ოზურგეთში, დემოკრატიული ჩართულობის ცენტრში, “ჟურნალისტთა ქსელი გენდერული თანასწორობისთვის“ ორგანიზატორობით მორიგი შეხვედრა გაიმართა. შეხვედრა საუბარი იყო ქალ კანდიდატებთან დებატებზე, ქალთა საჭიროებებზე და მათ პოლიტიკაში მონაწილეობაზე.
შეხვედრას მერობის და მაჟორიტარი-დეპუტატობის კანდიდატები და საზოგადოების წარმომადგენლები ესწრებოდნენ.
ღონისძიების პირველი ნაწილში ოზურგეთის გენდერის მედია ცენტრის დირექტორმა, გიორგი გირკელიძემ საზოგადოებას გააცნო “ჟურნალისტთა ქსელი გენდერული თანასწორობისთვის“ მიერ გავრცელებული არჩევნებში ძალადობის და დისკრიმინაციის დაუშვებლობის მანიფესტი. ქალი კანდიდატები ერთხმად თანხმდებიან, რომ დაუშვებელია საარჩევნო კამპანიის წარმართვა ძალადობრივ გარემოში; სქესის ნიშნით ან სხვა რაიმე ტიპის დისკრიმინაცია და უფლებების შელახვა; კანდიდატების მიმართ ძალადობა ან საარჩევნო კამპანიის წარმართვაში ხელის შეშლა; ამომრჩეველი ქალების მიმართ არჩევნებში მონაწილეობაში ხელის შეშლა; არჩევანის გაკეთების დროს იძულება ან რაიმე ტიპის სხვა საარჩევნო ძალადობა; საჯარო გამოსვლებსა თუ მედია საშუალებებში დისკრიმინაციული გამონათქვამების და სექსისტური ენის გამოყენება და ა.შ.
მეორე ნაწილში მოწვეულ სტუმრებს სტატისტიკური მონაცემები გააცნეს და იმ პრობლემების შესახებ ესაუბრნენ, რომელიც აწუხებს ქალ ამომრჩევლებს. ამომრჩევლები მერობის კანდიდატებისგან და მაჟორიტარი-დეპუტატობის კანდიდატებისგან დანაპირებების შესრულებას ითხოვენ.
შეხვედრის მესამე ნაწილი ჩოხატაურის და ლანჩხუთის მერობის კანდიდატებს დაეთმო. როგორც ცნობილია, გურიის სამ მუნიციპალიტეტში მერობის მხოლოდ სამი კანდიდატია ქალი. შეხვედრას ლელა ჩახვაძე, ლანჩხუთის მერობის კანდიდატი (“პატრიოტთა ალიანსი“) და მაია კუტუბიძე ჩოხატაურის მუნიციპალიტეტის მერობის კანდიდატი (“პატრიოტთა ალიანსი“) ესწრებოდნენ.
