ტელეკომპანია რუსთავი 2-ის ინფორმაციით, ,,ქართულმა ოცნებამ“ საპრეზიდენტო კანდიდატად, შესაძლოა, იუსტიციის ამჟამინდელი მინისტრი თეა წულუკიანი წარადგინოს. ,,გურია ნიუსი“ დაინტერესდა, რას ფიქრობენ ექსპერტები წულუკიანის გაპრეზიდენტებასთან დაკავშირებით და ამ საკითხთან დაკავშირებით პოლიტიკის ექსპერტს რამაზ საყვარელიძეს ვესაუბრეთ.
_ კანდიდატურა შესანიშნავია ბევრი თვალსაზრისით, წულუკიანს სხვადასხვა მიმართულებით აქვს სიღრმისეული კონტაქტები და ამ კონტაქტებს პრეზიდენტის როლში კიდევ უფრო გაამყარებს. ქალი რომ არის, თავისთავად, ესეც დიდი პლიუსია, პოლიტიკურ რიტორიკას კარგად ფლობს, მაგრამ არის ერთი პრობლემა _ მოახერხებს თუ არა იმ დაპირისპირების შემდეგ, რაც ოპონენტებთან ჰქონდა, მიიღოს ხმების ის რაოდენობა, რომელიც გამარჯვებისთვის არის საჭირო. წულუკიანი მკაფიოდ პოლიტიზირებული ფიგურაა. ის მუდამ დგას ,,ქართული ოცნების“ მხარეს, სწორედ ამიტომ, ვისთვისაც მიუღებელია ,,ქართული ოცნება“, მიუღებელი იქნება წულუკიანიც. ეს სირთულე, შესაძლოა, აღმოჩნდეს მის კანდიდატურაში, სხვა მხრივ დადებითი თვისებებით არის შემკული.
_ ბატონო რამაზ, თეა წულუკიანი შეძლებს ღირსეული ოპონირება გაუწიოს ოპოზიციის მიერ დასახელებულ საპრეზიდენტო კანდიდატს?
_ არ არის გამორიცხული საპრეზიდენტო არჩევნებში წინ წამოიწიოს უპარტიო კანდიდატმა. ჩემი აზრით, ოპოზიციის კანდიდატზე უფრო ძლიერი კონკურენტი უპატიო კანდიდატი იქნება და სირთულეც სწორედ ამაშია, პარტიებზე გულაცრუებულმა მოსახლეობამ, შეიძლება, უპირატესობა უპარტიო კანდიდატს მიანიჭოს. ისეთი მკაფიოდ პარტიული ორიენტაციის ადამიანი, როგორიც წულუკიანია, შესაძლოა, სირთულეებს წააწყდეს უპარტიო კანდიდატთან. მეეჭვება, რომ ოპოზიციის კანდიდატურა იყოს სერიოზული პრობლემის შემქმნელი სახელისუფლებო კანდიდატისთვის.
_ ოპოზიცია ერთი საპრეზიდენტო კანდიდატის დასახელების შემთხვევაშიც კი, ვერ მოახერხებს საპრეზიდენტო არჩევნებში მმართველი გუნდის კანდიდატისთვის კონკურენციის გაწევას?
_ ოპოზიციის გაერთიანება რაღაც გაუგებარ ფორმულად იქცა ქართულ სინამდვილეში. გონიათ, თითქოს არჩევნები თოკის გადაწევა იყოს და რაც მეტი ადამიანი გაერთიანდება ერთ მხარეს, მით უფრო ადვილი იქნება გამარჯვება. არჩევნები არ არის თოკის გადაწევა. გაერთიანების შემთხვევაში, შეიძლება, ერთი პარტიის ამომრჩეველმა მეორე მისთვის მიუღებელი პარტიის გამო ხმა არც ერთს მისცეს. შესაძლოა, ხმები დაიკარგოს და არა დაემატოს ერთმანეთს, ამიტომ გაერთიანების იდეა შეიძლება კარგად ჟღერს, მაგრამ შედეგის მხრივ არაფრის მომტანი იქნება, მითუმეტეს, ოპოზიციის ჯამური რეიტინგიც კი ნაკლებია ,,ქართული ოცნების“ საერთო რეიტინგზე.
