საარჩევნო კამპანია უკვე დაწყებულია. პარტიული კანდიდატების პარალელურად არჩევნების მოსაგებად იბრძვიან დამოუკიდებელი კანდიდატები. „გურია ნიუსის“ დაინტერესდა, როგორი პროგრამები აქვთ ჩოხატაურში რეგისტრირებულ დამოუკიდებელ კანდიდატებს და რას პირდებიან ისინი ამომრჩევლებს.
როგორც გავარკვიეთ ყველაზე ვრცელი პროგრამა, რომელიც ბეჭდური სახით გავრცელდა, როგორც თავად ამბობს კანდიდატურის დაყენებამდე, ხევის თემის დამოუკიდებელი მაჟორიტარი დეპუტატობის კანდიდატის ზაურ ოსეფაიშვილს აქვს:
პროგრამა პირველ პირშია დაწერილი და ასეთი სათაური აქვს „ხევის თემი უნდა გახდეს ყველაზე წარმატებული თემი მუნიციპალიტეტში“.
ბიოგრაფიით დაწყებულ გზავნილში ხაზგასმულია, რომ ზაურ ოსეფაიშვილი 2006-2014 წლებში ხევის თემის არჩეული მაჟორიტარი დეპუტატი იყო, თუმცა, პარტია არ წერია (ოსეფაიშვილი ამ წლებში „ნაციონალურ მოძრაობას“ წარმოადგენდა, მანამდე იყო გამგებლის მოადგილეც, მაგრამ ამაზე პროგრამაში არაფერია ნათქვამი).
ბიოგრაფიიდან ირკვევა, რომ ოსეფაიშვილი დაჯილდოებულია ისრაელის საელჩოს საპატიო სიგელით. კონკრეტულ დაპირებებს წინ მისი საკრებულოში გატარებული 8-წლიანი მუშაობის ანგარიში ახლავს.
„არ არსებობს თემში პიროვნება, რომლის თხოვნა არ გამეთვალისწინებინოს და მაქსიმალურად არ მეცადა შესაძლებლობის ფარგლებში დახმარების გაწევა“.
რაც შეეხება მომავალი 4 წლის საარჩევნო პროგრამას:
ოსეფაიშვილი „სახელმწიფო და არასამთავრობო სექტორთან და მოსახლეობის მხარდაჭერით“ აპირებს სოფლის გაზიფიცირების ქსელის მოწყობას; ხევის თემის სოფელ ხევში ადმინისტრაციული შენობის აგებას, სადაც კლუბი და ბიბლიოთეკა უნდა განთავსდეს; სასოფლო გზების რეაბილიტაციას; წყალმომარაგების სიტემების რეაბილიტაციას; სოციალურად დაუცველი მოსახლეობის დახმარებას; მეფუტკრეობის კოოპერატივის ჩამოყალიბებას და მეფუტკრეობის განვითარებას, პროდუქციის რეალიზაციაში ხელშეწყობას; მოსახლეობის მეურნეობებში რემონტატული ჯიშის მარწყვის და ბოსტნეული კულტურების ფართობების მოწყობაში დახმარებას; ქეციმერას მიმართულებით, სადაც მოსახლეობას მიზომილი აქვს საკარმიდამო ნაკვეთები ფართობების გაკულტურებას და კაკლის ახალი ჯიშის „ჩერის“ გაშენებაში ხელშეწყობას; სოფელში სავაჭრო ობიექტის გახსნაში ხელშეწყობას.
ამავე პროგრამაში ვკითხულობთ: „ტურიზმის განვითარების ხელშეწყობა არსებული და ახალი სასტუმრო სახლების მოწყობაში დახმარება და ამ კუთხით მოსახლეობის სამთავრობო და არასამთავრობო პროექტების ჩართვაში დახმარება; ყოველ წელს, ბრწყინვალე შვიდეული კვირაში, პასკის ფესტივალის ჩატარება; ხევის განვითარების ფონდის შექმნა; სოფელში არსებული ხე-ტყის გადამამუშავებელი საწარმოს ფუნქციონირების ხელშეწყობა; საყოფაცხოვრებო ნარჩენების სოფლიდან გატანის ორგანიზების ხელშეწყობა; სოფლის საჯარო სკოლის თანადგომა; სკოლის ეზოში არსებული სკოლის ძველი შენობის რეაბილიტაცია და სააქტო დარბაზის მოწყობა; სკოლისთვის პიანინოს შეძენა. მოსწავლეთა მუსიკალური განათლების ხელშეწყობა; ახალგაზრდული ცენტრის თანამედროვე ტექნიკით აღჭურვა, მოედნების მოწყობა და სხვადასხვა სპორტული ღონისძიებების ჩატარება; სოფლის მოსახლეობის აქტიური ჩართვა ადგილობრივი თვითმმართველობის საქმიანობაში; თვეში ერთხელ სოფლის კრებების ჩატარება, სოფლის პრობლემის განხილვა და საკრებულოს მოწოდებული გადაწყვეტილებების გაცნობა; სამივე სოფელში საინფორმაციო დაფების განთავსება; პენსიონერები და მათ შორის მზრუნველობა მოკლებული მარტოხელა პენსიონერთა დახმარება, შშმ პირთა დახმარება“.
