დაავადებათა კონტროლის ეროვნული ცენტრის გურიის განყოფილების ხელმძღვანელი არჩილ მჟავია „გურია ნიუსთან“ საუბრის დროს ამბობს, რომ ბოლო დროს ვინც იმყოფებოდა იმ ქვეყნებში, სადაც კორონავირუსის ფაქტებია, აუცილებელია, იმყოფებოდნენ თვითიზოლაციაში.
არჩილ მჟავია: „თვითიზოლაციაში ყოფნა არ ნიშნავს იმას, რომ ადამიანს აქვს კორონავირუსი. უბრალოდ, მიდის დაკვირვება 14 დღის განმავლობაში და ეპიდომოლოგები აკვირდებიან მათ.
არსებობს ასეთი ცნება – კარანტინი. კარანტინის ერთ-ერთი სახეობა არის თვითიზოლაცია, რომელიც გამოიყენება ამ ბოლო დროს. დაკვირვება მიდის იმ ადამიანებზე, რომლებიც ბოლო დროს იმყოფებოდნენ ჩინეთში, სამხრეთ კორეაში, ირანში და იტალიაში. საქართველოს მთავრობას გამოცხადებული აქვს ეს ოთხი ქვეყანა, სადაც არის რისკი კორონავირუსის გავრცელების.
თვითიზოლაციაში მყოფნი პირი უნდა იმყოფებოდეს განმარტოვებულ სივრცეში – ეს არის ბინა ან საცხოვრებელი სახლი. მაქსიმალურად უნდა მოერიდოს სხვა ადამიანთან კონტაქტს. ძალიან ბევრი პუნქტებია შესასრულებელი.
_ ბატონო არჩილ თქვენ აღნიშნეთ, რომ ის ადამიანები, რომლებიც ბოლო დროს იყვნენ იტალიაში, ირანში, ჩინეთში ან სამხრეთ კორეაში და დაბრუნდნენ საქართველოში, უნდა იყვნენ კარანტინში.
_ დიახ, თუ ამის საშუალება აქვს.
_ და თუ არ აქვს?
_ თუ საშუალება არ აქვს, მაშინ უნდა გადავიდეს საკარანტინო ზონაში. დღეს გახდება ცნობილი გუბერნატორტთან შეხვედრის შემდეგ სად იქნება ეს სივრცე გურიაში.
_ რატომ არის საჭირო თვითიზოლაცია, თუ ადამიანს არ უფიქსირდება კორონავიურსი
_ შეიძლება მას არ ქონდეს არანაირი სიმპტოპი, მაგრამ ეპოდოლოგები 14 დღე გვჭირდება იმისთვის, რომ არ გამოგვეპაროს რამე დეტალი. ეს ისეთი დაავადება არის, რომელიც მიმდინარეობს ტემპერატურის გარეშე. ასევე შეიძლება ფარულად მიმდინარეობდეს ეს დაავადება და აუცილებელია დაკვირვება.
_ არიან ადამიანების კატეგორია, რომლებიც იმყოფებოდნენ იტალიაში,მაგრამ ეპიდომოლოგებისთვის ეს ამბავი არ უთქვამთ. როგორც ვიცი ოზურგეთის საზოგადოებრივი ჯანდაცვის ცენტრმა მოიპოვა იმ ადამიანების სახელი და გვარი, ვინც იმყოფებოდა სამოგზაუროდ რისკ ზონებში.
_ თვითიზოლაციაში ვინც იმყოფება აუცილებლად უნდა დაუკავშირდნენ საზოგადოებრივი ჯანდაცვის ცენტრებს ადგილზე და შემდეგ მოხდება ამ ადამიანების დაკვირვება. კვირაში ერთხელ.
_ ბატონო არჩილ კვირაში ერთხელ საკმარისია მათი ნახვა? ან ხომ შეიძლება ეს ადამიანები, რომლებიც თვითიზოლაციაში იმყოფებიან, საზოგადოებრივი თავშეყრის ადგილებში დადიოდნენ?
