“ნახავანჰესის” წინააღმდეგ მიმდინარე აქციის ორგანიზატორის, ,,რიონის მცველის” ვარლამ გოლეთიანის განცხადებით, აქციის მონაწილეები რესპუბლიკის მოედანზე დარჩებიან და ღამეს გაათევენ.
მისივე თქმით, მსვლელობები, ქუჩის გადაკეტვები და პიკეტირებები 25 მაისის, 16:00 საათიდან განახლდება და ხელისუფლებას უფრო მეტ ძალას აჩვენებენ.
„25 მაისს, 16:00 საათიდან ისევ იქნება მსვლელობა, რომელიც მნიშვნელოვანი ადგილების პიკეტირებას მოახდენს, ამიტომ მოვუწოდებთ დედაქალაქის მოსახლეობას, რომ არ გავჩერდეთ იქამდე, ვიდრე არ მივაღწევთ შედეგს. მთავარია, ბოლომდე მივიყვანოთ ეს ბრძოლა. ხელისუფლება მუდმივად ფიქრობს, როდემდე შეძლებს ეს ხალხი ამ ფორმით იბრძოლოს, ჩვენ უკვე 210-ე დღეა ვიბრძვით და ვიბრძოლებთ იქამდე, ვიდრე არ მივიღებთ შედეგს.
24 მაისს, 16:00 საათზე ვაჩვენებთ გაცილებით მეტ ძალას, ვიდრე ვართ დღეს წარმოდგენილი. გაცილებით უფრო მეტნი ვიქნებით, თუნდაც ამ მოედანზე, დავიძრებით მსვლელობით და გადავკეტავთ მნიშვნელოვან ადგილებს, მოვაწყობთ პიკეტირებას და ეს პროცესი გაგრძელდება, სანამ არ დაკმაყოფილდება ქართველი ხალხის მოთხოვნა, რომელიც გავაჟღერეთ არაერთგზის”, _ თქვა ვარლამ გოლეთიანმა.
