წელს, ჩოხატაურსა და ოზურგეთში USAID-ის ადგილობრივი თვითმმართველობის პროგრამა იწყება. ინფორმაცია პროგრამის შესახებ USAID-ის ადგილობრივი თვითმმართველობის პროგრამის ფეისბუქგვერდზე 25 იანვარს გამოქვეყნდა.
“მოხარული ვართ გაცნობოთ, რომ ჩვენ შევარჩიეთ პროგრამის პირველი წლის 11 პარტნიორი მუნიციპალიტეტი საქართველოს 12 რეგიონიდან, რომლებთანაც ვითანამშრომლებთ 2023 წლიდან მუნიციპალური სისტემების, სერვისების და მოქალაქეების ჩართულობის გაუმჯობესებისთვის.
USAID-ის ადგილობრივი თვითმმართველობის პროგრამა ულოცავს ბათუმის, ბოლნისის, ჩოხატაურის, დმანისის, ქუთაისის, ლენტეხის, მარნეულის, მესტიის, ოზურგეთის, რუსთავის და ტყიბულის მუნიციპალიტეტებს. მათ გაიარეს მრავალსაფეხურიანი შერჩევის პროცესი, აჩვენეს მაღალი ინტერესი და მზაობა იმუშაონ მუნიციპალური ეფექტურობის და ანგარიშვალდებულების ამაღლებაზე, სერვისების მიწოდების გაუმჯობესებაზე და გადაწყვეტილებების მიღების პროცესში მოქალაქეების ჩართულობის გაზრდაზე.
ჩვენ უკვე დავიწყეთ პირველი სამუშაო შეხვედრები შერჩეული მუნიციპალიტეტების მერებთან, საკრებულოს თავმჯდომარეებთან, მერიის და საკრებულოს თანამშრომლებთან, იმისთვის, რომ განვიხილოთ და შევთანხმდეთ თანამშრომლობის ძირითად მიმართულებებზე. ჩვენ დამატებით, სულ მცირე 11 მუნიციპალიტეტს ჩავრთავთ პროგრამის გახორციელების მეორე წელს”, _ წერია გავრცელებულ ინფორმაციაში.
საკითხის უკეთ გასარკვევად ჩოხატაურის მერის მოადგილეს, მაია კუტუბიძეს დავუკავშირდით.
“ადგილობრივი თვითმმართველობის პროგრამა ხუთწლიანი ინიციატივაა,რომელიც დაფინანსებულია “USAID საქართველოს” მიერ და მისი ბიუჯეტი 21 მილიონ აშშ დოლარს შეადგენს.
პროგრამის მთავარი მიზანია დეცენტრალიზაციისა და საჯარო მმართველობის რეფორმის მხარდაჭერა, ადგილობრივი თვითმმართველობის ეფექტურობის, ანგარიშვალდებულებისა და გადაწყვეტილების მიღების პროცესში მოქალაქეთა ჩართულობის გაზრდა; ასევე, ინკლუზიური და მომხმარებელზე ორიენტირებული საჯარო სერვისების განვითარების ხელშეწყობა.
ჩვენმა მუნიციპალიტეტმა წარმატებით გაიარა მრავალსაფეხურიანი შერჩევის პროცესი და ჩართული იქნა ამ მეტად მნიშვნელოვანი პროგრამაში.
1 თებერვალს შედგება პირველი შეხვედრა მუნიციპალიტეტის მერთან, საკრებულოს თავმჯდომარესთან, მერიის და საკრებულოს თანამშრომლებთან, სადაც საუბარი იქნება მუნიციპალიტეტის საჭიროებებსა და თანამშრომლობის საკითხებზე“, _ გვითხრა კუტუბიძემ.
ჩვენ სტატიის მზადების პროცესში დავუკავშირდით ოზურგეთის მუნიციპალიტეტის მერიასაც, თუმცა, მერიის პრესსამსახურში გვითხრეს, რომ შეხვედრა მერიის თანამშრომლებსა და პროგრამის წარმომადგენლებს შორის ჯერ არ შემდგარა. შესაბამისად, ინფორმაციას შეხვედრის შემდეგ მოგვაწვდიდნენ.
პროგრამის შესახებ უფრო ამომწურავი ინფორმაციის მისაღებად, USAID-ის ადგილობრივი თვითმმართველობის პროგრამის საჯარო მმართველობის რეფორმის და ინკლუზიური მმართველობის მიმართულების ხელმძღვანელს, ნანიკო წიკლაურს მივმართეთ.
_ რას ითვალისწინებს USAID-ის ადგილობრივი თვითმმართველობის პროგრამა? კონკრეტულად რა გაკეთდება ოზურგეთსა და ჩოხატაურში ? რით დაეხმარება აღნიშნული ღონისძიებები მუნიციპალიტეტებს?
_ USAID-ის ადგილობრივი თვითმმართველობის პროგრამა წარმოადგენს ხუთწლიან ინიციატივას, რომელიც აშშ-ს საერთაშორისო განვითარების სააგენტოს (USAID) დაფინანსებით ხორციელდება.
