ჟოლოს გამოყენება, როგორც სამკურნალო, ისე კვებითი ღირებულებით უძველესი დროიდან არის ცნობილი. გრიპის, ბრონქიტის, ღებინების დროს, საუკეთესო საშუალებაა შაქრის გარეშე ასეთი სახით მომზადებული ჟოლოს ნაყენი: ერთი კილოგრამი ნაყოფი გავრეცხოთ და დავასხათ ნახევარი ლიტრი მდუღარე წყალი. დავახუროთ თავზე და ნახევარი საათით დავდგათ. შემდეგ გავწუროთ ორი საათის განმავლობაში და დროის განაწილებით, ცხელ-ცხელი დავლიოთ. ჟოლოს ალერგიული ფონიც ახასიათებს _ მას განსაკუთრებით ნეფრიტით დაავადებულები უნდა ერიდონ.
ჟოლოს მურაბა ძალიან შედეგიანია გრიპის დროს, ამიტომ ყოველთვის უნდა მოვამზადოთ ჟოლოს მურაბა ასეთი წესით: ერთ კილოგრამ ჟოლოს დავაყაროთ ერთი კილოგრამი შაქარი. დავდგათ ერთი ღამის განმავლობაში. წყალი არ მივაკაროთ. მეორე დღეს ვადუღოთ 15 წუთით, გადმოვდგათ. როცა გაგრილდება, კიდევ 15 წუთის განმავლობაში ვადუღოთ, მერე სასწრაფოდ ჩავასხათ ქილაში და მოვხუფოთ. ქილა აუცილებლად ბოლომდე უნდა იყოს სავსე.
გრიპის დროს, ჩაიში ჩაუშვით ჟოლოს მურაბა და დღის განმავლობაში სამი-ოთხჯერ დალიეთ _ საოცარ შვებას იგრძნობთ.
აუცილებლად მოახერხეთ და ახლა, როცა ჟოლო მწიფეა, ორი-სამი კილოგრამი მურაბა გააკეთეთ აღნიშნული წესით. რაც შეეხება ჟოლოს ყვავილის გამონაწურს, ასე მოვამზადოთ: კარგად გარეცხილი ყვავილები დავსრისოთ და გამოვუღოთ წვენი. შემდეგ შევურიოთ ცოტა სამედიცინო ან შინნახადი სპირტი. ეს არის საუკეთესო საშუალება ფუტკრის, სხვადასხვა მწერის ნაკბენის დასაამებლად, გველის და მორიელის ნაკბენი ადგილის მოსაწმენდად, პირველი დახმარების გაწევის მომენტში.
