ორი თვის წინ, ქალაქ ოზურგეთში, ძალოვნების მიერ ერთ-ერთი ყველაზე ხმაურიანი სპეცოპერაცია ჩატარდა და რამდენიმე თანამდებობის პირი ხელბორკილებით ოზურგეთიდან თბილისში, მოდულის შენობაში გადაიყვანეს.
საზოგადოებისთვის უკვე კარგად არის ცნობილი, რომ სახელმწიფო უსაფრთხოების სამსახურის ანტიკორუფციული სააგენტო ოზურგეთში არსებული კარიერების თემას რამდენიმე თვის განმავლობაში სწავლობდა. ბოლოს კი სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა აღნიშნული საქმის შესწავლის შემდეგ გარემოსდაცვითი ზედამხედველობის დეპარტამენტის დასავლეთის რეგიონული სამმართველოს გურიის გარემოსდაცვითი პატრულირებისა და სწრაფი რეაგირების განყოფილების თანამშრომლები დააკავეს, რასაც აღნიშნული სამსახურის უფროსის გურამ ასათიანისა და აჭარის სამმართველოს უფროსის ქემალ ხალვაშის სავარძლები შეეწირა.
ჩვენი წყაროს ინფორმაციით, სუს-ი გარემოსდაცვითი ზედამხედველობის დეპარტამენტის დასავლეთის რეგიონული სამმართველოს გურიის გარემოსდაცვითი პატრულირებისა და სწრაფი რეაგირების განყოფილების საქმიანობას მათი უფლება-მოვალეობის შესრულების დროს ჩუმად აკონტროლებდა. რომლის ამსახველი ვიდეო და ფოტო მასალებიც გააჩნიათ.
სახელმწიფო უსაფრთხოების სამსახურის მიერ გავრცელებულ ოფიციალური განცხადებაში აღნიშნულია, რომ სამსახურებრივი უფლებამოსილების ბოროტად გამოყენებისა და სამსახურებრივი სიყალბის ფაქტებზე, გარემოსდაცვითი ზედამხედველობის დეპარტამენტის დასავლეთის რეგიონალური სამმართველოს გურიის გარემოსდაცვითი პატრულირებისა და სწრაფი რეაგირების განყოფილების თანამშრომლები: გენო ქ., ემზარ ც., მამუკა ა., ირაკლი ხ. და რამაზ კ. დააკავეს.
_ გამოძიებამ დაადგინა, რომ გურიის გარემოსდაცვითი პატრულირებისა და სწრაფი რეაგირების განყოფილების თანამშრომლებს: გენო ქ-ს, ემზარ ც-ს, მამუკა ა-ს, ირაკლი ხ-ს და რამაზ კ-ს., საჯარო ინტერესის საწინააღმდეგოდ, დანაშაულებრივად დაუკავშირდნენ სხვადასხვა კომპანიების წარმომადგენლები და მათ სამოქმედო ტერიტორიაზე, უკანონო ქმედების ჩადენის შედეგად, მატერიალური გამორჩენის მიღების მიზნით შეუთანხმდნენ, რომ მოახდენდნენ ინერტული მასალის _ ქვიშა-ღორღის ლიცენზიის გარეშე მოპოვებას. გენო ქ-მ, ემზარ ც-მ, მამუკა ა-მ, ირაკლი ხ-მ, და რამაზ კ-მ, 2017-2018 წლებში არ განახორციელეს კანონით გათვალისწინებული მათზე დაკისრებული მოვალეობები და აღნიშნული კომპანიების წარმომადგენლების უკანონო ქმედებებში მხილებისა და სადამსჯელო ღონისძიებების ნაცვლად, თავისი უმოქმედობით და ყალბი დოკუმენტების შედგენის შედეგად, საშუალება მისცეს იმავე კომპანიების წარმომადგენლებს, მოეხდინათ დიდი ოდენობით ინერტული მასალის, ქვიშა-ღორღის ლიცენზიის გარეშე მოპოვება, რამაც სახელმწიფოს კანონიერი ინტერესის არსებითი დარღვევა გამოიწვია.
2018 წლის 29 მარტს გენო ქ. ემზარ ც., მამუკა ა., ირაკლი ხ. და რამაზ კ. დაკავებული იქნენ ბრალდებულის სახით.
გამოძიება სამსახურებრივი უფლებამოსილების ბოროტად გამოყენების და სამსახურებრივი სიყალბის ფაქტებზე მიმდინარეობს(საქართველოს სსკ-ის 332-ე მუხლის პირველი ნაწილით და 341 მუხლით), რაც სასჯელის სახით ითვალისწინებს თავისუფლების აღკვეთას ოთხ წლამდე ვადით, _აღნიშნულია განცხადებაში.
საინტერესოა ერთი დეტალიც _ ასეთი ხმაურიანი დაკავების შემდეგ, ბრალდებული პირები რამდენიმე დღეში სახლში გამოუშვეს და გირაოს სახით 2 000 ლარი გადაახდევინეს, აქედან გამონაკლისია ერთი პირი _ ი.კ. რომელიც ჩვენი წყაროს ინფორმაციით, დანაშაულს არ აღიარებს და მას 4 000 ლარიანი გირაო შეეფარდა.
სასამართლო პროცესები 23 მაისს უნდა დაწყებულიყო თბილისში, თუმცა, როგორც გვითხრეს, კიდევ ერთი თვით, ივნისის ბოლოსთვის გადაიწია.