პროგრამა მიზნად ისახავს საქართველოში მიმდინარე დეცენტრალიზაციის და საჯარო მმართველობის რეფორმის მხარდაჭერას და ადგილობრივ თვითმმართველობებში ეფექტიანობის, ანგარიშვალდებულებისა და მოქალაქეთა ჩართულობის გაზრდას.
USAID-ის ადგილობრივი თვითმმართველობის პროგრამა ოზურგეთის და ჩოხატაურის მუნიციპალიტეტის მერიასა და საკრებულოს, როგორც პროგრამის პირველი წლის პარტნიორ მუნიციპალიტეტებს, მხარს დაუჭერს სამი ძირითადი მიმართულებით, რაც მოიცავს საჯარო მმართველობის და ანგარიშვალდებულების სისტემების და პროცესების გაუმჯობესებას, მათ შორის საკრებულოს საზედამხედველო შესაძლებლობების გაზრდას; მოქალაქეთა საჭიროებებზე მორგებული და თანაბრად მისაწვდომი ადგილობრივი სერვისების მიწოდების ხელშეწყობას, მათ შორის, კერძო-საჯარო და ინტერმუნიციპალური თანამშრომლობის განვითარების გზით; სამოქალაქო საზოგადოების ჩართულობის გაძლიერებას თვითმმართველობის საქმიანობაში, მუნიციპალიტეტის ანგარიშვალდებულების გაზრდის მიზნით. აღნიშნული მხარდაჭერის მნიშვნელოვანი კომპონენტი იქნება ასევე გენდერული თანასწორობისა და სოციალური ინკლუზიის პრინციპების ინტეგრირება სხვადასხვა აქტივობების დაგეგმვისა და გახორციელების პროცესში, რათა მუნიციპალიტეტში მცხოვრები დაუცველი ჯგუფების (მათ შორის ეთნიკური უმცირესობების, შშმ პირებს და სხვა.) საჭიროებები მაქსიმალურად იყოს გათვალისწინებული.
_ როდის გაიმართება შეხვედრები აღნიშნულ მუნიციპალიტეტებში და თუ არის უკვე განსაზღვრული, სად რა თანხა დაიხარჯება?
_ მას შემდეგ, რაც USAID-ის ადგილობრივი თვითმმართველობის პროგრამამ შეარჩია პირველი 11 მუნიციპალიტეტი, სადაც 2023 წელს იმუშავებს, დაიგეგმა სამუშაო შეხვედრები მუნიციპალიტეტების მერიისა და საკრებულოს წარმომადგენლებთან ერთად, ძირითადი აქტივობების შესამუშავებლად, რაც საფუძვლად დაედება ურთიერთთანამშრომლობის შეთანხმებას მუნიციპალიტეტსა და პროგრამას შორის.
სამუშაო შეხვედრები დაგეგმილია 30-31 იანვარს ოზურგეთში, ხოლო პირველ თებერვალს _ ჩოხატაურში. შეხვედრების ფარგლებში, პროგრამის გუნდი წარადგენს მხარდაჭერის ძირითად მიმართულებებს. სამუშაო ჯგუფების ფარგლებში, მერიისა და საკრებულოს თანამშრომლებთან ერთად ვიმსჯელებთ მუნიციპალიტეტების გამოწვევებსა და ძირითად საჭიროებებზე და შევჯერდებით იმ პრიორიტეტულ მიმართულებებზე, რომელთა მხარდაჭერაც USAID-ის ადგილობრივი თვითმმართველობის პროგრამის მიერ განსაკუთრებით მნიშვნელოვანია მუნიციპალიტეტისთვის. პროგრამის რესურსების განაწილებაც, სწორედ ამ პრიორიტეტული მიმართულებებიდან გამომდინარე მოხდება და წინასწარ განსაზღვრული არ არის.
_ როგორ მოხდება გამოყოფილი ბიუჯეტის და შესასრულებელი სამუშაოს მიმდინარეობის კონტროლი?
_ სამუშაო შეხვედრების დასრულების შემდეგ, USAID-ის ადგილობრივი თვითმმართველობის პროგრამასა და ოზურგეთის და ჩოხატაურის მუნიციპალიტეტებს შორის გაფორმდება შეთანხმება ურთიერთთანამშრომლობის შესახებ, რომელშიც გაიწერება მხარეთა პასუხისმგებლობები და თანამშრომლობის ძირითადი პრინციპები. ამასთან, ურთიერთთანამშრომლობის შეთანხმების ფარგლებში, პროგრამა, პარტნიორ მუნიციპალიტეტთან მჭიდრო თანამშრომლობით, ითვალისწინებს ძირითადი ამოცანების და შესაბამისი ინდიკატორების შემუშავებას, რომელთა გადახედვა და შესრულების მონიტორინგი მოხდება რეგულარულად, _ ამბობს წიკლაური.
ავტორი
