზა უნდა ვიპოვოთ ჩვენც და მშობლებმაც, რომ დავიცვათ ჯანდაცვის მიერ მოწოდებული რეგულაციები. სხვა გზა არ არის. რთულია, როცა ხუთ წუთში უნდა მოასწრო ოთახის დეზინფექცია, როცა საკლასო ოთახებში, არსებული კლასების რაოდენობის განთავსება შეუძლებელია, სად წავიდეს ის ნორმით გათვალისწინებულზე მეტი ბავშვი? ძნელია, აკონტროლო, ვინ მოვიდეს ხვალ და ვინ არა… თუმცა, უნდა შევძლოთ მაქსიმუმის კეთება, სხვა გზა არ არის, _ გვეუბნება ეკა დარჩია და იმედოვნებს, რომ სკოლის ხელმძღვანელობასთან და მშობლებთან ერთად, საუკეთესო გამოსავალს იპოვის.
ოზურგეთის მეოთხე საჯარო სკოლის დირექტორი ტარიელ კალანდაძე თავისებური განცდით აღნიშნავს, რომ ახალ სასწავლო წელს, ჯერჯერობით, მაინც, სკოლაში ზარი აღარ დაირეკება. _ “სკოლა ზარის და შეფასების გარეშე, გარკვეული დროით გვექნება, ალბათ, თუმცა, რას ვიზამთ. დროებით უნდა შევეგუოთ”, _ გვეუბნება ის და გვიამბობს თავისი სკოლის რეგულაციებზე:
_ სწავლას ვიწყებთ 15 სექტემბერს და რეგულაციების შესაბამისად, გადავდივართ პირდაპირ ორცვლიან რეჟიმზე. საკლასო ოთახებში ერთი მეტრის დაშორებით განთავსდება მერხები. პირველ-მეოთხე კლასებში 30-წუთიანი გაკვეთილები გვექნება. მეშვიდე-მეთორმეტე კლასებში კი, 40-წუთიანი. ზარი არ დაირეკება, რადგან დისტანცია უნდა დავიცვათ. სხვადასხვა კლასში, სწავლის დაწყება და დასვენება იქნება სხვადასხვა დროს. ცხადია, ბავშვებს ჩაუტარდებათ საუბარი, ეცოდინებათ, როდის გავიდნენ დერეფანში, სადაც, ასევე, დისტანცია მაქსიმალურად უნდა იქნეს დაცული. ასევე, გამოყოფილი იქნება იზოლირებული ოთახი, სადაც იმ შემთხვევაში, თუ 37 გრადუსზე ზემოთ აღმოაჩნდება ტემპერატურა, ბავშვი უნდა განთავსდეს და გამოვიძახებთ მშობელს.
_ თუ მშობელმა ვერ შეძლო მოსვლა, ამ დროს რას აკეთებს სკოლა?
_ თუ მშობელი არ გამოცხადდა გონივრულ ვადაში, მაშინ 112-ში ვრეკავთ, უსაფრთხოების ცენტრში და ის გადაიყვანს.
_ ბატონო ტარიელ, შემცირდება თუ არა არაფორმალური ღონისძიებები? მაგალითად, იმუშავებს თუ არა ცეკვის წრე, სპორტული ღონისძიებები თუ გაიმართება?
_ ეს ყველაფერი იქნება შეზღუდული ფორმით. შეუზღუდავად იმუშავებს კვების ბლოკი იმ მიმართულებით, რომ ბავშვებს ერთმეტრიანი დისტანციის დაცვით, მიეწოდებათ საკვები. ან კონტეინერებით ჩამოატარებენ საკლასო ოთახებში სხვადასხვა დასახელების პროდუქტს.
კითხვაზე _ თუ როგორ შეფასდებიან მოსწავლეები, ტარიელ კალანდაძე ამბობს, რომ გარკვეული დროით გადავლენ უნიშნო, განმავითარებელ შეფასებაზე.
_ ეს მოხდება ასეთი პრინციპით _ განმსაზღვრელი ქულა მოსწავლეს დაეწერება მხოლოდ კომპლექსურ შემაჯამებელ შეფასებაში. ეროვნულ სასწავლო გეგმაში მოცემულია თემატური ბლოკები. რამდენი თემატური ბლოკიცაა, იმდენი კომპლექსური შემაჯამებელი დავალება ქნება მოსწავლეს და იქ დაეწერება საბოლოოდ განმსაზღვრელი შეფასება. ეს შეფასება, შესაძლოა, თვეში ერთხელ, ორჯერ ან სამჯერ მოხდეს, საგნის სპეციფიკიდან გამომდინარე.
_ რა შემთხვევაში შეიძლება არ გაიკეთოს მასწავლებელმა პირბადე?
_ თუ შეძლებს ერთმეტრიანი დისტანციის დაცვას, კი, ბატონო, შესაძლებელია არ ეკეთოს, თუ არადა, უნდა გაიკეთოს. დისტანცია კი, როგორც რეგულაციები გვავალებს, უპირველესად უნდა იქნეს დაცული. კლასები, სადაც 30 ან მეტი ბავშვია, გაიყოფა და მონაცვლეობის პრინციპით ჩაუტარდებათ გაკვეთილი თუმცა, ბევრი არ იქნება ასეთი კლასი.
_ რას აკეთებს სკოლის დირექტორი ასე გამკაცრებული რეგულაციების პირობებში?
_ სკოლის დირექტორი სკოლაში ქმნის უსაფრთხო გარემოს. ეს გულისხმობს როგორც ემოციურ, ისე ფიზიკურ მდგომარეობას. ბავშვი არ უნდა იყოს დათრგუნული არანაირად. ფიზიკურს რაც შეეხება, განლაგება და ჰიგიენა მაქსიმალურად მოწესრიგებული უნდა იქნეს. სახელმწიფო გვაძლევს ჰიგიენურ საშუალებებს, ასევე გარკვეული დასახელების საშუალებებს, ქაღალდს თუ თხევად საპონს შეიძენს სკოლა. ზოგადად, ჰიგიენის წესების მკაცრი განსაზღვრა და დაცვა განაპირობებს სრულიად რეგულაციის არსს.
