საქართველოს პრეზიდენტის გიორგი მარგველაშვილის წინააღმდეგ, შესაძლოა, სისხლის სამართლებრივი დევნა დაიწყოს. პრეზიდენტს პარლამენტის თავმჯდომარე შესაძლო კორუფციაში ადანაშაულებს და აცხადებს, რომ მარგველაშვილმა შეწყალების უფლება ბოროტად გამოიყენა.
,,პრეზიდენტ მარგველაშვილის მიერ ჩამოყალიბებულ პრაქტიკას შეიძლება ჰქონდეს შემდეგი საფუძველი: – უპასუხისმგებლო დამოკიდებულება, კორუფცია და სამართლდამცავი სისტემის მიზანმიმართული ნგრევა“,_ განაცხადა კობახიძემ.
პრეზიდენტის მიმართ გამოთქმულ ბრალდებებს მინისტრთა კაბინეტიდანაც გამოეხმაურნენ. მათ შორის, საკითხთან დაკავშირებით კომენტარი გააკეთა ჯანდაცვის მინისტრმა დავით სერგეენკომ, რომელმაც კორუფციული ნიშნის შემცველი ბრალდების გამოძიების აუცილებლობაზე ისაუბრა.
„პარლამენტის თავმჯდომარემ შემაჯამებელ შეფასებაში დაასახელა არა ერთი, არამედ სამი შესაძლო თეორიული ვერსია: ნაკლები პასუხისმგებლობა, კორუფცია და მიზანმიმართული ქმედება სახელმწიფო ინსტიტუციის ჩამოშლისა. მან ჩამოთვალა თეორიულად დასაშვები სამი ვერსია. კორუფცია, ჩემი აზრით, არის ტერმინი, რომელსაც შემდგომი კვლევა სჭირდება“,_განაცხადა სერგეენკომ.
საქართველოს პრეზიდენტი გიორგი მარგველაშვილი ბრალდებებს პასუხობს. მისი თქმით, უმჯობესია, თუ მის მიმართ სამართლებრივი დევნა დაიწყება და ამ ყველაფრის ლუსტრაცია მოხდება.
„მე მოსურნე ვარ ასეთი რამის, რადგან კიდევ უფრო ლუსტრაცია მოხდება ამ ყველაფრის. ეს საზოგადოება რაღაცებს ატარებს, რაღაცების შეჩვევა ხდება. უკეთესია, თუ რადიკალური ნაბიჯები გადაიდგმება, ვიდრე ასე, ყურს რომ აჩვენებ“,_განაცხადა მარგველაშვილმა.
,,გურია ნიუსი“ დაინტერესდა, რას ფიქრობს მმართველი გუნდი პრეზიდენტის შესაძლო სამართლებრივ დევნაზე. ზაზა პაპუაშვილის თქმით, იმ შემთხვევაში, თუ პრეზიდენტის ბრალეულობა დადასტურდება, მას სამართლებრივი პასუხისმგებლობა აუცილებლად დაეკისრება. ამასთან, პაპუაშვილი პარლამენტის თავმჯდომარეს გააზრებული განცხადებების გაკეთებისკენ მოუწოდებს.
,,მაღალი თანამდებობის პირებს გააზრებული უნდა ჰქონდეთ რას ლაპარაკობენ. ბრალდებების დამადასტურებელი არგუმენტები და ფაქტები უნდა გააჩნდეთ. სხვა შემთხვევაში მათი სიტყვები არასერიოზულ განცხადებად ჩაითვლება. თუ პრეზიდენტის ქმედებების მამხილებელი არგუმენტები არსებობს, რასაკვირველია, ვინც არ უნდა იყოს პასუხისმგებლობა უნდა დაეკისროს, თუმცა, სანამ პრეზიდენტს პასუხისმგებლობას დავაკისრებთ, კარგი იქნებოდა ის ადამიანები, რომლებიც სააკაშვილთან ერთად ღუპავდნენ ქვეყანას, ჩაგვესვა იქ, სადაც მათი ადგილია“, _ გვითხრა პაპუაშვილმა.
პოლიტიკის ექსპერტი გია ხუხაშვილი მიიჩნევს, რომ პარლამენტის თავმჯდომარის მიერ გამოთქმულ ბრალდებას სამართლებრივი რეაგირება აუცილებლად მოჰყვება. მისი თქმით, იმ შემთხვევაში თუ პრეზიდენტის ბრალდება არ დადასტურდა, პასუხისმგებლობა კობახიძეს უნდა დაეკისროს.
,,პარლამენტის თავმჯდომარის მძიმე ბრალდებებს, ბუნებრივია, სამართლებრივი რეაგირება მოჰყვება და იმ შემთხვევაში, თუ არ დადასტურდა კორუფციული ბრალდება, მაშინ თავად კობახიძემ უნდა აგოს პასუხი. პარლამენტის თავმჯდომარის სიტყვებს დიდი წონა უნდა ჰქონდეს. კობახიძის ჰაერზე საუბარი ქვეყნისთვის ძალიან სერიოზული პრობლემა იქნება“, _ გვითხრა ხუხაშვილმა.
საქართველოს მეოთხე პრეზიდენტზე სისხლის სამართლებრივი დევნა, ჯერჯერობით, არ დაწყებულა, თუმცა, შესაძლოა, გიორგი მარგველაშვილის წინააღმდეგ საქმე უახლოეს მომავალში აღიძრას.
