ოზურგეთში, უკანასკნელ დღეებში, განსაკუთრებით იმატა, როგორც რძის ნაწარმის ფასმა, ისე ხორცისა და შინაური ცხოველისა თუ ფრინველის ფასმაც, რასაც “ცოცხალი წონით” ყიდვას ეძახიან.
დღეის მდგომარეობით, ოზურგეთის ბაზარში და ასევე, მიმდებარე სავაჭრო ობიექტებზე, ადგილობრივი “სოფლის ქათმის” კვერცხი, ერთი ცალი 60 თეთრი ღირს. ერთი კილოგრამი ყველი კი _ ათი ლარი! ზოგან ყველი 9 ლარიც ღირს, თუმცა, მოვაჭრე, რომელიც ათ ლარზე ნაკლებად არ ყიდის ყველს, ამბობს, რომ ყველს სადაც იაფად ყიდიან, წონაში ნაკლები იქნება.
ერთი კილოგრამი ნადუღი ხუთი ლარი ღირს, შინაური ქათმის კვერცხის ფასმა 60 თეთრს მიაღწია, ხოლო ერთი ლიტრი რძე ორი ლარი ღირს (გარეუბნებში არსებულ სავაჭრო ჯიხურებში, ზოგან ორლარ-ნახევარსაც აფასებენ).
გრამიტო მამინაშვილი: “ფასების მონაცვლეობა, ძირითადად, ზიარჭურჭელივითაა. ზოგი ბაზარში ფულის გასათეთრებლად ზის. ამიტომ ხდება, ერთ დღეს ათი ლარი რომ არის, მეორე დღეს კი _ 8. ზოგადად, სიძვირე არის, მაგრამ ერთ მაგალითს მოვიყვან: ზესტაფონიდან ჩამოაქვთ აქ შინ ნახადი არაყი. სამ ლარად ყიდიან. გადავამოწმეთ _ არის ხარისხიანი, ჭაჭით ან ხილის ნარევით გამოხდილი. აბა, აქ გაიკითხეთ, რა ღირს შინნახადი არაყი? 7-8 ლარი. რა არის ასეთი სასწაული? თუ გურია სხვა ქვეყანაა? ფასების დარეგულირება, სჯობს, თითოეულმა მოქალაქემაც ისწავლოს, ვიდრე ზოგიერთმა გადამყიდველმა მხოლოდ ფულის გათეთრებაზე იფიქროს და ამით მკვეთრი დისონანსიც შეიტანოს ფასების ცვლაში. ნუ ვაბრალებთ ყველაფერს გარეშე მიზეზებს”.
ქალბატონი, რომელმაც თავიდანვე გვითხრა, რომ მისთვის ვინაობა არ გვეკითხა, ამბობს, რომ მომხმარებელი მხოლოდ რძის ნაწარმზე ფასის ზრდას აპროტესტებს:
_ აგერ, ნახეთ, რა ფასი აწერია ერთჯერად ტომატს _ 40-50 თეთრად ვყიდულობდით, 80 თეთრი ღირს ახლა. ამის შემდეგ ათლარიანი ყველი რატომ უკვირთ? არ გადამიღოთ, ამ “კოლოფს” გადაუღეთ. ძიმითიდან ჩამოვიტანე ხუთი კილო ყველი და ძლივს გავყიდე რვა ლარად. დღეს ფასი დაკლებულია. ორი დღის წინ ათი ლარი იყო და გამიხარდა, _ გვითხრა ქალბატონმა, რომელმაც ტომატის პატარა ყუთი გვიჩვენა.
_ ვინაობა მე არ მკითხოთ, ფასებს ვინც უმატებს, იმის ვინაობა იკითხეთ. უკანასკნელ დღეებში მხოლოდ რძის ნაწარმის ფასის ზრდაზე საუბრობენ და სხვა სამომხმარებლო პროდუქტზე როგორ წარამარა იცვლება ფასი, ამის გამკითხავი არავინაა, _ გვითხრა მან.
რეზო თავაძის თქმით, ფასების მატება მოახლოებულ ახალი წლის დღესასწაულსაც უკავშირდება და ამაში გასაკვირიც არაფერია, რადგან ყოველწლიურად ასე ხდება.
