პარადოქსია, მაგრამ ფაქტია _ მაშინ, როცა „გურია“ ღრმა კრიზისშია, ლანჩხუთში კიდევ ერთი საფეხბურთო კლუბი „გურია-2 ჩიბათი“ დაფუძნდა.
როგორც „ჩიბათის“ დამფუძნებელი, საკრებულოს წევრი, გიორგი ჩახვაძე ამბობს, ახალი საფეხბურთო კლუბის შექმნა ბიუჯეტიდან დამატებითი სახსრების მოძიებას არ საჭიროებს და იგი სპორტული ცენტრის ბაზაზე იარსებებს.
„ამ გუნდში ის ადგილობრივი ფეხბურთელები არიან, რომლებიც, თავის დროზე „გურიაში“ ასპარეზობდნენ. ახალი გუნდის შექმნის მიზანი სწორედ ისაა, რომ არ ჩამოშორდნენ ეს ბიჭები ფეხბურთს და არ დარჩნენ უფუნქციოდ.
„ჩიბათი“ სპორტული ცენტრის ბაზაზე დაფუძნდა და ამ გუნდისთვის დამატებითი სახსრების მოძიება არაა საჭირო, რადგან მას საფეხბურთო სკოლის მწვრთნელები ავარჯიშებენ, ხოლო თავად ფეხბურთელები ენთუზიაზმზე, უხელფასოდ ვარჯიშობენ. ახლა გუნდი მეხუთე ლიგაში გამოდის და მისი მთავარი მოტივაციაა, მეოთხე ლიგაში გადაინაცვლოს, რომ ფეხბურთის ფედერაციიდან მიიღოს დაფინანსება“, _ ამბობს ჩახვაძე.
თუმცა, კულუარებში ამბობენ, რომ ახალი საფეხბურთო კლუბის შექმნის იდეა მას შემდეგ წამოვიდა, რაც ვერ მოხერხდა გურიას“ კახა ებრალიძის გუნდისთვის ჩაბარება. გავრცელებული ინფორმაციით, სწორედ ებრალიძეს შესთავაზეს ამ ახლად დაფუძნებული კლუბის ხელმძღვანელობა.
„დიახ, შემოთავაზება იყო, მაგრამ სიმართლე გითხრათ, ფეხბურთზე აღარ ვფიქრობ. ეს რომ იყოს კერძო კლუბი ან მე მქონდეს მისი დაფინანსების შესაძლებლობა, მაშინ სიამოვნებით ვიმუშავებდი. მაგრამ ამ მოცემულობაში არ ვაპირებ ჩემს საქმეს და ოჯახს მოვაკლო დრო და ვიღაცას რაღაცი „გავუპრავო“. არადა, ჩემს საქმეს მოვაკლებდი და „გურიაში“ დაბრუნებას დავთანხმდი, თუმცა, ძალიან დიდ უხერხულობასა და გაუგებრობაში აღმოვჩნდით მეც და ჩემი მეგობრებიც. თურმე ჩემი მოსვლა არ შეიძლება „გურიაში“, რადგან გუნდი უმაღლეს ლიგაში გადავიყვანეთ და ის ხალხი უნდა იყოს გუნდში, ვინც ერთ წელიწადში გუნდი ორი ლიგიდან გააგდო. არავის პიროვნულად არაფერს ვერჩი, მაგრამ მე ვუთხარი მუნიციპალიტეტის ხელმძღვანელებსა და მაჟორიტარს ერთი წლის წინ, რომ „გურია“ უმაღლესი ლიგიდან გავარდებოდა, თვეების წინ ისიც ვუთხარი, რომ გუნდი გავარდებოდა პრო-ლიგა-2-დანაც. ახლაც სამწუხარო პროგნოზი მაქვს. დავით ყენიას წარმატებას ვუსურვებ, მაგრამ, როცა მის უკან ინვესტიცია არ დგას, გაუგებარია, გუნდში მისი მოყვანა. აქ ისეთი სიტუაცია იქმნება, დარწმუნებული ვარ, ეს ადამიანი თავისით გაეცლება ამ დომხალს. ყველაზე დიდი უბედურება ისაა, რომ არავინ აგებს პასუხს მორიგ წარუმატებლობაზეც“, _ ამბობს კახა ებრალიძე „გურია ნიუსთან“ გაკეთებულ კომენტარში.
ჩვენი ინფორმაციით, ბიუჯეტიდან დამატებითი თანხები უნდა გამოყოფილიყო, მაგრამ მას შემდეგ, რაც ებრალიძემ უარი თქვა, „ჩიბათი“ სპორტული ცენტრის დაქვემდებარებაში იქნება. შესაბამისად, კლუბში მოზარდები უნდა იყვნენ და ის ფეხბურთელები, რომლებიც დღესდღეობით ვარჯიშობენ ამ გუნდის შემადგენლობაში ვეღარ დარჩებიან. მაგალითად, თუნდაც, „გურიას“ ყოფილი კაპიტანი ტარიელ კუკულაძე, რომელმაც რამდენიმე ვარჯიში გაიარა კიდეც „ჩიბათის“ შემადგენლობაში.
