გასული წლის ბოლოდან მუნიციპალიტეტი ახალი მწარე სინამდვილის წინაშე აღმოჩნდა – ლანჩხუთის „მედალფას“ კლინიკას ლიცენზია შეუჩერდა და მოსახლეობა გარკვეული სამედიცინო მომსახურების გარეშე დარჩა. საქმე იმაშია, რომ ჯანდაცვის რეგულირების სააგენტომ, ახალი დადგენილების თანახმად, ყველა იმ კლინიკას შეუჩერა ლიცენზია, რომელსაც კომპიუტერული ტომოგრაფიის ( „კატეს“ რომ ვეძახით) აპარატი არ გააჩნია. ჰოდა, აღმოჩნდა, რომ ლანჩხუთს ეს მომსახურება არც ახალი წლიდან არ აქვს და შესაბამისად აღნიშნული კლინიკა დასჯილთა შორის აღმოჩნდა.
მართალია „მედალფას“ ლანჩხუთის კლინიკას პაციენტთა გარკვეული მომსახურების უფლება დარჩა, მაგრამ უფუნქციოდ აღმოჩნდა გადაუდებელი რეანიმაციის განყოფილება, რომელიც კარგად მოგეხსენებათ, რა აუცილებლობას წარმოადგენს მოსახლეობისთვის და მათი უსაფრთხოებისთვის.
ამავდროულად, ამ კლინიკას, როგორც თავად კლინიკის თანამშრომლები ამბობენ, საკადრო პრობლემაც გააჩნია და კვალიფიციური ქირურგის არარსებობის გამო, ცალკე უკიდურესობაში აღმოჩნდა ჩვენი მუნიციპალიტეტი. არაფერს ვამბობთ იმაზე, რომ წლებია უკვე არ არსებობს სამშობიარო განყოფილება და ლანჩხუთის მაცხოვრებლებს ამ მომსახურებით სარგებლობა, სხვა მუნიციპალიტეტებში უწევთ.
ფაქტია, რომ ამ ყველაფერმა მოსახლეობის სამართლიანი გაღიზიანება გამოიწვია. ხშირად გაიგონებთ ფრაზას, „ეს ლანჩხუთი სულ უპატრონო იყო და ახლა საერთოდ არ ვახსოვართ არავისო“. ძნელია არ გაიზიარო ეს პათისი, როცა ჩვენს მუნიციპალიტეტზე ცენტრალური საავტომობილო თუ სარკინიგზო მაგისტრალი გადის, რაც როგორც სხვადასხვა მნიშვნელობას ანიჭებს აქაურობას, ამავდროულად გარკვეული რისკების შემთხვევებიც გაზრდილია, განსაკუთრებით ზაფხულის სეზონის დადგომის დროს, როცა მაგისტრალზე ძალიან დიდი საავტომობილი ნაკადია და ამ დროს, რომ რამე, ელემენტარულად სასწრაფო დახმარების საშუალებაც კი არ არის.
ფაქტს ეხმიანება ლანჩხუთის საკრებულოს წევრი ერთიანი ნაციონალური მოძრაობიდან, კახა ასკურავა, რომელიც პროფესიით ექიმია.
„2023 წლის 7 ნოემბრიდან ამ წუთამდე ლანჩხუთის მუნიციპალიტეტში მოქმედ ერთადერთ კლინიკას “მედალფას”, რომელიც ქირურგიულ და რეანიმაციურ მომსახურეობას უწევდა პაციენტებს, ლიცენზია შეჩერებული აქვს, რაც ნიშნავს, რომ ცოტა ღრმად რომ გაგეჭრას თითი და მოსაკერი გაგიხდეს, მეზობელ რაიონებს უნდა მიმართო დასახმარებლად. არაფერს ვამბობ მძიმე და გადაუდებელ შემთხვევებზე, როცა ყველა წუთი გადამწყვეტია სიცოცხლის შესანარჩუნებლად. მთელი უბედურება იმაშია, რომ ჯანდაცვის სამინისტროს მიერ დაწესებული სტანდარტების (მოთხოვნების) დაკმაყოფილება, შორეული პერსპექტივაა ამ დროსთვის და შესაბამისად, არც პასუხი აქვთ ლანჩხუთელებს, რა ელით ხვალ და ზეგ?!
ახლა ერთი შეკითხვა მაქვს დევნილთა, შრომის, ჯანმრთელობისა და სოციალური დაცვის სამინისტროსთან- ვინ იღებს პასუხისმგებლობას, თითოეულ იმ შესაძლო ლეტალურ შემთხვევებზე, რომელიც შესაძლოა განვითარდეს დროის, გზის სიშორის და პაციენტების სიმძიმის გათვალისწინებით, რომლებიც არ ექვემდებარებიან ტრანსპორტირებას, შემთხვევის სიმძიმიდან გამომდინარე. გაითვალისწინეთ, რომ არც შესაბამისად აღჭურვილი რეანომობილი გააჩნია რაიონს, რომელიც დროებით უსაფრთხოს გახდის, მძიმე პაციენტის ტრანსპორტირებას მეზობელ რაიონებამდე“,– დასძენს აკურავა.
განვითარებულ მოვლენებში უპირველესად სახელმწიფოს ბრალეულობას ხედავს საკრებულოს კიდევ ერთი წევრი და ასკურავას თანაპარტიელი ირმა მგელაძეც.