_ გააჩნია ადამიანს, თუ თვითშეგნება აქვს არ უნდა გამოვიდეს სახლიდან. თუ ადამიანი არღვევს დადგენილ წესს საზოგადოებრივი ჯანდაცვის ცენტრს უფლება აქვს გამოიძახოს პატრული, განმეორების შემთხვევაში. ყოველდღიურად ხომ ხდება ამ ადამიანებთან საუბარი. ვკითხულობთ მათი ჯანმთელობის მდგომარეობას. ასევე დილით და საღამოს ხდება ტემპერატურის შემოწმება.
არჩილ მჟავია მოუწოდებს ადამიანებს, რომ ამ ეტაპზე თავი შეიკავონ საზღვარგარეთ წასვლიდან.
„არაერთი გარფთხილებისას მაინც მიდიან ადამიანები მაგალითად, იტალიაში. ახლა ვიგებთ, რომ 3-4 დღის წინ ჩამოვიდა რამდენიმე ოზურგეთელი. ამის შესახებ უკვე ვიცით და ისინი თვითიზოლაციაში არიან,“ – გვითხრა არჩილ მჟავიამ.
არჩილ მჟავიამ ასევე მოგვაწოდა ინფორმაცია: ახალ კორონავირუსთან (COVID-19) დაკავშირებული რეკომენდაციები თვითიზოლაციაში მყოფი პირებისთვის დაცული უნდა იყოს შემდეგი წესები: ა) იზოლაციაში ყოფნა დაავადების გამომწვევთან ექსპოზიციის ბოლო თარიღიდან 14 დღის განმავლობაში და საკუთარი ჯანმრთელობის კონტროლი; ბ) თვითიზოლაციის სივრცეში აკრძალულია ვიზიტორების და სტუმრების მიღება; გ) დასაშვებია არაპირდაპირი კონტაქტით საკვების გადაცემა. დ) საცხოვრებელ სივრცეში მყოფ სხვა ადამიანებთან კონტაქტის მინიმუმამდე შეზღუდვა. 1 მეტრზე ახლო კონტაქტი 15 წუთზე დიდ ხანს არაა დასაშვები. ე) იზოლაციის პერიოდში განცალკევებული ჭურჭელის (ჭიქა, თეფში, კოვზი და ა.შ.), პირსახოცის, საწოლის ქონა; ვ)სატელეფონო კავშირი და ინტერნეტით სარგებლობა არაა შეზღუდული: ზ)თვითიზოლაციის პერიოდის განმავლობაში საზოგადოებრივი ჯანმრთელობის შესაბამისი უწყებები განახორციელებენ მონიტორინგს. ჯანმრთელობის მონიტორინგი შეიძლება განხორციელდეს უშუალო კონტაქტის გარეშე – ტემპერატურის თვითგაზომვით, სიმპტომების გამოვლენისას – თვითანგარიშგებით; თ) ცხელების და ან რესპირატორული ვირუსული ინფექციის მსგავსი კლინიკური ნიშნების შემთხვევაში, ინფექციური პროფილის სტაციონარისთვის დაუყოვნებლივ მიმართვა; ი) არაგადამდები დაავადების (მაგ; ქირურგიული, გინეკოლოგიური და სხვა) სასწრაფო სტაციონარული სამედიცინო დახმარების საჭიროების შემთხვევაში, კლინიკაში ტრანსპორტირება განხორციელდება სპეციალური ავტოტრანსპორტით, და სტაციონარში განთავსება ბოქსირებულ პალატაში საიზოლაციო პერიოდის ვადის გასვლამდე; კ) თამბაქოს, ალკოჰოლის ან სხვა ნივთიერებების გამოყენებისგან თავის შეკავება; ლ) ცხოვრების ჯანსაღი წესის დაცვა – ჯანსაღად კვება, დასვენება, ფიზიკური აქტივობა და სოციალური კონტაქტის შენარჩუნება ძვირფას ადამიანებთან; სახლში და ტელეფონით ან ელექტრონული ფოსტით ოჯახის სხვა წევრებსა და მეგობრებთან კონტაქტი.
