ოზურგეთი-ბათუმის მიმართულებით ცენტრალური გზა, სულ სამი წელია, რაც კაპიტალურად გაკეთდა _ დაიგო ახალი ასფალტი, კეთილმოეწყო საგზაო ნიშნები. ლამპიონების ქსელი გზატკეცილის მთელ სიგრძე განათებულია. ხოლო საორიენტაციო ბოძები, განსაკუთრებული სილამაზითაც გამოირჩევა და, რაც მთავარია, ღამით მაქსიმალურ უსაფრთხოებას უზრუნველყოფს.
ამ ფონზე, უკვე მერამდენედ ხდება სწორედ საგზაო ნიშნების, ძირითადად, საორიენტაციო ბოძების დაზიანება. როგორც ვთქვით, გზა სამი წელია, სრულყოფილად გაკეთდა და ათეული წლების მანძილზე, მძღოლებს მთლიანად ამორტიზირებულ გზაზე უხდებოდათ მოძრაობა. სწორედ ამიტომ, აღნიშნული პროფესიის ადამიანებს, ყველაზე ძალიან უხარიათ ამ გზის ასე სრულფასოვნად მოწესრიგება.
ასეთ დროს კი, ხდება წარმოუდგენელი რამ _ საორიენტაციო ბოძებს, ჯერჯერობით, დაუდგენელი პირები, თხრიან, ტეხენ, აზიანებენ და იქვე ყრიან.
თავდაპირველად ბევრს ეგონა, რომ ავტოავარიების შედეგად ზიანდებოდა ბოძები. ზოგჯერ მართლაც ასე იყო, თუმცა, შემდეგ გაირკვა, რომ ხშირად განზრახ თხრიან ან ამსხვრევენ ამ ბოძებს.
მაგალითად, ბოლო დღეების მანძილზე, აღნიშნულ გზაზე უკვე მრავალი ბოძია წაქცეული. ზოგან _ ერთი, ზოგან _ ოთხი და ასე შემდეგ.
_ ხალხი გაგიჟდა თუ რა ხდება? მიხარია აქ სიარული. ოცი წელიწადი ვიარეთ დანგრეულ, ორმოებადქცეულ გზაზე. სწორედ, ამის გამო ბევრი ავარია მოხდა აქ. ორი საათი მჭირდებოდა, ქობულეთიდან ოზურგეთში რომ ჩამოვსულიყავი. ამოვისუნთქეთ, რომ გაკეთდა. ღამით როცა მიდიხარ, გაჩახჩახებულია, საორიენტაციო ბოძები განსაკუთრებულად გიცავს. თუმცა, ეს რა ხდება?! ვინ ამტვრევს, რატომ ამტვრევს?! ავარიებს რომ დავაბრალოთ, ამდენი შემთხვევა, ნამდვილად არ მომხდარა. ეს არის განზრახ გადათხრილი და პასუხი უნდა მოეთხოვოს მავნებლებს, _ ამბობს ქობულეთის მკვიდრი, მძღოლი ემზარ ჭაღალიძე.
_ ხან მონადირეები დადიან. ხან _ დაუდევარი მძღოლები, ისე უყურადღებოდ გადააყენებენ გზიდან მანქანას, სულ არ უყურებენ, იქვე ბოძი რომ დგას. მაინცდამაინც დენის უზარმაზარი ცემენტის ბოძი უნდა იდგეს, რომ ფრთხილად დაამუხრუჭონ და არ შეეჯახონ? ან გაასწორონ რომ წაკრავენ მანქანის “ცხვირს “, დიდი ამბავი უნდა მაგას? _ გვეუბნება ოზურგეთი-ჭანიეთის ავტობუსის მძღოლი სერგო ბოიაჯანი.
გზატკეცილის გასწვრივ სხვადასხვა სავაჭრო თუ სახელოსნო მაღაზიაა გახსნილი. ბევრი ადამიანი გადაადგილდება ამ გზაზე და მოძრაობა არანაკლებ ინტენსიურია ღამითაც, ისევე, როგორც დღისით.
მძღოლების უმეტესობა წუხს და მიიჩნევს, რომ ეს საგზაო საორიენტაციო ბოძები განზრახ ზიანდება. არადა, სპეციალური განათებით დიდ დახმარებას უწევს საჭესთან მჯდომს და უნდა გამკაცრდეს მიდგომა მავნებლების მიმართ. შესაბამისმა უწყებებმა უნდა გაატარონ ღონისძიება და აღმოაჩინონ ის ადამიანები, ვინც განზრახ აზიანებს საგზაო ნიშნებს.
