ბოლო სამი დღის განმავლობაში, ოზურგეთში თხილის ფასი არ შეცვლილა – ერთი კილოგრამი „გულშიშველას“ ფასი 3,30 ლარიდან იწყება და შესაძლოა 20 თეთრით მეტი რომელიმე მიმღებ პუნქტში გადაგიხადონ. 3, 80 ლარი ღირს „ბერძნულა“ და მაქსიმუმ, ოთხ ლარზე მეტს არავინ იხდის.
ამასობაში დაიწყო კაკლის და წაბლის ჩაბარებაც.
ზოგისთვის გასაკვირიც კი გახდა, რომ ხშირად ერთი კილოგრამი წაბლის ფასი 5, 50 ლარიც კი არის. მართალია, ერთი კილოგრამის ფასი სამი ლარიდან იწყება და უმეტესად უპირატესობას ფერს, კალიბრს და ჯიშს ანიჭებენ, თუმცა, ზოგადად თხილის მიმართაც ასეთი მიდგომაა.
მნიშვნელოვანი აქ ის არის, რომ არასდროს მომხდარა, წაბლის ფასს თხილის ფასისთვის გაესწროს.
_ესეც ასე, წაბლის ფასმა თხილისას გადაასწრო. ყოველდღე ხუთი ლარი არ არის, მაგრამ ახლახან ერთ კილოგრამში 5,50 ლარიც გადავიხადეთ. დღეს 4 ლარამდეა. როგორც გვეტყვიან დამკვეთები, ისე ვიბარებთ – გვითხრეს დღეს, დილით ერთ-ერთი მიკროავტობუსის ძარასთან მდგარმა პირებმა, რომლებიც წაბლს იბარებდნენ.
კითხვაზე, თუ სად მიაქვთ სარეალიზაციოდ, გვითხრეს, რომ პირდაპირ თბილისში მიაქვთ რეალიზატორთან.
_ მერე სად ყიდიან, არ ვიცით. აზერბაიჯანში გააქვთო, იმასაც ამბობენ, თუმცა დაზუსტებით ვერ გეტყვით, _ განაცხადეს მათ „გურია ნიუსთან“.
რაც შეეხება კაკალს, ერთი კილოგრამს 70 ან 80 თეთრად აბარებენ.
ეგრეთ წოდებული „კერკეტა“ ანუ პეკანის ჯიშის კაკალი, მოგვიანებით 1,50 ლარიც ღირს ერთი კილოგრამი. ამჯერად კი მისი ფასი ერთ ლარსაც არ აღწევს.
[sexy_author_bio]
