104 წლის ასაკში გარდაიცვალა ცნობილი ამერიკელი მსახიობი, რეჟისორი და პროდიუსერი კირკ დუგლასი _ მისი სიკვდილის შესახებ განცხადება მსახიობის შვილმა მაიკლ დუგლასმა გააკეთა.
კირკ დუგლასი დაიბადა 1916 წელს რუსეთის იმპერიიდან აშშ-ში ემიგრირებულ ოჯახში.
მისი მშობლები ღარიბები იყვნენ და კირკი იძულებული იყო კოლეჯში სწავლის ფული რომ ეშოვნა, პარალელურა ემუშავა.
სწორედ მაშინ მოიფიქრა მან მყვირალა ფსევდონიმი _ კირკ დუგლასი, მისი ნამდვილი სახელი კი ისერ დანიელოვიჩი იყო.
კოლეჯის დამთავრების შემდეგ მან დრამატული ხელოვნების პრესტიჟულ აკადემიაში ჩააბარა. დუგლასმა აკადემიაში თავი კარგი სწავლით გამოიჩინა და სტიპენდიაც დაიმსახურა, რაც დიდი შეღავათი იყო ღარიბი ოჯახისთვის.
იგი, მეორე მსოფლიო ომის დროს წყნარი ოკეანის ამერიკულ ფლოტში მსახურობდა, სადაც დაიჭრა და აშშ-ში დაბრუნდა. ამის შემდეგ დუგლასმა სამსახიობო კარიერა დაიწყო _ თამაშობდა ბროდვეის თეატრებში, იღებდნენ რეკლამებში.
კირკი ჰოლივუდში მისი კლასელი _ ლორენ ბეკოლის დახმარებით მოხვდა. თავიდან მეორე და მესამე ხარისხოვან როლებში იღებდნენ, დროთა განმავლობაში კი იგი, ძირითადად, მისი დამახასიათებელი ნიკაპის გამო, მთავარ როლებშიც მიიწვიეს.
იმ დროს კომუნიზმთან ბრძოლა ჰოლივუდის მთავარი მისია იყო და დუგლასს მისი რუსული წარმოშობა კარიერაში ხელს უშლიდა, თუმცა, მან შეუძლებელი შეძლო _ 1949 წლიდან 1961 წლამდე 28 ფილმში ითამაშა და წარდგენილი იყო ოსკარის სამ ნომინაციაზე საუკეთესო მსახიობის როლის შესრულებისთვის: „ჩემპიონი“, „ბოროტები და ლამაზები“ და ფილმი ვან გოგზე _ „სიცოცხლის წყურვილი“.
ყველაზე ცნობილი ფილმი, რომელშიც დუგლასმა მთავარი როლი შეასრულა, „სპარტაკი“ იყო. დიდებული რომის იმპერიის წინააღმდეგ ამბოხებული გლადიატორის როლის შესრულება იოლი არ იყო, თუმცა, დუგლასმა თავი გამოიჩინა, როგორც წარმატებულმა პროდიუსერმა _ სწორედ მან მიაღწია იმას, რომ ფილმის რეჟისორად ჯერ კიდევ ახალგაზრდა სტენლი კუბრიკი დაინიშნა. დუგლასმა ისიც მოახერხა, რომ გადასაღებ მოედანზე ერთად შეკრიბა მაშინდელი ვარსკვლავები, საკმაოდ პრეტენზიული მსახიობები _ ლოურენს ოლივიე, ჩარლზ ლოუტონი და პიტერ უსტინოვი, რომლებთანაც მან, ყველასთვის გასაკვირად, მოახერხა საერთო ენის გამონახვა.
დუგლასის, როგორც პროდიუსერის, მთავარი დამსახურება იყო ის, რომ მან მოახერხა, ფილმის ტიტრებში მოხსენიებული ყოფილიყო სცენარის ავტორი, ჰოლივუდის „შავ სიაში“ მყოფი დალტონ ტრამბო. ამერიკის კინოინდუსტრიისთვის ეს იყო იმის სიმბოლო, რომ მაკარტიზმის ეპოქა დასასრულისკენ მიდიოდა. „ამ გადაწყვეტილებით მე ყველაზე მეტად ვამაყობ!“ _ უთხრა დუგლსმა he New York Times-ს.
1960 წლებში დუგლასი ბროდვეიზე დაბრუნდა და ითამაშა სპექტაკლში „ვიღაცამ გუგულის ბუდეს გადაუფრინა“. 1970 წელს იგი ძალიან გაბრაზდა, რო მილოშ ფორმანმა არ მიიწვია ამავე სახელწოდების ფილმში და მიზეზად დაასახელა, რომ დუგლასი საკმაოდ ბებერია _ მსახიობი მაშინ 60 წლის იყო.
კირკ დუგლასი იხსენებს, რომ მაშინ ორმაგი გრძნობა ქონდა _ ფილმის ერთ-ერთი პროდიუსერი მისი შვილი მაიკლი იყო, რომელმაც პირველი ოსკარი აიღო: „ჩემმა სიხარულმა მაიკლის წარმატების გამო გადაფარა ის წყენა, რომელიც მე მქონდა იმის გამო, რომ როლი ვერ მივიღე“.
საინტერესოა, რომ კირკ დუგლასმა მიიღო მხოლოდ დაპატიო ოსკარი _ 1996 წელს, ინსულტის გადატანიდან რამდენიმე თვეში.
2016 წელს, როცა კირკ დუგლასის 100 წლის იუბილე აღინიშნებოდა, სახელგანთქმულმა რეჟისორმა და პროდიუსერმა სტივენ სპილბერგმა მსახიობს სცენიდან, ყველას გასაგონად უთხრა: „მე უამრავ მსახიობთან მიმუშავია, მაგრამ მათ შორის ერთადერთი კინოვარსკვლავი თქვენ ხართ!“
