“წყალი გვინდა, რომ დავლიოთ და ტროტუარი გვინდა, რომ ვიაროთ!“ _ რას ითხოვენ აღმაშენებლის ქუჩის მცხოვრებლები

ოზურგეთის ერთ-ერთი მთავარი ქუჩა, რომელსაც ადრე 1905 წლის სახელი ეწოდებოდა, ახლა აღმაშენებლის სახელდებით არის ცნობილი. აქ მცხოვრებლები, როგორც თავად ამბობენ, ამით ამაყობენ და ქუჩის კონკრეტულ მონაკვეთზე, წყლის გაყვანას და ტროტუარის დაგებას ითხოვენ.

ზოგადად, აქაურები, დიდი ხანია, გამოთქვამენ უკმაყოფილებას, რომ მხოლოდ ჭების ამარა არიან და არ არიან წყალმომარაგების სისტემაში ჩართულები. ხოლო ტროტუარი, დიდი ხანია, არ არსებობს. მათივე თქმით, კონკრეტულ მოთხოვნებზე, ძირითადად, მხოლოდ საარჩევნო დაპირებებით შემოიფარგლება ხელისუფლება.

_ მობრუნდები, წყალი არ გვაქვს; მიბრუნდები _ ტროტუარი არ არსებობს. აღმაშენებლის ქუჩაა ეს, ქალაქის დიდი ქუჩა, საიდანაც შემოდიან ოზურგეთში და ასევე, გადიან ქალაქიდან. მარტო ამიტომ უნდა იყოს მთავარი ყურადღება გამახვილებული. აქვე, გაკირულთან (ადგილის სახელწოდებაა. ავტ.) სადაც წითელმთის გადასახვევია, მოქმედი მაღაზიაა. აქამდე გამოიყვანეს წყალი ბეგლარ სიორიძის მერობის დროს. მაშინ გვითხრეს, რომ მომდევნო წელს გააგრძელებდნენ, თუმცა, დასრულდა არჩევნები და მას შემდეგ ამ საკითხზე სასაუბროდ აქ არავინ გამოჩენილა. წყალი გვინდა, რომ დავლიოთ და ტროტუარი გვინდა, რომ ვიაროთ _ ესაა ჩვენი სამართლიანი მოთხოვნა, _ გვეუბნებიან აქ მცხოვრებლები.

კითხვაზე, თუ მაშინდელი არჩევნების შემდეგ არავინ იკითხა ამბავი, მას შემდეგ არაერთხელ ჩატარდა არჩევნები და თუ შეახსენეს მომდევნო ხელისუფალთ ამ პრობლემის შესახებ, აღმაშენებლის ქუჩის მცხოვრები, ჟანა ტაკიძე გვპასუხობს:

_ პირადად მე არ წავსულვარ, თუმცა, მერიას აქ მცხოვრებლებმა მიმართეს განცხადებით. დაპირება სულ იყო _ უარი არავის უთქვამს. მაგრამ დაპირებაა საქმე? მომდევნო წელს იქნებაო და რამდენი “მომდევნო წელი” გავიდა, ვინ იცის. არ გვაქვს წყალი, არ გვაქვს ტროტუარი. ამ ორ რაღაცას ვითხოვთ, რახანია და შეხედეთ, თუ არ არის საჭირო? აღმაშენებლის ქუჩაზე ასეთი ოღრო-ჩოღრო და ბალახით დაფარული ტროტუარი უნდა იყოს? _ გვეუბნება ის.

ქალბატონი ჟანა აღნიშნავს, რომ 61 წელია, აქ ცხოვრობს და არ ახსოვს, ამ მონაკვეთზე წყალგაყვანილობა გაეკეთებინოთ:

_ ჩვენ ჭა გვაქვს და მთელი ცხოვრება ამით ვსარგებლობთ. კომუნისტების დროიდან ასეა. კიდევ კარგი, არ შრება. წყალი სამიოდე მეტრის სიღრმეზეა. უფრო ახალგაზრდა რომ ვიყავი, ჩავდიოდი და მე თვითონ ვწმენდდი. წყალია _ სვამ, რეცხავ, ჰიგიენის დაცვის უპირველესი საშუალებაა. ამიტომ მუდამ იმის მცდელობაში ვიყავი და ვარ, როგორმე სუფთა ავზი ჰქონოდა, _ იხსენებს ის.

“გვერდით აკაკი ბაქრაძის ქუჩაა. იქ როცა გაიყვანეს წყალი, ვითხოვეთ, რომ მოეცათ უფლება, ჩვენც გამოგვეყვანა, მაგრამ არ დაგვრთეს ნება. მას შემდეგ ვართ ასე და სანამ ვიქნებით, არ ვიცით. ამ ტროტუარზე კიდევ, თუ ამას ტროტუარი ჰქვია, საღამოს ასაკოვანი ადამიანი უსაფრთხოდ ვერ გაივლის. ახალგაზრდაც ადვილად შეიძლება, აღმოჩნდეს ამ ორმოში”, _ გვიყვებიან აქ.

აღმაშენებლის ქუჩაზე, არაერთგან თავღიაა მიწისქვეშა კომუნიკაციების ჭები, რომლებიც აშკარა საფრთხის შემცველია და საბედისწეროც შეიძლება გახდეს აქ გამვლელისთვის. კონკრეტულად, აღმაშენებლის ქუჩის ნომერ 138 სახლის პირდაპირ, ტროტუარსა და ცენტრალურ გზას შორის, მდებარე ჭას, მთლიანად აქვს სახურავი ახდილი. განსაკუთრებით საშიშია ღამით, თუნდაც, განათების არსებობის პირობებშიც.

