ლანჩხუთის გამგეობის ინიციატივას მუნიციპალიტეტის მთავარ საფინანსო დოკუმენტში მორიგი ცვლილების გახორციელებასთან დაკავშირებით, საკრებულოში დეპუტატთა მხრიდან კრიტიკული შეფასებები და ორდღიანი მსჯელობა მოჰყვა
მთავრობის ეს ნაბიჯი საკრებულოს ოპოზიციურმა ნაწილმა წინასაარჩევნო ფანდად მიიჩნია, ხოლო სახელისუფლებო გუნდის წარმომადგენელთა ნაწილმა უკმაყოფილება ვერ დამალა, რომ სტიქიის სალიკვიდაციოდ განკუთვნილი თანხა მხოლოდ სამ ადმინისტრაციულ ერთეულზე გადანაწილდა.
საქმე ისაა, რომ საქართველოს მთავრობის განკარგულებით, აგვისტოში ძლიერი ნალექის შედეგად მიყენებული ზიანის სალიკვიდაციო ღონისძიებების გასახორციელებლად, ლანჩხუთის მუნიციპალიტეტს 24 7000 ლარი გამოეყო.
გამგეობის საფინანსო-საბიუჯეტო სამსახურის უფროსის, როლანდ ლაშხიას მოხსენების მიხედვით, აღნიშნული თანხიდან 130 000 ლარი ღრმაღელის ადმინისტრაციულ ერთეულში გზის აღდგენითი სამუშაოების შესრულებას მოხმარდება, ხოლო დარჩენილი 11 7000 ლარი _ ღრმაღელის, სუფსის და ჩოჩხათის ადმინისტრაციულ ერთეულებში საცხოვრებელი სახლების სარეაბილიტაციო სამუშაოებზეა გათვალისწინებული.
ოპოზიცია მთავრობის ამ განკარგულებას წინასაარჩევნო კამპანიას უკავშირებს და მეტი დამაჯერებლობისთვის გამგეობის მხრიდან 23 აგვისტოს სტიქიის შედეგად დაზიანებული ობიექტების დასურათებულ დოკუმენტაციას ითხოვს.
“სტიქიის თანხებთან დაკავშირებით ჩემთვის ბევრი რამაა გაუგებარი. ყველას ახსოვს, რომ 2015 წელს მომხდარი სტიქიის თანხები სახელმწიფომ 2016 წელს წინასაარჩევნო პერიოდში გადმორიცხა, ახლა კი შვიდ დღეში ზარალის რაოდენობაც აღრიცხა და თანხაც გადმორიცხა.
საფუძვლიანი ეჭვი მაქვს, რომ ეს არის წინასაარჩევნო ფანდი. არასწორია საარჩევნო რეჟიმში ბიუჯეტის გაზრდა. წინააღმდეგი არ ვარ მოსახლეობამ ზარალი აუნაზღაურდეს, მაგრამ დასაბუთებული და დასურათებული დოკუმენტაცია გვაჩვენონ, რომ ეს ხალხი ნამდვილად სტიქიამ დააზარალა და სასწრაფოდ დახმარებას საჭიროებს. წინააღმდეგ შემთხვევაში, ყოველთვის იქნება ეჭვი, რომ ეს არის წინასაარჩევნოდ ამომრჩევლის მოსასყიდად განკუთვნილი ფული”, _ ამბობს საკრებულოს წევრი გია გოგუაძე.
აღნიშნულ თანხასთან დაკავშირებით პრეტენზიები იმ დეპუტატებსაც გააჩნიათ, რომლებიც საკრებულოში “ქართულ ოცნებას” წარმოადგენენ. ისინი ინტერესდებიან, რატომ მოხდა ჩამონათვალში მხოლოდ ზემოთ ნახსენები ადმინისტრაციული ერთეულები დანარჩენების სრული იგნორირების ფონზე.
ერთ-ერთი მათგანი ნიგოითის ადმინისტრაციული ერთეულის მაჟორიტარი თემურ ალექსაიაა, რომელიც ინტერესდება, თუ რატომ ვერ მოხვდა სტიქიით დაზარალებულთა ჩამონათვალში სოფელ ჭყონაგორაში მცხოვრები ირინა ორმოცაძის ოჯახი:
“სამი წლის განმავლობაში ვერ მივაღწიე იმას, რომ ირინა ორმოცაძის ოჯახისთვის დახმარება გაგვეწია. ოჯახისთვის, სადაც ყოველი გაწვიმებისას სტიქია მძვინვარებს და სამაშველო ბრიგადის გამოძახება ხდება საჭირო. ბოლო სტიქიისას 80 წლის ქალი კარადის თავზე იყო ასული, რომ არ დამხრჩვალიყო. როდის უნდა დავეხმაროთ ამ ოჯახს?!” _ კითხულობს ნიგოითის მაჟორიტარი დეპუტატი.
თუმცა, გამგეობის ინფრასტრუქტურის სამსახური უფროსი ლევან ჩხაიძე განმარტავს, სტიქიის შედეგად მიყენებული ზიანის სალიკვიდაციო ღონისძიებების გასატარებლად, თანხა იმ ადმინისტრაციულ ერთეულებს გადაეცათ, სადაც რეალურად მოხდა სტიქია.
“იმ პერიოდში, როგორც კი საგანგებო შტაბი მუშაობას შეუდგა, ამ ადმინისტრაციული ერთეულებიდან მოხდა ინფორმაციის წამოსვლა. ფაქტია, რომ სხვაგან სტიქიას ადგილი არ ჰქონია და შეტყობინებაც არ მიგვიღია”, _ ამბობს ლევან ჩხაიძე.
რაც შეეხება ირინა ორმოცაძის ოჯახის საკითხს, ინფრასტრუქტურის სამსახურის უფროსის განმარტებით, მუნიციპალიტეტს არ აქვს შესაძლებლობა, ეს პრობლემა საკუთარი ძალებით მოაგვაროს:
“ეს პრობლემა ათი წელია, რაც დგას. ეს არ არის სტიქიის ზონა, ეს არის წყალდიდობის მუდმივი კერა. ამ პრობლემის მოგვარება ჩვენი ძალებით ვერ ხერხდება. იქ საჭიროა ცენტრალური ავტომაგისტრალი გადაიჭრას და გაკეთდეს ხიდი. ფაქტობრივად, ეს პრობლემა მაშინ მოგვარდება, როცა ძირითადი ავტომაგისტრალის გადატანა მოხდება”, _ განმარტავს ლევან ჩხაიძე.
