ოზურგეთის მუნიციპალიტეტის სოფელ ლიხაურში საპროტესტო აქციები გრძელდება. მოსახლეობა ინდმეწარმეებს და ფიზიკურ პირებს, რომლებსაც მდინარე აჭზე ინერტული მასალის მოპოვებაზე ლიცენზია აქვთ, მუშაობას არ ანებებენ.
“ეს გაგრძელდება მანამდე, სანამდე არ მოხდება ამ ხალხის გაძევება ლიხაურიდან. ყველას მოვუწოდებთ, რომ დაინტერესდნენ, დეტალურად რა ხდება მდინარეზე“, _ აცხადებს სოფელ ლიხაურის მკვიდრი.
“გურია ნიუსი“ დღეს, დღის მეორე ნახევარში იმყოფებოდა. ამ პერიოდში მოსახლეობა მდინარე აჭის სანაპიროებზე არ იყვნენ. ადგილზე გარემოსდაცვითი ზედამხვედელობის დეპარტამენტის აჭარისა და გურიის რეგიონის წარმომადგენლები იმყოფებოდნენ, რომლებმაც ჩვენთან საუბარი არ ისურვეს. მხოლოდ ის გვითხრეს, რომ სწავლობენ მდინარე აჭის ხეობაში კარიერების საკითხს.
დღევანდელ გამართულ აქციაზე ოზურგეთის დეპუტატის არჩილ თალაკვაძის ბიუროს წარმომადგენელი ლაშა ჭელიძე იმყოფებოდა. მოგვიანებით, არჩილ თალაკვაძემ სოციალურ ქსელში თავისი მოსაზრება გაავრცელა.
“მინდა გამოვეხმაურო ოზურგეთში, სოფელ ლიხაურში, მდინარე აჭისწყლის ხეობაში ინერტული მასალის, ქვიშა-ხრეშის მოპოვების შედეგად წარმოშობილ პრობლემას, რაზეც სოფლად მცხოვრებმა საზოგადოებამ მომმართა.
გავეცანი დოკუმენტაციას, მქონდა კომუნიკაცია მთავრობასთან, წიაღის ეროვნული სააგენტოც პირველივე შეტყობინებისთანავე ჩართულია და ადგილზე არსებულ მდგომარეობაზეც მივიღე ინფორმაცია.
რამდენადაც შემეძლო, შევისწავლე საკითხი და მიმაჩნია, რომ სოფლის მცხოვრებთა პროტესტი სამართლიანია. ინერტული მასალის მოპოვების პროცესში არის არაერთი დარღვევა. მაღალი ალბათობით ზიანი ადგება გარემოს, მდინარე აჭისწყლის უნიკალურ ხეობას და ეკოსისტემას. ასევე, დადგენილი პრაქტიკით, ინერტული მასალის მოპოვებისთვის ადგილობრივი მოსახლეობის თანხმობა საჭიროა, რაზეც მუნიციპალიტეტს საკუთარი პოზიცია დაფიქსირებული უნდა ჰქონდეს.
მივმართავ ეკონომიკისა და მდგრადი განვითარების სამინისტროს ასევე, გარემოს დაცვისა და სოფლის მეურნეობის სამინისტროს მიიღონ შესაბამისი ზომები და კანონმდებლობით დადგენილი წესით შეაჩერონ მდინარე აჭისწყლის ხეობაში ქვიშა-ხრეშის მოპოვების პროცესი, ვინაიდან იკვეთება ამის ლეგიტიმური, სამართლებრივი საფუძველი. ასევე, მიიღონ შესაბამისი ზომები ადგილზე, გარემოსადმი მიყენებული შესაძლო ზიანის გამოსწორების მიზნით.
მოსახლეობის სახელით, ვთხოვ, ლიცენზიის მფლობელ მეწარმეებს გაითვალისწინონ ადგილზე შექმნილი ვითარება და გარემოს დაცვის ინტერესი“, _ წერს თალაკვაძე.