სამწუხაროდ, აქ მცხოვრებლებიც გულგრილად უყურებენ ამ ფაქტს.

_ მე რა ვიცი, რატომ არის თავღია? ეტყობა, ვიღაცამ მოიპარა სახურავი. მოვიდნენ და გააკეთონ, _ გვითხრა ერთ-ერთმა მამაკაცმა, რომელმაც ვინაობა არ გაგვიმხილა.

_ რომ ჩავარდეს ადამიანი ან პირუტყვი, რაც ადვილად შეიძლება მოხდეს, მერეც ასე იტყვით?

_ არ ვიტყვი, ბატონო, მაგრამ ჩემი გასაკეთებელია? რატომ მეკითხებით, ვინ ვარ? ვისაც ევალება, გააკეთოს…

_ ხომ შეიძლება, ვიდრე “ვალდებული” მოვა, რაიმე იღონოთ და რაღაც დააფაროთ დროებით? აქვე, ახლოს, ჩვენ ვნახეთ მსგავსი ჭა, რომელსაც დაფარებული აქვს თუნუქის ფირფიტა და თან აქვე, ჯოხია დარჭობილი. პრიმიტიულად, მაგრამ მაინც, დროებით, საფრთხისგან იცავს გამვლელს…

_ რას გადამეკიდეთ? _ გაგვიბრაზდა მამაკაცი აღმაშენებლის ქუჩაზე. არადა, “გურია ნიუსი” აქ სწორედ ამ ქუჩის მცხოვრებთა სატელეფონო ზარის შემდეგ მივიდა.

აღმაშენებლის ქუჩაზე მცხოვრებმა ემზარ გოთუამ გვითხრა, რომ ჭა აქვთ და სასურველია და მუდამ აქვთ სურვილი, გამდინარე წყალი მათ ოჯახებშიც იყოს:

_ აქ მოსკოვის ქუჩის გადასახვევია, აღმაშენებლის ქუჩიდან. იქამდეა წყალგაყვანილობა გაკეთებული. ჩვენთან არც კომუნისტების დროს არ ყოფილა წყალგაყვანილობა. ჭა გვაქვს თითოეულ ოჯახს და ამით ვსარგებლობთ. ყველამ იცის, რომ ჭაზე დამოკიდებულმა ადამიანმა ძალზე მომჭირნედ უნდა იხმაროს წყალი. ჯერჯერობით, აქ მცხოვრებლებმა ვერ მიაღწიეს იმას, რომ წყალი გამოეყვანათ. მე, პირადად, არ ვყოფილვარ, თუმცა, აქ მცხოვრები ქალბატონები მუდამ აქტიურობდნენ და განცხადებით მიდიოდნენ ხელისუფლებასთან. გაკეთებას მუდამ გვპირდებოდნენ, მაგრამ არაა დღემდე არაფერი გაკეთებული და არც რაიმე მსგავსი არ დაწყებულა, _ გვეუბნება გოთუა.

აქ მცხოვრებლები, ასევე, ამბობენ, რომ როცა გაწვიმდება, უზარმაზარი გუბეები დგას, სიცხეში კი, მტვერი და ბუღია.

_ გვაქვს სამართლიანი მოთხოვნა, ლამაზად და კორექტულად ვამბობთ, სანამდე ვიყოთ დაპირების ამარა? ქალაქის ერთ-ერთი მთავარი ქუჩაა. რას ჰგავს. ასეთ ქუჩაზე რომ ტროტუარი არ იარსებებს, ქალაქის რა გალამაზებაზე გვესაუბრებიან? _ გვეუბნებიან აქ მცხოვრებლები.

რაც შეეხება ყოფილი სტამბის შენობის მარცხენა მხარეს მდებარე დანჩენკოს ქუჩას, სადაც თითქოს, ასევე, წყლის პრობლემა არსებობს, არა ერთ ოჯახში ვიკითხეთ და გვითხრეს, რომ წყალი აქვთ და ყოველთვის მოედინება.

“გურია ნიუსი” ოზურგეთის მუნიციპალიტეტის მერიის ინფრასტრუქტურის სამსახურის უფროსს, გოჩა აბაშმაძეს დაუკავშირდა და მოსახლეობის მიერ დასახელებული პრობლემების შესახებ ესაუბრა:

_ გისმენთ ახლა და მართლა გულწრფელად გეუბნებით, არ მახსოვს, რაც აქ ვარ, კონკრეტულად ამ ქუჩის აღნიშნული მონაკვეთიდან ვინმეს მერიისთვის განცხადებით მოემართოს. ვერ დავიჩემებ მთლად, თუმცა, ხვალვე მოვიკითხავ ჯერ მერიაში თუ არის ბოლო პერიოდში განცხადება შემოსული, მერე კი, აუცილებლად მივალთ ადგილზე. უფრო სწორად, ხვალვე მივალთ ადგილზეც. როცა ასეთი ხასიათის განცხადებები შემოდის, ჩვენ მაშინვე მივდივართ ადგილზე, ვეცნობით პრობლემის არსს და შემდეგ ვგეგმავთ, რომ პროცედურების და ვადების დაცვით გავაკეთოთ ყველაფერი. წყლის გამოყვანა უცბად არ ხდება. ტროტუარების შესახებაც ვიკითხავ და უახლოეს პერიოდში გიპასუხებთ. ასე უცებ, ერთ დღეში დაზუსტებული პასუხის გაცემა არ შემიძლია. ვიმეორებ, მაქსიმალურად ვეცდები, ხვალვე მივიდე ადგილზე და ყველაფერი გავარკვიო, _ გვითხრა გოჩა აბაშმაძემ.