ლანჩხუთში ნაკლებად მოიძებნება მრავალბინიანი საცხოვრებელი სახლი, რომლის საძირკველიც წვიმის დროს არ იტბორებოდეს და სარდაფები წყლით არ ივსებოდეს, რაც იქ მცხოვრებ ადამიანებს დამატებით პრობლემებს უქმნის.
“წვიმის დროს სარდაფები ვენეციას ჰგავს, წყლით ივსება, ფაქტობრივად, წყალშია საძირკველი.
როგორც ჩანს, ფართომასშტაბიანი სარემონტო სამუშაოებია ჩასატარებელი, რასაც მოსახლეობა საკუთარი ძალებით ვერ შეძლებს. არადა, შედეგი დადგება სავალალო. კარგი იქნება, თუ მოგვაქცევენ ყურადღებას შესაბამისი სამსახურები და დაგვეხმარებიან”, _ უკვე წლებია, ამბობენ იმ კორპუსთა მობინადრეები, რომელთაც ზემოთ ნახსენები პრობლემა აწუხებთ და ადგილობრივი ხელისუფლებისგან პრობლემის მოსაგვარებლად დახმარებას ითხოვენ. თუმცა, ირკვევა, რომ, ჯერჯერობით, უშედეგოდ.
როგორც ჩანს, გამონაკლისი ამ მხრივ ქალაქში, არც აგარაკის უბანში, კუპრეიშვილის ქუჩაზე მდებარე მრავალბინიანი საცხოვრებელი სახლებია. აქაური მოსახლეობა წლებია, პრობლემის თაობაზე ხმამაღლა საუბრობს და პრობლემის აღმოსაფხვრელად ხელისუფალთ რეაგირებისკენ მოუწოდებს. “გურია ნიუსი”, მოსახლეობის თხოვნით, ჯერ კიდევ 2015 წელს წერდა კუპრეიშვილის ქუჩაზე მდებარე #12 კორპუსის საძირკველში არსებულ რთულ ვითარებაზე.
“მიუხედავად ბევრი შეწუხებისა და გამგებელთან შეხვედრისა, ისევ ისეა ყველაფერი, მხოლოდ დაპირებები, მეტი არაფერი. მოვლენ, გადაიღებენ ფოტოებს და წავლენ. თურმე, გეოლოგები ყოფილა მოსაყვანი. ეს ჩვენც ვიცით, დროზე უნდა აქაურობას შველას, სანამ კორპუსი თავზე არ ჩამოგვენგრა.
თავიდან, ჩვენს სახლს ბინა არ ჯობდა, თუმცა, ახლა რა დღეში ვართ, კი ხედავთ. შეცდომა თავშივე იქნა დაშვებული მშენებლების მიერ. იმდენი აუთვისებელი ტერიტორია იყო მაშინ ლანჩხუთში და გაუგებარია, რატომ ააშენეს აქ სახლი, პირდაპირ “საცივის ფეხზე”? სარდაფი სულ წყლითაა სავსე, ზამთარ-ზაფხულ წყალი დგას საძირკველში.
გაიგეთ ყველამ, ამ სახლში ჩვეულებრივი ადამიანები ვცხოვრობთ, ბავშვებიც გვყავს და მოგვაქციეთ ყურადღება! მაინცდამაინც უნდა დაინგრეს კორპუსი, რომ მოგვხედონ?! კარს ვერ ვაღებთ ნორმალურად, მწერებისგან დამცავ ბადეებს ვაფარებთ ფანჯრებსა და კარებზე, რომ რაიმე არ შემოვიდეს სახლში”. ყველა მხრივ უკიდურეს მდგომარეობაში ვართ, დაბლა წყალი გვითხრის საძირკველს, მაღლა ქარი ჭერს გვხდის”, _ ამბობდნენ მაშინ კუპრეიშვილის #12 მრავალბინიანი სახლის მობინადრეები, რაზეც ადგილობრივი ხელისუფლების მხრიდან იყო განმარტება, რომ მუნიციპალიტეტის ხელმძღვანელობა საქმის კურსში იყო და მდგომარეობის გამოსასწორებლად სათანადო ზომების გახორციელებაც ჰქონდათ დაგეგმილი:
“ამ საკითხს ძალიან კარგად ვიცნობთ, სიტუაცია, მართლაც რთულია. ველოდებით გეოლოგების ჩამოსვლას, ანალოგიური სიტუაცია სხვაგანაც გვაქვს. აქ წყალი პირდაპირ სახლის ქვეშ ამოდის და თუ სპეციალისტებმა არ მოგვცეს დასკვნა და შემდგომი სამოქმედო გეგმა, ისე ჩვენ ვერაფერს ვიზამთ”.
ირკვევა, რომ ამ წლების მანძილზე ნახსენებ მრავალბინიან სახლს სახურავი კი შეუცვალეს, მაგრამ საძირკველში არსებული პრობლემა კვლავაც აქტუალურია და სახლის სარდაფი ისევ წყლითაა სავსე.
