ახალი წლის მოახლოებასთან ერთად, ფასების ცვლილება საკვებ პროდუქტებსა თუ სხვა საქონელზე ყოველთვის შესამჩნევია. რა ხდება დღეს ოზურგეთში ამ მხრივ _ “გურია ნიუსი” შეეცადა მოქალაქეებთან ერთად გაერკვია.
დავიწყოთ იქიდან, რომ საკმაოდ გაძვირდა შინაური ფრინველი. დღეისთვის აქ ქათმისა და ინდაურის ფასი, საკმაოდ გაიზარდა და როგორც გამყიდველები გვეუბნებიან, ახალი წლის მოახლოებისთანავე, სავარაუდოდ, კიდევ მოიმატებს.
_ კარგი მამალი ინდაური, 7-8 კილოს თუ იწონის, 80 ლარს ვაფასებთ, ისე კი 40 ან 60 ლარი შეიძლება იყოს. ქათამს რაც შეეხება, დედალი 25-30 ლარია, მამალი 30 ლარამდე. წონას გააჩნია. ახალ ქათამს რასაც ვეძახით, 20 ლარამდე ფასობს. ყოველ შემთხვევაში, ნამდვილად ვიცით, რომ ფასი არ დაიკლებს, პირიქით, გაიზრდება. რაოდენობრივად ძალიან ცოტას მოჰყავს გასაყიდად ცოცხალი შინაური ფრინველი. ჭირიც იყო ამ შემოდგომაზე და ამასთანავე ხალხი ამბობს, რომ ყველაფერი გაძვირდა, ყანები არ დაითესა ან დათესილი ფაროსანამ შეჭამა და “საყოლის” რჩენა გაჭირდა, _ გვეუბნებიან ადგილზე.
ქალბატონი, რომელიც ვინაობის დასახელებისგან თავს იკავებს, ბაზარში მუშაობს და შინაური ფრინველებით ვაჭრობს. იგი ასეთ კომენტარს აკეთებს:
_ მე აქ ვმუშაობ, “გადამყიდველი” ვარ 72 წლის ქალი. სულ აქ ვარ და როცა გინდათ, მნახავთ. რატომ უნდა მერქვას ამ ასაკში “გადამყიდველი”, როდის უნდა დაგვადგეს საშველი? ჩემი პენსია წამლებს არ ჰყოფნის. ახალგაზრდა რომ ვიყავი და ჩემი დედამთილი 70 წლის იყო, სახლში იჯდა, კარგად მოვლილ-დასვენებული. პენსიაც საკმარისი ჰქონდა და ოჯახიც “მსუყედ” გვქონდა. ვემსახურებოდი. ჩემი სიბერე კი ჯოჯოხეთია. ერთი ქათმისთვის დავდევთ ვიღაცას, რომ მერე აქ ორიოდე ლარით მეტად გავყიდოთ. გვეხალისება? ხომ ხედავთ, რა უთანასწორობაა. ხალხის უმეტესობას რომ დასაქმება ღირსებოდა, მეც არ გამომიშვებდნენ სახლიდან და აქ არ ვიწვალებდი. ასეა აქ ყველა, _ გვეუბნება ასაკოვანი ქალბატონი, რომელიც “გადამყიდველის” სტატუსით ვაჭრობას, ძირითადად, ხელისუფლებას აბრალებს. თან იმასაც გვეუბნება, ცარიელი წერა რად გინდათ, რაიმე შედეგი მოიტანეთო.
ძვირია ცოცხალი გოჭიც, ერთი კილოგრამის ფასი 9-10 ლარს შორის მერყეობს.
რაც შეეხება ხორცის ფასს, გამყიდველები გვეუბნებიან, რომ ფასი არ მომატებია, ერთი კილოგრამი საქონლის ხორცი 14 ლარი ღირს, ღორის კი 13, თუმცა, ეს თავისთავად ძვირია და მყიდველიც უფრო საახალწლოდ იჭირვებს, რომ სადღესაწაულო სუფრაზე ჰქონდეს.
მოიმატა რძისა და რძის ნაწარმის ფასმა. ერთი კილოგრამი ყველი 8 ლარი ღირს და სავარაუდოდ, კიდევ მოიმატებს. ერთი ლიტრი რძის ფასი კი 2 ლარია.
აგრარულ ბაზარში უცვლელია და შედარებით იაფი მწვანილეული და ხილი. ერთი მოზრდილი შეკვრა ოხრახუში, ქინძი, ნიახური თუ ცერეცო შესაძლებელია, 50 თეთრად შეიძინოთ. თუმცა, აღნიშნავენ იმასაც, რომ მწვანილეულის და ხილის ფასი, შესაძლოა, გასამმაგდეს. თუ ამინდი შეიცვლება უარესობისკენ.
ოზურგეთში არ გაზრდილა პურის ფასი და ასევე, არ შემცირებულა წონა, როგორც ამას ვარაუდობდნენ. ცნობილი “ვასაძის პური” 75 თეთრი ღირს და წონა 395-400 გრამია. თუმცა, ფასი მოიმატა პურის ფქვილის საცალო ფასმა _ 25 კილოგრამიანი ტომარა 24,50 – 25 ლარი ღირს, როცა მისი შეძენა გაზაფხულიდან შემოდგომამდე 22 ლარად იყო შესაძლებელი.
