დღეს, ქართველი მომღერლის, საქართველოს დამსახურებულ არტისტის გოგი დოლიძის დაბადების დღეა. ის 63 წლის გახდებოდა. მომღერალი თამარ ჭოხონელის ჩვენთან საუბრის დროს ამბობს, რომ გოგი დოლიძე სიცოცხლეშივე იქცა ლეგენდად თავისი სიმღერებით და ადამიანობით.
“დღეს საქართველოს აკლია გოგი დოლიძისნაირი ადამიანები. ის, რომ დღეს ცოცხალი ყოფილიყო, მაგალითი იქნებოდა ყველასთვის კაცობის, სიყვარულის, მეგობრობის და სიკეთის. ძალიან დიდი სიყვარულის უნარი ჰქონდა ამ ადამიანს _ პატარასთან პატარა იყო და დიდთან _ დიდი. მე და გოგის შორის ათი წელი იყო სხვაობა, ნამდვილად ვერ ვგრძნობდი ამ სხვაობას. გოგი დოლიძე ყველას მეგობარი იყო. ეს ყველაფერი ისახებოდა მის შემოქმედებაში და მის სიმღერაში. გოგი განუმეორებელი ყოფილა და ვერასდროს განმეორდება. ალბათ, ასე იყო საქართველოსთვის საჭირო ერთხელ მოვლენილიყო გოგი დოლიძე. თუმცა, ვფიქრობ, რომ ის ძალიან ბევრი ადამიანისთვის მაგალითს თუ როგორ უნდა გიყვარდეს ქვეყანა, მეგობარი და ადამიანი“, _ თქვა ჩვენთან სატელეფონო საუბრისას თამარ ჭოხონელიძემ.
გოგი დოლიძის მამა ლეონიდე დოლიძე სოფელ ბახვიდან იყო.
“ლეონიდე დოლიძე სოფელ ბახვში ცხოვრობდა. მინდა გითხრათ, რომ ბავშვობა გოგის ჩვენს სოფელში აქვს გატარებული. ძალიან უხაროდა აქ ჩამოსვლა. ახლახან, სოფელ ბახვში, იმ ქუჩას, სადაც ის ცხოვრობდა, მისი სახელი ეწოდა. ასევე, გვაქვს იდეა, რომ მის კარმიდამოში გაკეთდეს პატარა მუზეუმი ან მემორიალური დაფა. ჩემი მეუღლე და გოგი მეგობრობდნენ. ძალიან ყურადღებიანი, თბილი და კეთილი ადამიანი იყო. რამდენჯერმე უთქვამს, სად არ ვყოფილვარ, მაგრამ ბახვისნაირი ადგილი ჯერ არ შემხვედრიაო“, _ გვითხრა სოფელ ბახვის საჯარო სკოლის დირექტორმა, მზია ვაშალომიძემ.
ინფორმაციისთვის, გოგი დოლიძე 1961–1971 წლებში სწავლობდა თბილისის 24-ე საშუალო სკოლაში, პარალელურად სამუსიკო სასწავლებელში. 1976 წელს დაამთავრა თბილისის ი. ჭავჭავაძის სახელობის უცხო ენათა სახელმწიფო პედაგოგიური ინსტიტუტი ინგლისური ენის სპეციალობით.
მუშაობდა კინოსტუდია ქართულ ფილმში მეთოდისტად.
1979 წლიდან სიცოცხლის ბოლომდე – საქართველოს ტელევიზიის ხალხური შემოქმედების რედაქციაში რედაქტორად, უფროს რედაქტორად, 1989 წლიდან – ამავე რედაქციის განყოფილების გამგედ.
1979–1996 წლებში მუშაობდა საქართველოს ტელერადიო კორპორაციის ხალხური შემოქმედების რედაქციაში. განსაკუთრებული პოპულარობა მოიპოვა 1980–1990 წლებში, როგორც შესანიშნავმა სოლისტმა და პარტნიორმა. 1976–1983 წლებში მღეროდა ფოლკლორულ ანსამბლ „ფაზისში“, 1986 წლიდან კი ანსამბლ „ქართულ ხმებში“. ამ ანსამბლთან ერთად გასტროლებით შემოიარა მრავალი ქვეყანა.
გოგი დოლიძე, ძირითადად, მაინც საესტრადო სიმღერების შემსრულებელია. ამ ჟანრით გატაცება ხალხური სიმღერების მისეულ შესრულებაშიც აისახა და განსაკუთრებული ელფერი შესძინა.
გარდაიცვალა 1996 წლის 8 მარტს. გარდაცვალების შემდეგ, 1999 წელს გოგი დოლიძე მეოცე საუკუნის საუკეთესო ქართველ მომღერალ მამაკაცად დაასახელეს. თბილისში, 24-ე სკოლის წინ, სადაც ის სწავლობდა, დაიდგა მისი ბიუსტი.
