ლანჩხუთში გრიპის მაგვარი დაავავადებების შემთხვევები შემცირებულია, მაგრამ კოვიდინფიცირების შემთხვევებმა გასულ თვესთან შედარებით მოიმატა,_ ამის შესახებ “გურია ნიუსს” ლანჩხუთის საზოგადოებრივი ჯანდაცვის ცენტრის ეპიდემიოლოგმა ნატო მენაღარიშვილმა განუცხადა.
“ლანჩხუთის მუნიციპალიტეტში გრიპის მაგვარი დაავადებების მატება იყო წინა კვირებში, ახლა შედარებით მომართვიანობის მცირედი კლება შეინიშნება. გრიპის მაგვარი დაავადებებია, როცა ადამიანს აქვს ხველა, მაღალი სიცხე ერთად.
რაც შეეხება კოვიდს, ჩვენი ცხოვრებიდან მთლიანად არ გამქრალა და არც გაქრება. თებერვალთან შედარებით კოვიდინიფიცირების შემთხვევები მომატებულია. ინფიცირების მძიმედ მიმდინარეობის შემთხვევები არ ყოფილა”,_ ამბობს მენაღარიშვილი და აღნიშნავს, რომ რეალურად შეიძლება შემთხვევები უფრო უფრო მეტი იყოს, მაგრამ რადგან კოვიდს და გრიპს მსგავსი სიმპტომები აქვს, შეიძლება ადამიანების ნაწილი, იმ შემთხვევაში თუ რამე არ გაურთულდა, არ თვლის საჭიროდ ექიმს მიმართოს და ჩაიტაროს კოვიდტესტირება.
ეპიდემიოლოგი აღნიშნავს, იმასაც რომ ტესტის დროული ჩატარება აუცილებელია, რადგან დაგვიანებით მიმართვის შემთხვევაში, კოვიდის დადგენა ვერ ხერხდება.
“გვქონდა შემთხვევა, როცა მოგვმართა მოქალაქემ და გვითხრა, რომ ერთი კვირა ჰქონდა ყნოსვა დაკარგული. ყნოსვის დაკარგვა ახასიათებს კოვიდს, მაგრამ ტესტმა ამის დადგენა ვერ შეძლო, რადგან მომართვა მოხდა დაგვიანებით”,_ თქვა მენაღარიშვილმა.
რაც შეეხება მკურნალობას, ეპიდემიოლოგი ამბობს, რომ სიმტომების მიხედვით ხდება.
“რაც შეეხება რეკომენდაციებს, მკურნალობა არის სიმპტომური და რა თქმა უნდა სიმპტომების ქონის შემთხვევაში ადამიანები უნდა იყვნენ იზოლირებული სამუშაო გარემოსგან, ოჯახის წევრებისგან, რომ გაუფრთხილდნენ თავიანთ თავსაც და სხვებსაც და უნდა დაიცვან ჰიგიენის წესები. უნდა გაითვალისწინონ ისიც, რომ არ შეიძლება დაცემინების დროს ცხვირზე ხელის გულის აფარება, უნდა აიფარონ ცხვირსახოცი ან უნდა მოხარონ მკლავი და ასეთ მდგომარეობაში აიფარონ ცხვირზე”,_ ამბობს მენაღარიშვილი.
