,,ლეგენდარული ოქროსმაძიებელი”, დიმიტრი მეტრეველი (როგორც მას კანადაში უწოდებენ) (1895-1970) დაიბადა რაჭის პატარა სოფელ უწერაში. 1913 წელს ქართველთა ერთ დიდ ჯგუფთან ერთად ამერიკაში გაემგზავრა. იქ მას უკვე დახვდნენ ქართველები, რომელთა ნაწილი უკვე დიდი ხნის წინ იყო ჩამოსული. ცოტა ხანში ის ამერიკიდან კანადაში გადასახლდა, სადაც კვებეკის მახლობლად პატარა ქალაქ ვალდორში დასახლდა. იქვე დაოჯახდა ლიტვური წარმოშობის ქალზე. მათ სამი შვილი შეეძინათ _ ორი ვაჟი და ერთი ქალიშვილი.
მეტრეველმა სხვადასხვა პროფესია გამოიცვალა, ერთხანს ჭიდაობდა კიდევაც, შემდეგ კი სხვა უამრავი ადამიანის, მათ შორის ქართველების მსგავსად, ოქროს მაძიებლობა დაიწყო. მაგრამ ოქროს მოძიებაში ბედი მხოლოდ ერთეულებს უმართლებდა.
გივი კობახიძე ჰყვება ამბავს, თუ როგორ დააგროვა ერთმა ქართველმა საკმაო ოქრო და რომ არ გაეძარცვათ, ოქრო სარტყელში ჩაალაგა და წელზე შემოიკრა. გზად ერთი მდინარის გადაცურვა მოუწია, მაგრამ საუბედუროდ ოქრო მძიმე აღმოჩნდა და ეს უცნობი ქართველი დაიხრჩო. დამხრჩვალი წყლიდან ამოიყვანეს, სადღაც დაასაფლავეს, ოქრო კი სხვას შერჩა.
სხვებისგან განსხვავებით მეტრეველს ბედი წყალობდა, ის გამდიდრდა და რამდენიმე მაღაროც აამუშავა. ჟურნალი Billboard (20 ივლისი, 1946 წ.) წერდა, რომ მაიკ მიტო (Mike Mitto მისი ამერიკული სახელია) 28 წლის განმავლობაში ეძებდა ოქროს ალასკასა და კონტინენტის ჩრდილო-დასავლეთში.
თურმე, ამიტომ შეიამხანაგა რადიო წამყვანი დეტროიტიდან ვინმე ფრენკ ჰარინგტონ სალერნო, რომელიც მაშინ ტორონტოში ისვენებდა და მიტოს მონაყოლმა გადააწყვეტინა რადიოს მიტოვება. მათ ოქრო იპოვეს და მოგვიანებით სალერნომ საკუთარი წილი 175 ათას დოლარად გაყიდა.
მაღაროების გარშემო ხალხმა დაიწყო დასახლება და როგორც ამბობენ, მას მეტრევილი უწოდეს. სულ მალე მაიკ მიტომ, ალასკაზეც სცადა ბედი და იქაც დიდი სიმდიდრე დააგროვა. სხვა მდიდარი ქართველების მსგავსად ის ყველას ეხმარებოდა ამერიკაშიც და საქართველოშიც.
დიდმა დეპრესიამ მის ბიზნესს საგრძნობი დარტყმა მიაყენა, მაგრამ მან მოახერხა რომ ფეხზე წამომდგარიყო. 1945 წელს მაიკ მიტომ თავის პარტნიორთან ერთად კანადაში ალმასის საბადო აამუშავა. მაიკ მიტო 1970 წელს ფილტვების ანთებით გარდაიცვალა. მისი სიკვდილის შემდეგ საქმე მისმა უფროსმა ვაჟმა ავგუსტმა განაგრძო.
ირაკლი მახარაძე
ამონარიდი წიგნიდან ,,ქართველები ამერიკაში”, 2011 (ბაკურ სულაკაურის გამომცემლობა).
