საქართველოში ტელეკომპანია „დოჯდის“ ჟურნალისტი, მიხაილ ფიშმანი არ შემოუშვეს. მიხაილ ფიშმანს არ შემოშვების მიზეზის შესახებ საზაღვრო პოლიციის უწყება არ გაუკეთებია.
„გურია ნიუსი“ შინაგან საქმეთა სამინისტროდან ელოდება კომენტარს და მოწოდებისთანავე შემოგთავაზებთ.
„საქართველოში ერთი დღით ქალიშვილებთან ერთად ჩამოვედი. ისინი შეუშვეს, მე – არა. პირველი ერთი საათი საზღვარგარეთ გამაჩერეს. შემდეგ პასპორტი მომცეს და მითხრეს, რომ საქართველოში შეკრებაზე უარს მეუბნებოდნენ. ისიც მითხრეს, რომ გადაწყვეტს 10 დღის ვადაში გავასაჩივრო. ვკითხე, რასთან-მეთქი. მითხრეს, რომლითაც ბაქოში დავბრუნდებოდი, საბუთებს მაჩვენებდნენ. წარმოდგენა არ მაქვს, რა საბუთებზე მელაპარაკებოდნენ. პასპორტიც კი მას შემდეგ მომცეს, რაც გამოვფრინდი. მიზეზი გაურკვეველი. არავის არ აუხსნია, თუმცა, სხვა საუბრებიდან, სხვა კონტაქტებიდან გავიგე, რომ ყველაფერი ტელეარხ დოჟდთან დაკავშირებით გამოვიდა”. – აღნიშნა ფიშმანმა „ფორმულასთან“.
რამდენიმე წუთის წინ კი კოალიცია მედიის ადვოკატირებისთვის ამ საკითხთან დაკავშირებით განცხადებას გაავრცელა.
კოალიცია “მედიის ადვოკატირებისთვის” მოუწოდებს საქართველოს ხელისუფლებას ქვეყანაში შემოუშვას პროფესიული საქმიანობის გამო შევიწროებული რუსი ჟურნალისტები. გავრცელებული ინფორმაციით, გუშინ, 2022 წლის 5 მარტს, საქართველოში არ შემოუშვეს რუსული დამოუკიდებელი არხის, „დოჟდის“ ჟურნალისტი მიხეილ ფიშმანი. ის ამ დრომდე კომენტარის და იდენტიფიცირებისგან თავს იკავებდა რუსეთში ჟურნალისტების მიმართ მომეტებული საფრთხის გამო. დღეს, 2022 წლის 06 მარტს ცნობილი გახდა, რომ მიხეილ ფიშმანის ოჯახი საქართველოშია, ჟურნალისტს კი არ ეძლევა შესაძლებლობა გადმოკვეთოს საზღვარი და ისევ ელოდება პასუხს საქართველოს სახელმწიფოსგან. საზოგადოებას შევახსენებთ, რომ „დოჟდი“ კრიტიკული სარედაქციო პოლიტიკის მქონე მაუწყებელი იყო რუსეთში. უკრაინაში მიმდინარე საომარი მოქმედებების ფონზე, ტელეკომპანიამ მაუწყებლობა 3 მარტს შეაჩერა.
ახლახან რუსეთის ხელისუფლებამ რეგულაციები დააწესა, რამაც დამოუკიდებელ მედიას გაურთულა ომის გაშუქება. ინფორმაციის – რომელსაც კრემლი “ყალბად” მიიჩნევს – გავრცელებისთვის, ადამიანი შეიძლება დაისაჯოს მაღალი ჯარიმით ან პატიმრობით. აღნიშნულის ფონზე, ჟურნალისტების ნაწილი ცდილობს დატოვოს რუსეთი. რუსეთში შეწყვიტეს მაუწყებლობა სხვა მედიასაშუალებებმაც, მათ შორის CNN-მა, დაიხურა Deutsche Welle-ს რუსული ბიურო. ამიტომაც, გვაქვს მოლოდინი, რომ საქართველოს დახმარება დასჭირდებათ სხვა რუსს ჟურნალისტებსაც. მიგვაჩნია, რომ ჟურნალისტის შეზღუდვის ფაქტი შესაძლოა დისკრიმინაციული იყოს იმ ფონზე, როცა მსგავსს დაბრკოლებებს რუსეთიდან ერევნის გავლით შემოსული სხვა პირები არ აწყდებიან. შესაბამისად, სახელმწიფომ უნდა განმარტოს თუ რა გახდა მიხეილ ფიშმანის არ შემოშვების მიზეზი. კოალიცია მოუწოდებს საქართველოს ხელისუფლებას საზღვრის კვეთისას არ შეუქმნას ხელოვნური დაბრკოლებები პროფესიული საქმიანობის გამო შევიწროებულ რუს ჟურნალისტებს. განუხრელად შეასრულოს “საერთაშორისო დაცვის შესახებ” საქართველოს კანონის მოთხოვნები და არ შელახოს კრიტიკული ჟურნალისტების და მათთან ერთად მყოფი პირების უფლებები”,_ წერია განცხადებაში.
