ამ დღეებში მსოფლიოს თვალთახედვის არეში კვლავ ავღანეთი და ამ ქვეყანაში მიმდინარე პროცესები აღმოჩნდა _ თალიბებმა ქვეყნის დედაქალაქი ქაბული დაიკავეს.
საერთაშორისო სამხედრო ექსპერტების მტკიცებით, ავღანეთი სრულ „თალიბანიზაციას“ ვერ გადაურჩებოდა, მაგრამ ამ ექსტრემისტული დაჯგუფების ელვისებური წარმატება მაინც მოულოდნელი აღმოჩნდა. წინასწარი გათვლებით, თალიბურ სამხედრო შენაერთებს ქაბულზე სრული კონტროლი მომდევნო 60-90 დღის განმავლობაში უნდა დაემყარებინა, მაგრამ სინამდვილე უფრო დაუნდობელი აღმოჩნდა.
მიმდინარე წლის 14 აპრილს აშშ-ის პრეზიდენტმა, ჯო ბაიდენმა ავღანეთიდან ამერიკული ჯარების გამოყვანა გამოაცხადა.პირველ მაისს შეერთებულმა შტატებმა ავღანეთიდან ჯარის გაყვანა ოფიციალურად დაიწყო.
ავღანეთის ამჟამინდელმა პრეზიდენტმა, ქვეყნიდან უკვე გაქცეულმა აშრაფ ღანიმ რამდენიმე დღის წინ უსაფრთხოების მკვეთრად გაუარესებული მდგომარეობა, აშშ-ის მიერ ჯარების გაყვანის მოულოდნელ გადაწყვეტილებას დაუკავშირა.
ავღანეთში ელვისებურად განვითარებული პროცესები რამდენიმე კითხვის ნიშანს ტოვებს. აშშ -მა და თალიბანმა ასეთი რა მოილაპარაკეს? რაში გაცვალეს და გაწირეს ამდენი მილიონი ავღანელი ამერიკელებმა? რატომ შეატოვეს ველურ ექტრემისტებს ამხელა ქვეყნის მოსახლეობა? რა საჭირო იყო ამდენი წელი ომი, მსხვერპლი და ხარჯი?
ან ქართველ სამხედროებს რა უნდოდათ ავღანეთში? ავღანური „კამპანიის“ განმავლობაში ხომ 32 სამხედრო დაგვეღუპა, ხოლო 100-ზე მეტი დაიჭრა. ვერაფერი ვერ გაამართლებს ჩვენ მიერ გაღებულ მსხვერპლს, დაღუპულ და დასახიჩრებულ ქართველ მეომრებს! საოცნებო ნატოსა და ევროკავშირის კარის გაღება კი კვლავ ოცნებათა სფეროს მიეკუთვნება.
კისერმოტეხილი ბრიტანელები (ორჯერ!), საბჭოთა კავშირი და ახლა აშშ სამარცხვინოდ გამოსროლილი იქნენ ავღანეთიდან!
თითქმის 20 წელი საერთაშორისო დახმარება, მსოფლიოს ყურადღების ცენტრში ყოფნა, ამდენი მსხვერპლი, ამხელა რესურსი, ჩინებულად შეიარაღებული სამთავრობო ჯარი და … ვერშემდგარი სახელმწიფო.
მთავარი მიზეზი, ალბათ, მაინც თავად ავღანელებში უნდა ვეძიოთ _ ხალხს არ უნდა ბრძოლა და ცვლილება ან ხალხი ჩუმადაა. თუ 20-წლიანი წვრთნისა და აღჭურვის შემდეგ ჯარი უძლურია, ამერიკა კი არა, შენ ხარ დამნაშავე _ ვინც ეგუები თალიბანს, უსამართლობას, სიბნელეს.
ავღანეთში მიმდინარე მოვლენებს დავუბრუნდეთ.
ორი დღის წინ თალიბებმა მაზარ-ი-შარიფი პრაქტიკულად ბრძოლის გარეშე დაიკავეს. ამ ქალაქში პრეზიდენტი, აშრაფ ღანი, მხოლოდ რამდენიმე დღის წინ ჩავიდა ჯარის შესაკრებად, მაგრამ ამაოდ. თალიბებს ჯერ ნაციონალური არმია ჩაბარდა, შემდეგ ქალაქი დატოვეს მთავრობის მომხრე ძალებმა და მოხალისეებმა. მაზარ-ი-შარიფის შემდეგ თალიბებმა ჯალალაბადი დაიკავეს. ქალაქის გუბერნატორმა მშვიდობიან მოსახლეობაში მსხვერპლის ასაცილებლად ეს დასახლებული ადგილი სრულიად უბრძოლველად ჩააბარა.