_ ოზურგეთში პურის ფასი და წონა არ შეცვლია, მაგრამ “ბათუმის პური”, რომელზეც ჩვენთან მოთხოვნა არის და შემოგვაქვს, გაძვირდა. ადრე იყო 400 გრამი და 75 თეთრი ღირდა, ახლა 500 გრამია და 90 თეთრი ღირს. თუ შევადარებთ წონის და ფასის შესაბამისობას არსებულთან, ფასი მომატებულია. ჩვენ ვვარაუდობთ, ეს იმიტომ მოხდა, სხვა რეგიონიდან რომ შემოგვაქვს, _ გვეუბნებიან მარკეტებსა და პურის მაღაზიებში.
რაც შეეხება ახალ თევზს, უხვადაა ოზურგეთის ბაზრის დახლებსა თუ სუპერმარკეტებში. ბრტყელშუბლა ერთი კილოგრამი 5 ლარი ღირს, კობრი _ 5 ლარი, 9 ლარი ღირს კალმახი.
სასურსათო პროდუქტი მარკეტებში არ გაძვირებულა და ერთი კილოგრამი შაქარის ყიდვა 1.30 ლარად არის შესაძლებელი, ერთი ლიტრი ზეთის ფასი 2,90 ლარიდან იწყება. ერთი ცალი კვერცხის საცალო ფასი 30 თეთრია. ოჯახის ქათმის კვერცხის ფასი 50 თეთრია და ახალი წლის დღეებში, სავარაუდოდ, არც დაიკლებს.
ჩვენ გავესაუბრეთ ბაზარსა და მაღაზიებში მოვაჭრე ადამიანებს ფასების შესახებ, რომელთა უმეტესობა წინასაახალწლო სამზადისშია და ცოტა ადრიანად ცდილობს, შედარებით იაფად შეიძინოს პროდუქტი.
ლიანა შავიშვილი: “დილას ადრე ყველის საყიდლად წამოვედი. სახალწლოდ და საშობაოდაც ფასი უფრო აიწევს, ალბათ. თუმცა, ერთი კიილოგრამი 8 ლარი ახლაც ღირს და ესეც ძვირია. ცოცხალ ქათამს საერთოდ ვერ ვიყიდი და ვერც სახლში დავკლავ საკუთარს. რამდენიმე მყავს და მირჩევნია, კვერცხი დადოს. ისევ გაყინულს ვიყიდი. ხალხს ძალიან უჭირს. 90-იანი წლები რომ არ არის, ეს იმას არ ნიშნავს, რომ ძალიან ბევრი უღარიბესი ადამიანი არ გვყავს. ხალხს სამსახური უნდა ექნეს, ეკონომიკაში თუ წესიერი ხალხი არ გამოჩნდა და სამართლიანი წესრიგი არ დამყარდა, საქართველოს მოსახლეობის უმეტესი ნაწილი სულ ასე ღარიბი იქნება. მთავრობამ ახალი წლიდან რადიკალურად უნდა შეცვალოს ქმედება ხალხის სასარგებლოდ. მე , კომუნისტების დროს, ბუღალტრად ვმუშაობდი, ახლა იქნებ თქვათ, ფული გექნებოდაო. კი მქონდა, მაგრამ ჰქონდა ყველას და ხალხს საჭმელი არ ენატრებოდა. არც დღესასწაულზე და არც ისე. პური და კარაქი უფუჭდებოდათ, იმდენი ჰქონდა თითოეულ ოჯახს. ახლა? ეს უნდა შეიცვალოს. ძალიან გაჭიანურდა ყველაფერი ხალხის საზიანოდ”.
მანანა მუჯირი: “ვყიდულობ და ვიმარაგებ რაღაცეებს, რაც შეიძლება უფრო გაძვირდეს ამ 4-5 დღეში. ქათამს და გოჭს ვერ წაეკარები. თუმცა, მყიდველიც არაა ბევრი. რა გითხრათ, ხალხი ისევ გაჭირვებულია. საკმაოზე ბევრად მეტს უჭირს. ახლა რომ ასეა, ორი-სამი თვის შემდეგ ნახე, რა იქნება. თხილი მოისპო და სიმინდი. უარესობისკენ წავიდა საქმე. ცალკეულებს და ძირითადად, მთავრობაში მომუშავეებს არ უჭირთ _ ესაა სიმართლე. მთავრობა მთავრობაა და ხელი არ უნდა ეშლებოდეს ეკონომიკური პრობლემებით, თუმცა, შედარებითია ყველაფერი _ ხელფასების რაოდენობა, პრივილეგიები. რომ დააკვირდები, ბაზარს გადახედავ, ახლომახლო მიმოიხედავ, უცებ მიხვდები, რამხელა სხვაობაა ხელისუფლებასა და ხალხს შორის. როცა ფასებსა და განწყობაზე მეკითხებით, თქვენ როგორ ფიქრობთ, ძალიან საზეიმო განწყობა აქვს ხალხს? ეკონომიკურ მხარეს ვგულისხმობ”, _ გვითხრა ქალბატონმა მანანამ.
