ჩოხატაურში, კოსტავას ქუჩაზე მცხოვრები ლიანა გიორგაძის გასაჭირის შესახებ “გურია ნიუსი” ჯერ კიდევ 2013 წელს საუბრობდა _ როგორც მაშინ ვწერდით, ყოფილი “კოლმშენის” შენობაში მცხოვრები ოჯახი წლებია, რაც წვიმასა და თოვლში წყალში იხრჩობა.
ჩოხატაურის მუნიციპალიტეტის იმდროინდელი გამგებელი, თამაზ ჯინჭარაძე ამბობდა, რომ ლიანა გიორგაძის ოჯახის პრობლემა ადვილი გადასაჭრელი არ იყო.
თუმცა, ამდენის წლის შემდეგ პრობლემა, რომელსაც კოსტავას ქუჩაზე სანიაღვრე არხები ქმნის, მოუგვარებელი რჩება.
უხვი ნალექის დროს ადიდებული წყალი საცხოვრებელი შენობის ეზოს ტბორავს და ზოგჯერ სახლშიც შედის.
როგორც ლიანა გიორგაძე გვიყვება, წლების განმავლობაში ქირით ცხოვრობდა, შემდეგ კი ოჯახთან ერთად მიტოვებულ შენობაში გადავიდა. მართალია, გარეთ არავინ გააგდო, მაგრამ გაუსაძლის პირობებში ცხოვრობს.
“სახლი არ მქონდა, ქირით ვცხოვრობდი, ხან _ სად და ხან _ სად. არავინ მეხმარებოდა. სადაც ვნახე მიტოვებული შენობა, ცხოვრება იქ დავიწყე. არც კარი, არც ფანჯარა არ იყო, მაგრამ შევინარჩუნე. იცხოვრე, ვინ გაგდებსო, გამგებელმა მითხრა, მაგრამ ფართს საკუთრებაში არ მიფორმებენ.
22 წელია აქ ვცხოვრობ. იყო პრობლემები, რომელიც მოაგვარეს, მაგრამ 5 არხი გაედინება და წვიმის დროს წყალი სახლშიც შემოდის. ვის არ მივმართე _ ჩვენი მერი იძახის, პრობლემის გადაჭრა მე არ მეკუთვნისო. ვერ გავიგე, ვის ეკუთვნის ამ პრობლემის მოგვარება.
სამაშველო სამსახურს ხშირად ვიძახებ, რადგან ტერიტორია ისე იტბორება, გადაადგილება შეუძლებელია. წყალი სახლშიც შემოდის და ხან რა ნაგავი მოაქვს და ხან _ რა. ისეთი სუნი დგება, სულ ღია მაქვს ფანჯრები. ცოტა ხნის წინ, დავრეკე სამაშველო სამსახურში და წყალდიდობის გამო გამოვიძახე, მაგრამ არ მოვიდნენ. რომ გადავრეკე, ოპერატორმა მითხრა, გადავცემ გამოძახებასო. ცოტა ხანში ისევ დავრეკე და მითხრეს, თუ კანალიზაციიდან გადმოდის წყალი, მაშველებს არ აქვთ მოსვლის უფლება, შენ თვითონ გაწმინდე არხიო. მარტო ჩემი არხი რომ მაწუხებდეს, მაგას შენ ვერ მასწავლი,-მეთქი, ვუთხარი. სამაშველო სამსახურის უფროსი გია სიხარულიძე იყო მოსული და მითხრა, ამ წყალს ჩვენ ვერ ამოვტუმბავთ _ უფლება არ გვაქვს, რამე რომ შემეძლოს, დაგეხმარებოდიო.
შეშა რომ არ მქონდა, მივედი ადგილობრივ ხელისუფლებასთან და ვთხოვე. ორჯერ დამაწერინეს განცხადება, ორი თვე ველოდი და შეშა ახლა მოვიტანე.
სოციალურ დახმარებას ვიღებ. ახლა მაგ ტერიტორიაზე სახანძრო შენდება და ასე მითხრეს, იმათ უნდა მოაგვარონ პრობლემაო”, _ ამბობს ლაურა გიორგაძე.