ზაურ ოსეფაიშვილის გზავნილში ასევე აღნიშნულია, რომ ხევში, რამდენიმე ოჯახში დაირგო ბულგარული წიწაკის ნერგები:
„რამდენიმე ოჯახში დაირგო ბულგარული წიწაკის ნერგები და თუ გაამართლებს, მომავლ წელს უფრო მეტ ოჯახებს მოვიცავთ“ _ წერს ოსეფაიშვილი.
ამავე გზავნილში ხაზგასმულია რომ ხევის თემში, სოფელ ბჟოლიეთში სამ ოჯახს ესპანური მარწყვის „სან ადრესის“ 400 ძირი ნერგი გადასცეს და თუ ნერგებმა კარგად იხარეს, დაგეგმილია კიდევ 20 ოჯახში მოაწყონ ნაკვეთები.
„მე პასუხისმგებელი ვარ თითოეულ ჩემს სიტყვაზე და ნებისმიერ დაინტერესებულ პირთან შემიძლია ზემოდ თქმულზე საუბარი“, _ აღნიშნავს დეპუტატობის კანდიდატი, რომლის საარჩევნო პროგრამა მართლაც შთამბეჭდავია, თუმცა, რა სახსრებით აპირებს ოსეფაიშვილი უამრავი ზემოთ ჩამოთვლილი მასშტაბური და ყოვლისმომცველი პროექტების გახორციელებას, რაც ამდენი წლის მანძილზე ვერც ერთმა ხელისუფლებამ ვერ მოახერხა, პროგრამაში განმარტებული არ არის.
ამავე სოფელში დამოუკიდებლად კიდევ ერთი კანდიდატი, გოჩა თოდრია იყრის კენჭს. ჩვენთან საუბრისას ამბობს, რომ კონკრეტულ დაპირებები და საარჩევნო პროგრამა არ აქვს:
„მე ჩემს ამომრჩეველს მხოლოდ მაქსიმალური ყურადღების მიქცევას ვპირდები. გავაკეთებ იმას, რაც მაჟორიტარ დეპუტატს ევალება შესაძლებლობების ფარგლებში. ამას გავაკეთებ მთავრობის დახმარებით, რადგან მე ოპოზიციას არ წარმოვადგენ და ამ ხელისუფლების მხარდამჭერი ვარ. კონკრეტულ დაპირებებს კი არ გავცემ, რადგან ეს ამომრჩევლის მოსყიდვაა„, _ აღნიშნა ჩვენთან საუბრისას თოდრიამ.
ბუკისციხე-იანეულის დამოუკიდებელი მაჟორიტარი დეპუტატობის კანდიდატმა კოტე სიხარულიძემ ჯერ გვითხრა, რომ ტელეფონი არ იჭერდა, შემდეგ ჩვენს სატელეფონო ზარებს არ უპასუხა, მოგვიანებით კი გვიპასუხა და გვითხრა, რომ არ ეცალა, საქმე ჰქონდა და როცა მოიცლიდა, თავად დარეკავდა(?!)
კიდევ ერთი დამოუკიდებელი კანდიდატი ამავე სოფელში იოსებ ბერიშვილი ამბობს, რომ ამომრჩეველს სამართლიანობას პირდება:
“8 წელი ვემსახურებოდი ამ ორ სოფელს. იციან რასაც ვაკეთებდი და რის გამკეთებელი ვარ. ვპირდები მოსახლეობას, რომ სამართლიანობა აღდგება და არ იქნება ხალხის გამორჩევა გვარის, ნათესაობის და კლასელობის მიხედვით. გაჭირვებული ხალხის გვერდში ვიდგები“, _ გვითხრა ბერიშვილმა.
დამოუკიდებელი დეპუტატობის კანდიდატი შუასურებში იაშა შათირიშვილი ამბობს, რომ „თუ კაცი მოინდომებს, ბევრი რამის გაკეთებაა შესაძლებელი“:
„ვპირდები იმას, რომ გავაკეთებ გაფუჭებულ წისქვილს, გავარკვევ რატომ მოუხსნეს ადამიანებს სოციალური დახმარება, გამგეობამდე მივიტან ამბავს იმის შესახებ, რომ სოფელში გზებია გასაკეთებელი _ ისინი საწვავს გამოყოფენ. ბევრი რამის გაკეთებაა შესაძლებელი, თუ კაცი მოინდომებს და სწორედ ეს არის ჩემი საარჩევნო პროგრამა,“ _ გვითხრა შათირიშვილმა.
ზემო სურების დამოუკიდებელმა დეპუტატობის კანდიდატმა ლევან ლომინეიშვილმა ჩვენთან საუბარი არ ისურვა და აღნიშნა, რომ „ამ ეტაპზე არანაირ კომენტარს არ აკეთებს“.
ზოტის საარჩევნო ოლქში რეგისტრირებულ კანდიდატთან სულიკო რამიშვილთან დაკავშირება შეუძლებელი აღმოჩნდა _ მას ტელეფონი გამორთული ჰქონდა.
