ახლახან, შეკვეთილში, “ბლექსი არენაზე” საზეიმოდ დაიხურა შავი ზღვის ფოლკლორის საერთაშორისო ფესტივალი, რომელიც გურიაში წელს მეორედ ჩატარდა.
დასკვნით კონცერტზე ხალხმრავლობა იყო, თუმცა არა ისეთი, როგორიც ვთქვათ, ელტონ ჯონის კონცერტს ახასიატებს, რაც ქართველმა ფოლკლორის მოტრფიალე გოგონამ თათია სურგულაძემ ემოციურად ასე გამოხატა: „ვნატრობ, ფოლკლორის ფესტივალის მაყურებელმა ელტონ ჯონის კონცერტისას გადააჭარბოს. მჯერა, ეს დროც მალე დადგება“.
ფოლკლორის საერთაშორისო ფესტივალი, რომელიც პროექტის “Check in Georgia” ფარგლებში მოეწყო, სულ შვიდი ქვეყნის ფოლკლორული კოლექტივი მონაწილეობდა.
მაყურებელმა იხილა პოლონეთის მაღალმთიანი რეგიონის ხალხური ხელოვნება, ესპანური „ლა მონეტას“ შესრულებული ჯადოქრული ფლამენკო, იტალიის, სომხეთის, უკრაინის, თურქეთის ფოლკლორული კოლექტივების შემოქმედება. რაც შეეხება ქართულ ანსამბლებს, „რუსთავისა“ და „ბასიანის“ გამოსვლას დარბაზი დიდხანს უკრავდა ტაშს და ოვაციებსაც საზღვარი არ ჰქონდა.
„ძალიან კარგად ჩანს, ყველა ერის თვითმყოფადობის სათავე რომ ფოლკლორია, მისი იდენტობის ამსახველი, თუმცა ქართული ხალხური ცეკვა და სიმღერა ჩვენი ერის უდიდეს და უძველეს კულტურას ერთი შეხედვითვე გამოარჩევს სხვა ერებისგან. ეს არის სასწაული. აღფრთოვანებული ვარ, რომ ამ საოცარ “ბლექსი არენაზე” ამიერიდან ყოველ წელს გაიმართება ასეთი ფესტივალი. 
მსოფლიო უფრო ახლო და კარგად გაიცნობს გენიალურ ქართულ ხალხურ ფოლკლორს, საოცარ ხელოვნებას, რომელსაც ბადალი ნაკლებად მოეძებნება მსოფლიოში. გავიხსენოთ, მრავალი ათეული წლების მანძილზე, სსრკ-ის დროს, ჩვენი ხელოვნება საზღვრებს იქეთ რუსული სახელით გადიოდა. ახლა აქედან, ახალი გადასახედიდან, ვფიქრობ, ახლებური ხედვით ეზიარება მსოფლიო ჩვენს სიმდიდრეს,“ _ ამბობს თბილისის მკვიდრი მკვიდრი ასმათ მეგრელაძე.
ნინა ბარდაველიძე, 19 წლის, თბილისი: ხალხური სამყარო, მისი წიაღი ის ადგილია, სადაც ყოველივე გენიალურს ეძებნება ფესვები. დიდებული ტრადიცია მკვიდრდება, რაშიც უდიდესი წვლილი ბიძინა ივანიშვილსაც ეკუთვნის. ეს რომ არ ვთქვა, არ იქნება.
ნიკა გორდელაძე, 24 წლის, ოზურგეთი: ფოლკლორის ფესტივალს მალე იმდენი მაყურებელი ეყოლება, „ბლექსი არენაც“ ვერ დაიტევს. მოვიხიბლე ყველა ხალხის ხელოვნებით, თუმცა ესპანური „ლა მონეტას“ შესრულებით განცვიფრებული ვარ.
ნია ვარდოსანიძე, 30 წლის, ქუთაისი: მინდა, ახალგაზრდობა განსაკუთრებით დაეწაფოს ფოლკლორს. გეზი აქეთკენაა აღებული. ოზურგეთი, როგორც ფოლკლორის ქალაქი, უკვე საერთაშორისო ელფერს იძენს. ვერსად, ვერანაირ შეხვედრაზე ხალხები ისე ვერ ეტყვიან ერთმანეთს სათქმელს და ურთიერთპატივისცემას ისე ვერსად გამოხატავენ, როგორც ასეთი ხასიათის მასშტაბურ ღონისძიებაზე.
ფოლკლორის ოზურგეთის რეგიონული ცენტრის დირექტორი, ავთანდილ სურგულაძე ჩატარებული ფესტივალის მნიშვნელობაზე გვესაუბრება და სამომავლო გეგმებს გვაცნობს:
_ მეორე წელია, გურიაში ფოლკლორის საერთაშორისო ფესტივალი იმართება. ეს არის პირდაპირი გამოძახილი ჩვენი ძალისხმევისა, „ოზურგეთი- ფოლკლორის ქალაქი“ გადავაქციოთ დიდ საერთაშორისო არენად. მომავალში, როცა აქ დასრულებული იქნება ფოლკლორის საკონცერტო დარბაზის მშენებლობა, ვარლამ სიმონიშვილის სახლ-მუზეუმი და არტემ ერქომაიშვილის სიმღერა-გალობის მუზეუმი, სწორედ აქ ჩატარდება კონცერტები.
ჩვენი წინაპრები, რომლებმაც უპრეცედენტო მუსიკალური შედევრები შექმნეს, გვაძლევენ საშუალებას, გვქონდეს ფოლკლორის სასახლე, ვუმასპინძლოთ საერთაშორისო ფესტივალს. თავის მხრივ ეს მოიტანს ეკონომიკურ სიძლიერესაც _ გაიყიდება ბილეთები, დაიტვირთება სასტუმროები და ასე შემდეგ.
ავთანდილ სურგულაძემ თქვა ასევე, რომ მომავალ წელს ფოლკლორის საერთაშორისო ფესტივალი გაცილებით მრავალეროვანი იქნება, მასში აფრიკული კონტინენტის ქვეყნებიც მიიღებენ მონაწილეობას, რომელთაც ძალზე საინტერესო ფოლკოლორი გააჩნიათ.
ფოლკლორის საერთაშორისო ფესტივალი შეკვეთილში, ბლექსი არენაზე, სახელმწიფო ფოლკლორის ცენტრის, კულტურის სამინისტროს და ოზურგეთის მუნიციპალიტეტის მხარდაჭერით ჩატარდა.