_ 40 წელზე მეტია, საგზაო სისტემაში ვმუშაობ და ასეთი მავნებლობა ნაკლებად მინახავს. რას ერჩიან ამ პატარა ბოძებს, ვერ მივხვდი. რამდენჯერ შევცვალეთ, გავაკეთეთ ახლები. მაინც აზიანებენ. ავარიის დროს მომხდარ დაზიანებას კიდევ აქვს რაღაც გამართლება, მაგრამ განზრახ მოგლეჯა რა წესია? რა ვიცი, რა გითხრათ... _ გვეუბნება ჟორა კვირკველია, რომელიც დიდი ხანია, “გზამშენი 18”-ის თანამშრომელია. უყვარს თავისი საქმე და გული ტკივა, რომ დაზიანებულ საგზაო ნიშნებს ხედავს.
_ გამიშრეს სისხლი! გასულ წელს ორასი ცალი მოთხარეს და დაყარეს. არის შემთხვევები, როცა მანქანა დაეჯახა. თუმცა, უმეტესად, მავნებლობას და განზრახ დაზიანებას აქვს ადგილი. რა ვიცი, რა გითხრათ? 200 ცალ საგზაო ნიშანს რომ მოთხრი, ანუ, აბრკოლებ მოძრაობას, ქმნი საავარიო სიტუაციას. 200 ცალი ერთ ჯერზე შევცვალეთ, თორემ სხვა დროსაც არაერთხელ გავაკეთეთ ახალი ბოძები. ნამდვილად არ არის ეს მხოლოდ ავარიების ბრალი. განზრახ მოტეხილია ან გადაღუნული თუ მოთხრილი, _ გვითხრა “გზამშენი 18”-ის დირექტორმა თემურ ჯახვამ.
მისივე თქმით, მალე ამ დაზიანებულ და დამტვრეულ საორიენტაციო ბოძებსაც შეცვლიან.
კითხვაზე, ხდება თუ არა ვიდეოთვალთვალი ამ გზებზე და რამდენად არის შესაძლებელი დამნაშავის დადგენა, ან თუ უცდიათ მსგავსი რამ, თემურ ჯახვამ გვითხრა, რომ ეს პოლიციის საქმეა:
_ ვიდეოთვალი ტრასის გასწვრივ, ქალაქიდან რომ გადიხარ, “გალფის” ბენზინგასამართ სადგურთან დგას. ნამდვილად გასამკაცრებელია მიდგომა, რადგან არაერთხელ ხდება უკვე განზრახ გაფუჭება ამ ბოძებისა.
როგორც ადგილობრივი სოფლების _ ჭანიეთის, ლიხაურის, მაკვანეთის და ქაქუთის მცხოვრებლები აღნიშნავენ, ეს გზა მათთვის სასიცოცხლო ფუნქციის მატარებელია.
_ ეს გზა თავდაპირველად სამხედრო გზად იწოდებოდა, სამხედროებმა 1953-54 წლებში ააგეს და ნოვოროსიისკი-ბათუმის ტრასის სახელით იყო ცნობილი. მაშინ ლანჩხუთის ტრასა არ არსებობდა. ძველი დროიდან უდიდესი მნიშვნელობა ჰქონდა ყველა მიმართულებით. იმ წლების შემდეგ, ეს გზა არ აღდგენილა ასე სერიოზულად. მხოლოდ ორმული შეკეთებები ან აქა-იქ მონაკვეთების გადაგება ხდებოდა. ახლა კი, როცა ასე გაკეთდა, აღმაშფოთებელია განზრახ დაზიანება. მით უფრო, საგზაო ნიშნებისა. მართლა არ გვახსოვს ასეთი მავნებლობა. იმედია, შესაბამისი ორგანოები გაამკაცრებენ მეთვალყურეობას, _ გვეუბნებიან აღნიშნული სოფლების მცხოვრებლები: ლაშა ბოიაჯანი, დავით სალუქვაძე, მანანა ლომთაძე, ჯუმბერ სურგულაძე, მალხაზ ლომჯარია და სხვები.
ხალხი განსაკუთრებით საპატრულო პოლიციის როლზე მიუთითებს და ამბობს, რომ ვიდეოთვალის მეშვეობით ან სისტემატური კონტროლით უნდა მოხდეს დამნაშავეების დადგენა.
_ თუ ასეთი მავნებლების აღმოჩენა არ შეუძლიათ, აბა, რას აკეთებს საპატრულო პოლიცია? შემთხვევით რომ ავარია მოხდება, მხოლოდ იმ მძღოლების დასჯაზე უნდა იყვნენ გაფაციცებული? _ ამბობენ ადგილობრივები.
ავტორი
