იანვარსა და თებერვალში, მით უფრო, თუ კარგი და უთოვლო ამინდებია, მეურნეს უამრავი სამუშაო ელოდება საკუთარ საკარმიდამო ნაკვეთში. წლევანდელი ზამთარი და თბილი ამინდები საუკეთესო საშუალებას იძლევა, რომ ადრიანად შევუდგეთ საქმეს. თუმცა, ამინდის გრძელვადიან პროგნოზს მაინც უნდა ვადევნოთ თვალი.
უპირველესი, როცა უნდა დავიწყოთ თებერვალში, ეს არის გასხვლის პროცესი. კივის, ვაზის, სხვადასხვა ხეხილოვანი კულტურების მოწესრიგება უპირველესი საქმეა, რომ მერე კარგი მოსავალი მოგვცეს.
კარგად დავაკვირდეთ ყველა ხეხილოვანს და გამოვხშიროთ. ზოგი, ვენახის გარდა, არაფრის გასხვლას არ მიიჩნევს საჭიროდ, რაც მთლიანად მცდარი თვალსაზრისია. დავაკვირდეთ ვაშლს, მანდარინს. რატომ არის, რომ გარე მხარეს საუკეთესო ნაყოფი აქვს, შიგნით კი უფრო წვრილი და უხარისხო? ერთმანეთში გადახლართული ტოტები მუდამ უშლის ხელს ხარისხიანი ნაყოფის ჩამოყალიბებას. ამისთვის საჭიროა მზის სხივები და ჰაერი, რომლის თავისუფლად მოძრაობაც გამოხშირვის შემდეგაა შესაძლებელი.
აუცილებელია ნიადაგის განოყიერება. განსაკუთრებით გურიაში, სადაც უხვად არის წითელმიწა, მწირი ნიადაგები. ჩვენს მეურნეებს შევახსენებთ, რომ როგორმე მოახერხონ საკუთარი საკარმიდამო ნაკვეთების მოკირიანება _ ერთ ჰექტარ ფართობს ჰყოფნის ოთხი ტონა კირი, რომელიც არც ისე ძვირი ღირს. სამაგიეროდ, მთელი 20 წლის მანძილზე, განოყიერების პრობლემა მოხსნილი იქნება.
კარგია ორგანული სასუქის ნიადაგში შეტანა. ასევე, ფოსფორკალიუმინი სასუქებისაც, ოღონდ მხოლოდ ჩაბარვის წესით. წინააღმდეგ შემთხვევაში, ნიადაგის ზედაპირზე დაყრილი ან მცენარის ირგვლივ შემოყრილი სასუქი ბუნებაში უსარგებლოდ გაიფანტება.
თებერვალში, ასევე, უნდა მოვამზადოთ ორმოები ხეხილოვანი ნარგავებისთვის. რაც მეტად გავანოყიერებთ, მით უკეთესი.
რაც შეეხება აგრარულ კულტურებს, გოგრისთვის საგანგებოდ უნდა მოვამზადოთ ორმო. ორგანული სასუქით და ნამწვავებით და ადრიანად დავთესოთ. თუ ღია გრუნტში დავთესავთ, აუცილებლად დავხუროთ ორმაგი ცელოფნით. გოგრა, ნასესხების მერე დათესილი, ვეგეტაციას ვერ ასწრებს.
იანვარ-თებერვალში ასევე უნდა მოვახდინოთ ღობეების შეკეთება, ჭიგოების გამაგრება და სხვადასხვა ბაღჩეულისთვის სარების და ფორჩხის მომარაგება.