„შეცვალეს სტანდარტები და გურიის რეგიონში არცერთ საავადმყოფოს არ ქონდა ლიცენზია, ვიდრე არ მოაგვარებდა მედალფა სტანდარტებს. ამასობაში არავის, ვიმეორებ, არავის ( რა თქმა უნდა, უპირველესად სახელმწიფოს ვალდებულებაა ხალხზე ზრუნვა და არა კერძო ორგანიზაციის)აზრად არ მოსვლია, რომ პარალელურ რეჟიმში მომხდარიყო გამოსწორება გონივრულ ვადებში ისე, რომ მოსახლეობასაც არ შექმნოდა პრობლემები. ამ პერიოდში ჩემს ერთ მეზობელს ელექტროდაზგამ თითები გაუჭრა და ასეთი ელემენტარული მანიპულაციის ჩასატარებლად ფოთში გაუშვეს.
მეორე და უარესი-როგორც კი მოაგვარეს ოზურგეთში და ჩოხატაურში, ამის შემდეგ ერთი თვე, მთელი ერთი გავიდა და არავინ არ შეისმინა ჩამოსვლა და შეფასება“…
ვინ არის დამნაშავე იმაში რაც მოხდა?- საკუთარ პოზიციას აფიქსირებს პარტია „ლელოს“ წარმომადგენელი ლანჩხუთის საკრებულოში, გოჩა ჯანაშიაც.
„მოდით ვთქვათ, რომ „ავერსის“ დაქვემდებარი მყოფი „მედალფას“ კლინიკის“ პრობლემა, უპირველესად ამ კომპანიის პრობლემაა, რომელმაც ვერ უზრუნველყო კლინიკის საჭიროებისამებრ მოდერნიზება და აღჭურვა. ერთი „კატეს“ აპარატის შეძენა რა გახდა, ამის გამო, თავად კლინიკა რომ დააზარალეს, როგორც ფინანსურად, ასევე რეპუტაციულად? ან თავმოყვარე კლინიკას ქირურგის პრობლემა რატომ უნდა ჰქონდეს, ამის გარეშე ხომ წარმოუდგენელია ადამიანების სამედიცინო მომსახურებაზე საუბარი.
ამავდროულად არც ადგილობრივი ხელისუფლების პასუხისმგებლობა უნდა დავივიწყოთ, რომელიც დაინტერესებული უნდა იყოს, საკუთარ მოსახლეობას ყოველნაირი კვალიფიციური მომსახურების უფლება ჰქონდეს,მითუმეტეს, რომ სტრატეგიულად ისეთ ადგილზე მდებარეობს ჩვენი მუნიციპალიტეტი, სადაც გაცილებით მეტია სხვადასხვა რისკები, რომლებიც ადამინებისთვის საფრთხის შემცველია. ცენტრალურ ავტომაგისტრალზე ავტოსაგზაო შემთხვევები რომ ხშირია, ეს ხომ კარგად ვიცით და ღმერთმა დაგვიფაროს, რომ რამე სერიოზული მოხდეს, ადამიანებს სიკვდილისთვის ვწირათ, რამეთუ ამ შემთხვევაში წამები წყვეტს ყველაფერს და ჩვენ არაფერი შეგვეძლება.
საგულისხმოა ისიც, რომ ადგილობრივი ხელისუფლება იმაზეც უნდა ზრუნავდეს თავდაუზოგავად, რომ თუ “მედალფას“, როგორც კერძო კომპანიის შემთხვევაში, არ შეგვეძლება რაიმეს გადაწყვეტა, არსებობს სახელმწიფო კლინიკა, რეგიონული ჯანდაცვის ცენტრი, რომელიც თავისთავად უნდა იყოს სრულყოფილი სამედიცინო მომსახურების მხრივ და ასეთ რთულ შემთხვევებში, პაციენტების გადაუდებელი მომსახურების საშუალება უნდა გააჩნდეს. ჰოდა, ყველაფერი უნდა გაკეთდეს, იმისათვის, რომ ცენტრალურ ხელისუფლებას მოვთხოვოთ, რაც შეიძლება მალე, ლანჩხუთში ასეთი პრობლემები სამედიცინო მომსახურების მხრივ არ იყოს“-ამბობს ჯანაშია.
აღნიშნული თემა ლანჩხუთის საკრებულოს ბოლო სხდომაზეც გაჟღერდა. მერის, ალექსანდრე სარიშვილის განმარტებით, დაახლოებით ორი თვის ვადაში უნდა მოგვარდეს აქ არსებული პრობლემა –”დაახლოებით ორი თვე დაჭირდება, რომ იქ რაღაცეები შეიძინონ და დადგან, რომ კლინიკამ ძველებურად გააგრძელოს ფუნქციონირება. რაც შეეხება სამშობიაროსა და რეგიონალური ჯანდაცვის ცენტრს, ამ მხრივ მუშაობა დაწყებულია, მიდის საუბარი, რომ კომპანია “ადითისგან” მოხდეს ამ კლინიკის გამოსყიდვა და მოხდეს მისი სრული რეაბილიტაცია.თუ არადა ახალი კლინიკის მშენებლობა დავიწყოთ”.
ავტორი