_ ზოგადად, გაჭირვებაა. ფასები თუ იზრდება, თორემ კლებას ვერსად გაიგებ. რძის ნაწარმის თუ ხორცის ფასის მატებას აქვს კანონზომიერი მიზეზებიც. მიწასთან შრომას შემაშფოთებლად დაანებეს თავი. თუ არ არის სიმინდი და ჩალა, მერე ადამიანს ფრინველის თუ შინაური ცხოველის მოვლაც ეზარება, უფრო სწორად, არ აქვს გამოსაკვები და ცარიელ ბალახზე ხომ არ ამყოფებს? ჯანმრთელმა ადამიანმა, რომელსაც მიწა აქვს, უნდა შეძლოს, ყანა დათესოს და საკუთარი მცირე მეურნეობა აწარმოოს. ახლა თან შემოდგომა მიილია, მოდის ახალი წელი. რატომ გვიკვირს?! გაჭირვება არის, მაგრამ სასწაული არაფერი ხდება. შარშან ამ დროს ნაკლები ღირდა ყველი? აბა, ახლა რატომ გვიკვირს ასე ძალიან? _ გვეუბნება რეზო თავაძე.
ახლა ოზურგეთში ერთი კილოგრამი ხორცი 15-16 ლარი ღირს. ადგილობრივი, სოფლის ქათმის, ინდაურის თუ იხვის ფასი დიდად არ შეცვლილა. კარგი, ზრდასრული ქათამი 25-30 ლარი ღირს. გოჭის ცოცხალი წონა 9-10 ლარია. რაც შეეხება ინდაურს, “წონა არ იკითხოთ, შეხედეთ, როგორია? 60 ლარს ერთი თეთრიც არ დააკლდება”, _ ამბობენ გამყიდველები, რომელთაც ყველა მყიდველი გადამყიდველებს ეძახის და ბაზარში გაზრდილ ფასებს მათ უკავშირებს.
თავის მხრივ, შინაური ფრინველით და ცხოველით მოვაჭრეებიც ითხოვენ დასაქმებას.
“თუ სამუშაო ადგილები იქნება, ამ სანეხვეში არ ჩავსხდებით, აქ გაჭირვებას მოვყავართ”, _ ამბობენ ისინი.
ვინც ახლა აღარ წუწუნებს ოზურგეთის ბაზარში და ყველაზე ძალიან არის გახარებული, ეს თამბაქოს გამყიდველთა სექციაში დასაქმებულები არიან. მათი რიცხვი საკმაოდ ბევრია და აქ ძირითადად, ზემო აჭარის მოსახლეობის წარმომადგენლები ვაჭრობენ.
_ ძალიან გახარებული ვართ, რომ პარლამენტმა პოზიცია შეცვალა და ჩვენი თუთუნი არ დაიბეგრება. ეს არის ზემო აჭარის მოსახლეობის პროტესტის შედეგი. ჩვენ იქედან ვართ და ძირითადად, ჩვენი პურის ფულია ეს თუთუნი. ჩვენ გავაპროტესტეთ საგადასახადო კოდექსში შეტანილი ცვლილებები, რომლის თანახმად, 21 ნოემბრიდან გვიკრძალავდნენ დაუფასოებელი სახით თამბაქოს ნაწარმის გაყიდვას, _ გვითხრეს აქ.
როგორც ცნობილია, საქართველოს საგადასახადო კოდექსში შეტანილი ცვლილებებით, მიმდინარე წლის 21 ნოემბრიდან, დაუფასოებელი სახით ნებისმიერი თამბაქოს ნაწარმის, მათ შორის, თამბაქოს ნედლეულის, ჩიბუხის თამბაქოს, შესახვევი თამბაქოს, ასევე, ჩილიმისთვის განკუთვნილი თამბაქოს რეალიზაცია და მიწოდება იკრძალებოდა. მთავრობამ მიდგომა შეცვალა და ახლა მხოლოდ შემოტანილი თამბაქოს დაბეგვრა მოხდება.
_ ჯერ გვითხრეს, იანვრამდე გადროვებთო. არც ეს იყო ჩვენთვის შვება. ახლა გავეცანით პარლამენტის გადაწყვეტილებას და ამოვისუნთქეთ. ახალი რეგულაციები აღარ დაწესდება, ჩვენ აღარ დაგვბეგრავენ, რაც იმას ნიშნავს, რომ პურის ფულს მივიტანთ სახლში, _ გვეუბნებიან თამბაქოთი მოვაჭრეები.