საგულისხმოა, რომ იგივე პრობლემა უდგას კუპრეიშვილის ქუჩაზე მდებარე სხვა კორპუსსაც. მოქალაქე ლევან ხიტირი ერთ-ერთია, ვინც აგარაკის უბანში მდებარე კორპუსების პრობლემაზე საჯაროდ აკეთებს აქცენტს. მან ფეისბუქზე, ჯგუფში “This is ლანჩხუთი” დაწერა კიდეც აღნიშნულის შესახებ:
“ჩვენი ერთ-ერთი პრობლემაა, რომ ბინის სარდაფები წვიმის დროს ივსება წყლით. დამპალია საძირკველი, საყრდენი კედლები სველია, ბევრჯერ ამოგვიწმენდია, როცა გავსებულა წყლით. ეს მოსაგვარებელია აუცილებლად, თორემ, ღმერთმა არ ქნას, გამოეშალოს საძირკველი სახლს. კვალი გაკეთდა წინა მხარეს და მეორე კვალიც უნდა გაკეთდეს. იმედია, ამას მიექცევა ყურადღება აუცილებლად”, _ დაწერა ლევან ხიტირმა.
ამავე პრობლემაზე საუბრობს კუპრეიშვილის ქუჩაზე მდებარე #12 მრავალბინიანი საცხოვრებელი სახლის მობინადრე ნონა სივსივაძეც: “წლებია, ეს პრობლემაა ჩვენს ბინაში, პატრონი არავინაა, სარდაფში როცა ჩავდივარ დასასუფთავებლად, კედელს რომ მივეკარები, ქვები ცვივა უკვე, ერთ სადარბაზოში კიბეც ჩაინგრა და არმატურებიც ჩანს უკვე დიდი ხანია, ტელევიზიითაც გაშუქდა ეს პრობლემა, მაგრამ შედეგი რაა?! ღმერთმა ყველა დაიფაროს ცუდისგან და რამე რომ მოხდეს, მერე ყველა დაიწყებს ვაი-ვიშს და დამნაშავის ძებნას, მაგრამ ეძებონ მერე, რამდენიც უნდათ. ზოგი რომ ენას არ იღებს მიკვირს, რის იმედი აქვთ, არ ვიცი… 20 წელია, იმედი რჩება იმედად, რამდენ ხანს ვიქნებით ასე კიდევ, არ ვიცი. ძაღლი ყეფს, ქარავანი მიდისო, ისეა! სასწაული რომ მოხდება, მერე გვიანი იქნება, კორპუსი გადაიხურა თურმე, რად უნდა სახურავი, ძირი რომ გამომპალია?
სარდაფში რომ წყალი ჩადის, ეს იქ მცხოვრებლების ბრალიცაა, მაგრამ, რაც ჩემს კორპუსში ხდება, ეს მოსახლეობის ბრალი არაა, მანდ მთელი გეოლოგიური პროცესია, რომელსაც იქ მცხოვრები ხალხი ვერ მოაგვარებს”.
გოჩა ურუშაძის თქმით, “ამ მთავრობას ხმა გინდ მიაწვდინე და გინდ არა, არაფრის გამკეთებლები არიან”.
ნინი შავაძე: “ქალაქის კორპუსებს გაურემონტეს ფასადები წინიდან, უბრალოდ, ღარიბაშვილმა ჩამოიარა დიდის ამბით _ აბა, რა გაკეთდაო. უკანა მხარეს რატომ არავინ გაატარა?! სადარბაზოები ინგრევა, ისეთ ავარიულ დღეშია. კატასტროფულია! მსგავსი არ მინახავს არსად, საერთოდ დანგრეულია!”
“სარდაფი წყლით არის სავსე, წლებია. საძირკველი ინგრევა. ცხოვრება საშიში გახდა. ღმერთმა არ ქნას უბედურება, თორემ მაგენი კი დაიწყებენ თავის მართლებას, მარა ადამიანებს გვეშველება რაიმე? არავინ ყურადღებას არ გვაქცევს”, _ პრობლემაზე საუბრობს კუპრეიშვილის #12-ში მცხოვრები კიდევ ერთი მოქალაქე.
ამჯერად როგორია ადგილობრივი ხელისუფლების პოზიცია მოქალაქეთა მხრიდან გაჟღერებულ პრობლემასთან მიმართებით და რა შედის მათ გეგმებში მის მოსაგვარებლად, ამის გასარკვევად “გურია ნიუსი” ქალაქის მაჟორიტარს კახა კვიტაიშვილს დაუკავშირდა:
“ძლიერი წვიმის დროს, კუპრეიშვილის ქუჩის დასაწყისში პირველი მრავალბინიანი სახლი რომაა, ამ კორპუსის სარდაფში ჩაედინებოდა წყალი. ამ ბოლოს დიდი ხანია, არ მოუმართავს არავის. რაც შეეხება #12-ში მდებარე სახლს, იქ იყო გაკეთებული ისე, რომ წყალი მოედინებოდა და გარეთ გადიოდა. თუმცა, მერე ეს ამოივსო. ამ წუთისთვის, როცა მოსახლეობის განცხადება შემოვიდა, ადგილზე ვიყავით მისულები, ტელევიზიაც იყო მოსული. მაშინ მოსახლეობის ნაწილმა თქვა, რომ გეოლოგების არსებულ დასკვნას არ ენდობოდნენ. შემდეგ ამ საკითხზე საუბარი მერის მოადგილესთან თორნიკე ტიკაძესთანაც გვქონდა და გაგზავნილია მოთხოვნა, რომ ხელახლა მოხდეს გეოლოგების მიერ შემოწმება. ჯერ არავინ ჩამოსულა, როგორც მე ვიცი”, _ გვითხრა კახა კვიტაიშვილმა.
ავტორი