რამდენად ხშირად სჭირდება აღნიშნულ ოჯახს მაშველების დახმარება და შეესაბამება თუ არა სიმართლეს, რომ ადგილობრივი სამაშველო სამსახურის უფროსმა ოჯახს წყლის ამოტუმბვაზე უარი უთხრა, ამის გადასამოწმებლად სამსახურის განყოფილების ხელმძღვანელს გია სიხარულიძეს დავუკავშირდით.
როგორც სიხარულიძემ გვითხრა, კომენტარის გაკეთების უფლება არ აქვს და უწყების პრესსამსახურთან გადაგვამისამართა.
“განყოფილების უფროსი ვარ, მაგრამ არანაირი უფლება არ მაქვს, რომ ინფორმაცია მოგაწოდოთ. დაუკავშირდით თბილისს”, _ გვითხრა სიხარულიძემ.
“გურია ნიუსმა” საგანგებო სიტუაციების მართვის სამსახურის პრესსამსახურს მიმართა.
“თქვენს სახლში კანალიზაციის “ტრუბა” რომ გასკდეს, სამაშველო უნდა მოვიდეს თუ მუნიციპალიტეტის სამსახური? თუ 112-ში დაფიქსირდა ზარი, გამორიცხულია, რომ სამაშველო სამსახური არ მისულიყო _ მაშველები მიდიან ყოველთვის და ყველგან, როცა ადამიანის სიცოცხლეს საფრთხე ემუქრება. თუმცა, კონკრეტულ შემთხვევაზე, კონკრეტულ საათსა და რიცხვს თუ მოგვაწვდით, ინფორმაციას გადავამოწმებთ”, _ გვითხრეს საგანგებო სიტუაციების მართვის სამსახურის პრესსამსახურში.
იმის გასარკვევად, როგორ უნდა მოგვარდეს ჩოხატაურში სანიაღვრე სისტემის პრობლემა, რომელიც 5-სულიან ოჯახს უამინდობაში მშვიდად ყოფნის საშუალებას არ აძლევს, “გურია ნიუსი” ჩოხატაურის მუნიციპალიტეტის მერის წარმომადგენელს დაბაში, გოჩა ჯინჭარაძეს დაუკავშირდა:
“ჩემი მოვალეობაა ხელმძღვანელობამდე ამბის მიტანა. თანხა მე არ მაქვს. რაღაცეები გაკეთდა. ახლა სამაშველო სამსახური შენდება და ეგ პრობლემა, როგორც ვიცი, უნდა მოგვარებულიყო. მიმართეთ მერს _ იგი საქმის კურსშია”, _ გვითხრა ჯინჭარაძემ.
ჩოხატაურის მუნიციპალიტეტის მერის, ირაკლი კუჭავას თქმით კი, ლიანა გიორგაძემ, რომელიც ყოფილი “კოლმშენის” შენობაში უკანონოდ ცხოვრობს, ადგილობრივ ხელისუფლებას თხოვნით ბევრჯერ მიმართა და მუნიციპალიტეტის მერიაც არა ერთხელ დაეხმარა.
მერის თქმითვე, გადადგმულია ნაბიჯები, რის შედეგადაც, შესაძლოა, ყოფილი “კოლმშენის” შენობა ლიანა გიორგაძის ოჯახს საკუთრებაში გადაეცეს:
“ამ ადამიანმა მრავალჯერ მოგვმართა. მაგალითად, ბოლო 2 წლის განმავლობაში რამდენი განცხადებაც შემოიტანა, იმდენჯერ დავეხმარეთ.