გუშინწინ დილით თალიბანი უკვე ქვეყნის დედაქალაქი ქაბული დაიკავა. „თალიბანის“ განცხადების თანახმად, მათ გეგმებში ქაბულის „ძალის გამოყენებით“ აღება არ შედიოდა.
დილიდან დაჯგუფების წარმომადგენლები დედაქალაქში, პრეზიდენტის სასახლეში იმყოფებოდნენ და მთავრობის წარმომადგენლებს ხვდებოდნენ. მათი თქმით, ხელისუფლებასთან მოლაპარაკებებს „ქაბულის მშვიდობიანად გადასაცემად და ძალაუფლების გადასაბარებლად“ აწარმოებდნენ.
ბი-ბი-სი-ს ინფორმაციით ავღანეთის შინაგან საქმეთა მინისტრის აბდულ სატარ მირზაკვალის განცხადებით, ოფიციალური სამთავრობო ძალები მოსულებს სამხედრო წინააღმდეგობას არ გაუწევდა და ყველაფერი კეთდებოდა რათა თალიბანის დაჯგუფებას ქვეყნის დედაქალაქი უსისხლოდ დაეკავებინა.
ქაბულში მდებარე სხვადასხვა ქვეყნების საელჩოების წარმომადგენელთა ავღანეთიდან გაყვანა დიდი სისწრაფით მიმდინარეობს. ცნობილი იყო რომ აშშ-ის მოქალაქეების ევაკუაციამდე უსაფრთხოება1 000 ამერიკელ სამხედროს უნდა დაეცვა. ბოლო დღეებში განვითარებული დაუგეგმავი მოვლენების შემდეგ მათი რიცხვი სამი ათასამდე გაიზარდა. უცხო ქვეყნის მოქალაქეების მსგავსად ქვეყნის სასწრაფოდ დატოვებას ელოდება ის რამდენიმე ათეული ათასი ავღანელი, რომლებიც ბოლო ოცი წლის განმავლობაში უცხოურ მისიებთან აქტიურად თანამშრომლობდა. თალიბების ხელში მოხვედრის შემთხვევაში მათ მხოლოდ სიკვდილი ელით.
ქაბულში „მეორედ მოსვლა“ ტრიალებს _ დედაქალაქის მოსახლეობა ბანკებთან გრძელ რიგებში დგას, რომ საკუთარი დანაზოგები გამოიტანოს, თუმცა, ბანკების დიდ ნაწილს ფულის რეზერვი აღარ აქვს. მათ რიცხვს ემატება ის ათასობით ათასი ადამიანი, რომლებიც თალიბების მიერ დაპყრობილი ტერიტორიებიდან გამოიქცა და ქაბულს შეაფარა თავი. მათ წასასვლელი უბრალოდ არსად აქვთ. ამასთან ერთად ჰუმანიტარული დახმარების არარსებობის პირობებში, ეს ოჯახები ბავშვებთან ერთად შიმშილობენ. ქაბულის აეროპორტი ათეულობით ათასმა ავღანელმა დაიკავა, რომლებსაც უცხოეთის მოქალაქეების მსგავსად ქვეყნის დატოვება სურთ.
მას შემდეგ, რაც თალიბანმა ქაბულს ალყა შემოარტყა, დედაქალაქი ახალგაზრდა ქალების დიდმა ნაწილმა დატოვა _ მათ მებრძოლებზე დაქორწინებას აიძულებენ.
ავღანელი პარლამენტის წევრი, ფარზანა ქოჩაი ამბობს, რომ ხედავს, როგორ ტოვებენ ქაბულელები სახლებს.
“სახლში ვარ და ვუყურებ ხალხს, რომელიც ცდილობს, გაიქცეს. არ ვიცი, სად აპირებენ წასვლას, ხელში ჩანთები უჭირავთ… ეს ძალიან მძიმე სანახავია…”
ავღანეთში მოვლენები ელვის სისწრაფით იცვლება. არავინ იცის, რა ელის ამ მრავალტანჯულ ქვეყანას უახლოეს დღეებში. ბოლო რამდენიმე ათეული წლის განმავლობაში ავღანეთში მუდმივი შფოთი, არეულობა და ზღვა სისხლი ტრიალებს. სამწუხაროდ, ამ ქვეყანას დამშვიდება და ცხოვრების ნორმალურ კალაპოტში ჩადგომა არ უწერია.
[sexy_author_bio]