თუ როგორ წარიმართება სასამართლო პროცესები, აღიარებენ თუ არა ბრალდებული პირები წარდგენილ ბრალდებას, თუ დაასახელებენ სხვა პირებს, ვინც ამასთანავე უშუალოდ კავშირში იყო კარიერების თემასთან, ეს, ჯერჯერობით, უცნობია. თუმცა, შესაძლოა, პროცესები მეტად საინტერესოდ წარიმართოს და საქმეში “სხვა“ პირებიც გამოჩნდნენ.
ხდებოდა თუ არა ქვიშა-ხრეშის მოპოვება ოზურგეთის მუნიციპალიტეტში უკანონო გზით? _ ამ კითხვაზე ოზურგეთის მოსახლეობას მიაჩნიათ, რომ უკანონოდ ამოღების გარდა, ყველაზე დიდი ფული აქ ტრიალებს. სადაც აქვთ წილები, როგორც სახელისუფლებლო სტრუქტურების წარმომადგენლებს, ასევე, ავტორიტეტულ სახეებსაც, მათ კი ძალოვნებიც მფარველობს. ჩვენი წყაროს ინფორმაციით, ყოფილა უამრავი ფაქტი იმისა, როგორ სთხოვენ ე.წ. “კაი ბიჭები“ „ატკატებს“ კარიერების მფლობელებსაც, რის გამოც, ეს უკანასკნელები პოლიციას მიმართავენ კიდეც, თუმცა, უშედეგოდ.
ოზურგეთის მაჟორიტარი დეპუტატი არჩილ თალაკვაძე “გურია ნიუსთან“ ამბობს, რომ თუ ვინმეს აქვს კონკრეტული ინფორმაცია მიმდინარე საქმესთან დაკავშირებით, მიმართოს პროკურატურას:
_ შესაძლოა, ასევე, რაიმე უკანონო ფაქტების შესახებ ფლობდეთ ინფორმაციას, სხვა პირების ბრალეულობის საკითხი იყოს, თუ მსგავსი ფაქტები ან გარემოებები და მტკიცებულებები თქვენთვის ცნობილია, რომელიც მიგაჩნიათ, რომ გამოძიების ფარგლებში არ ყოფილა შესწავლილი, ძალიან გთხოვთ, ეს ინფორმაცია გადასცეთ პროკურატურას და შესაბამისს საგამოძიებო ორგანოებს, _აღნიშნავს თალაკვაძე და ხმაურიან სპეცოპერაციასთან დაკავშირებით კომენტარს აკეთებს:
_ თუ გსურთ რომ თქვენს მაჟორიტარ დეპუტატს ეს საკითხი ჰქონდეს კონტროლზე, როდესაც ამ ინფორმაციას საგამოძიებო ორგანოებს გაუზიარებთ, მზად ვარ, თვალი მივადევნო ამ ყველაფერს, რომ შესწავლა და გამოკვლევა მოხდეს ობიექტურად.
ის რომ კონკრეტული საჯარო მოხელეები, ბოლო წლების განმავლობაში პასუხისგებაში იქნენ მიცემულნი კორუფციის გამო, კიდევ ერთხელ ხაზს უსვამს, რომ ჩვენი ამოსავალი პრინციპი არის კანონის უზენაესობა და არის პრინციპი, როდესაც ყველა კანონის წინაშე არის თანასწორი. არაერთხელ მითქვამს და კიდევ ერთხელ ვიტყვი, რომ საჯარო ადმინისტრაციის წევრებს _ ხელისუფლების იქნება ეს, ადგილობრივი თუ რომელიმე კონკრეტული საჯარო სამსახურის, ჩვენთვის მიუღებელია, რაიმე კავშირი ჰქონდეს კორუფციასთან, ამიტომ თუ ამ მიმართულებით ჩვენი პოლიტიკა არის მკაცრი, თუ კომპრომისები არ იქნება კორუფციასთან მიმართებაში, ეს არ უნადა იყოს გასაკვირი.
რაც შეეხება ამ კონკრეტულ საქმეს, მე სასამართლოს დასრულებამდე თავს შევიკავებ წინასწარი განცხადებების გაკეთებისგან, მაგრამ დარწმუნებული ვარ, გარემოებების გამოკვლევა და შეფასება მოხდება ობიექტურად, როგორც ბრალდების მხარის, ასევე, დაცვის მხარის, შეჯიბრებითობა სასამართლოში იქნება უზრუნველყოფილი და სასამართლო მიიღებს სამართლიან გადაწყვეტილებას, თუ დამნაშავე არის რომელიმე მათგანი და დანაშული აქვთ ჩადენილი, მათ შორის კორუფციული დანაშაული, რა თქმა უნდა, პასუხისმგებლობას ვერავინ ვერ გაექცევა, _ამბობს თალაკვაძე.
შეგახსენებთ, რომ ოზურგეთში, კარიერებიდან დიდი ოდენობით ინერტული მასალის გატანა ხდება და მისი არასწორი ექსპლოატაციის გამო, მოსახლობას, უმეტეს სოფლებში, საფრთხე ექმნება. ამის გამო ოზურგეთის მუნიციპალიტეტის მოსახლეობამ არაერთ სოფელში გამართა აქცია და გამოხატა პროტესტი.