2019 წლის დეკემბერში მოგვმართა, სათბობი შეშა არ მაქვსო და 2020 წლის იანვარში მიიღო ფულადი დახმარება. გარდა ამისა, ქალბატონი ლიანა გიორგაძე დღემდე უკანონოდ იკავებს სახელმწიფო საკუთრებაში არსებულ ყოფილი “კოლმშენის” შენობას. ამ კუთხითაც ჩვენი მხრიდან გარკვეული ნაბიჯები იქნა გადადგმული და შედეგებიც გვაქვს _ მაგალითად, მუნიციპალიტეტს, ასევე, მუნიციპალიტეტის მერს, არ აქვს უფლებამოსილება, რომ მოქალაქეს საკუთრებაში გადასცეს რაიმე სახის შენობა, რომელიც სახელმწიფოს საკუთრებაშია. ახლა ის შენობა გადმოვიდა მუნიციპალიტეტის საკუთრებაში, მაგრამ კანონის მოთხოვნა იგივე რჩება. ერთი კვირის წინ მივმართეთ სამხარეო ადმინისტრაციას შუამდგომლობით, რომ იქნებ სახელმწიფომ გადასცეს უკანონოდ დაკავებული ფართი ამ ოჯახს. ეს საკითხი დაძრულია და ვნახავთ, რა შედეგები იქნება. მუნიციპალიტეტმა ყველა შესაძლო ბერკეტი გამოიყენა”, _ ამბობს ირაკლი კუჭავა.
რაც შეეხება სანიაღვრე არხებით გამოწვეული დატბორვის პრობლემას, მერის თქმით, სანიაღვრე არხები “გზამშენი 18”-ის დაქვემდებარებაშია.
სიტუაციას სახანძრო-სამაშველო სამსახურის მშენებლობაც ართულებს, მერიას კი არხის გასაყვანად ტექნიკა არ აქვს, ამიტომ ეს საკითხი მერიასა და “გზამშენ 18”-ს შორის ისევ დადგება:
“რაც შეეხება დატბორვის ადგილს, რელიეფი ცენტრალური გზიდან დაბლაა ჩაწეული. თვითონ ვიმყოფებოდი ადგილზე, წარმომადგენლებიც მყავდა გაგზავნილი.
ძლიერი წვიმის დროს, ზოგჯერ სახლის მიმდებარე ტერიტორია იტბორება. ავუხსენი, რომ ცენტრალური გზის გასწვრივ სანიაღვრე არხები არის იმ კომპანიის დაქვემდებარებაში, რომელსაც სახელმწიფო ტენდერი აქვს მოგებული და ეს არის ოზურგეთში არსებული კომპანია “გზამშენი 18”.
ამის გარდა, პრობლემა გაამძაფრა იმანაც, რომ გიორგაძის სახლთან მიმდებარე ტერიტორიაზე მიმდინარეობს მშენებლობა _ შინაგან საქმეთა სამინისტროს დაკვეთით სახანძრო-სამაშველო სამსახურის ახალი შენობა შენდება. შესაბამისად, ამანაც შექმნა გარკვეული პრობლემა. ეს საკითხი ისევ დადგება ჩვენი მხრიდან იმ კომპანიის წინაშე. მუნიციპალიტეტს არც საიმისო ტექნიკა გააჩნია, რომ იქ შეძლოს მთლიანად სანიაღვრე არხის გაყვანა. სხვა სახის ყოფით პრობლემებს კი როგორც მოგვიგვარებია არაერთხელ, მომავალშიც დავეხმარებით”, _ ამბობს კუჭავა.
“გურია ნიუსი” “გზამშენი 18”-ის დირექტორს, თემურ ჯახვასაც ესაუბრა, რომლის თქმითაც, გზა კომპანიის დაქვემდებარებაშია, მაგრამ არხების პრობლემა მუნიციპალიტეტის მერიამ უნდა მოაგვაროს.
მისივე თქმით, კოსტავას ქუჩაზე მშენებლებმა არხები გადაკეტეს:
“გზა ჩვენს დაქვემდებარებაშია. რომელ არხზე მესაუბრებით, ასე ვერ გეტყვით. კოსტავას ქუჩაზე ხდება ტერიტორიის განაშენიანება _ შენდება სახანძროს შენობა. მაგათაც გადაკეტეს არხები. მერიამ უნდა მოაგვაროს ეს საკითხი. თუ რამე მე მეხება, დავეხმარები”, _ ამბობს თემურ ჯახვა.
