ოზურგეთის მუნიციპალიტეტის სოფელ ბახვის მოსახლეობამ აქცია გამართა. აქცია აპოლიტიკური იყო და ის ცენტრში მდებარე ორსართულიანი შენობა-ნაგებობის გასხვისებას ეხებოდა.
ბახვის ცენტრში მდებარე 2000 კვ.მ. მიწის ნაკვეთი მასზე მდებარე ორსართულიანი შენობა-ნაგებობით უზურფრუქტის წესით 2013 წელს 30 წლის ვადით გადაეცა ბახვში მცხოვრებ თემურ მეგრელიშვილის ოჯახს.
აქ მცხოვრებლები “გურია ნიუსს“ შენობა-ნაგებობასთან დაკავშირებით პატარა ისტორიას უყვება: „2012 წელს “ნაციონალური მოძრაობის“ საპარლამენტო არჩევნების წინა პერიოდში, ბახვში ყოფილ პრეზიდენტს მიშა სააკაშვილს ელოდებოდნენ. იგებოდა გზა, რომლის მოსანახულებლად მაშინდელი ინფრასტრუქტურის მინისტრი რამაზ ნიკოლაიშვილი ავიდა.
ნიკოლაიშვილს აღნიშნული შენობის დანგრევა უბრძანებია, რადგან ცენტრს „იერსახეს უკარგავდა“. ბახვში მცხოვრებ აწ გარდაცვლილ დემურ მეგრელიშვილს უთქვამს, მე ჩავუტარებ ამ შენობას სარეაბილიტაციო სამუშაოებს და გარე ფასადსაც მოვუწყობო. კარგი, მაშინ აჩუქეთ ერთ ლარად მეგრელიშვილს შენობაო“, _ უთქვამს ნიკოლაიშვილს.
ამის შემდეგ, 2013 წელს აღნიშნულმა ოჯახმა უზურფრუქტის წესით გაიფორმა ქონება.
დღეს კი აღნიშნულ საქმეზე სასამართლო დავა მიმდინარეობს.
აქ მცხოვრებლები “გურია ნიუსთან“ ამბობენ, რომ შენობის პირველ სართულზე განთავსებულია სასურსათო მაღაზიები, რომელთა არსებობა, დაახლოებით, 50 წელს ითვლის და სოფლისთვის აუცილებელია.
მეგრელიშვილების ოჯახი კი მაღაზიების დახურვას ითხოვს, რამაც გამოიწვია სოფელში მოსახლეობის დაპირისპირება და პროტესტი.
როგორც სოფლის ცენტრში შეკრებილები “გურია ნიუსთან“ ამბობენ, მეგრელიშვილებს შენობის მეორე სართულზე უნდა მოეწყოთ სარიტუალო დარბაზი (რაც არ გახორციელებულა), პირველ სართულს კი არ უნდა შეხებოდნენ, რადგან აქ წლების განმავლობაში მუშაობდა სასურსათო მაღაზია, რომელიც სოფელს ემსახურება.
“ამ მაღაზიებიდან თვეების განმავლობაში ნისიად მიაქვს პროდუქტები მოსახლეობას და ამით ირჩენენ თავს, ახლა კი დახურვა ემუქრება, რასაც არ დავუშვებთ“, _ ამბობდნენ ბახვის ცენტრში შეკრებილები.
აქციას ოზურგეთის მუნიციპალიტეტის გამგებლის წარმომადგენელი სოფელ ბახვში გოჩა შარაშენიძეც შეუერთდა, რომელმაც აღნიშნა, რომ მოსახლეობის პროტესტს იმასთან დაკავშირებით, რომ მაღაზიები არ უნდა დაიხუროს, ეთანხმება:
“ამ მაღაზიებით ვირჩენ თავს, ეს რომ არ იყოს ცოლ-შვილი მშიერი დამეხოცება, ერთ მაღაზიაში 150 ლარი მაქვს ვალი და მეორეში _ 200, რას ჰქვია დახურავენ“, _ ამბობს შარაშენიძე.
მოსახლეობის განცხადებით, აღნიშნულ საქმეში ჩართულია ბახვის მკვიდრი გოგიტა ცეცხლაძე, რომელიც ბიზნესმენ ზვიად ცეცხლაძის შვილია, თვითონ კი საქართველოს გაერთიანებული წყალმომარაგების კომპანიაში მოადგილედ მუშაობს. გოგიტა ცეცხლაძე თემურ მეგრელიშვილის მეგობარი და ოჯახის ახლობელია. აქაურების თქმით, სწორედ ის არკვევს “ზედა ეშალონებში“ აღნიშნულ სიტუაციას და მხარს მეგრელიშვილებს უჭერს.
“ჩვენ, არ გავჩერდებით, ყველანაირ გზას გამოვიყენებთ, 20 000 ლარამდე ნისია აქვს ამ მაღაზიებს, მეორე სართული აღარ ჰყოფნით ნაჩუქარი? დაგვაყენონ აქ, მთელი სოფელი ჩავალთ გამგეობაში, რატომ ახსენებენ ამ საქმეში გოგიტა ცეცხლაძეს? ის ჩაერია და ყველაფერი მოგვარდაო, რატომ დააპირისპირეს სოფელი? სოფლის ქონების გასხვისება არავის შეეძლო და არც მივცემთ ამის ნებას“, _ ამბობდნენ სოფელ ბახვში შეკრებილები.
სოფელ ბახვში მცხოვრებლები ლია შარაშენიძე, მადონა სირაძე, მაყვალა ჭელიძე, ბადრი ანდღულაძე “გურია ნიუსთან“ მათი ქუჩაში გამოსვლის და პროტესტის გამოხატვასთან დაკავშირებით ესაუბრებიან:
“იმიტომ ვართ შეკრებილები, რომ ეს მაღაზია არის სოფლის საკუთრება, ჩვენი სარჩოა, არავის მივცემთ უფლებას, დაგვიკეტოს და წაგვართვას ლუკმა-პური. გვაინტერესებს, 1 ლარად ვინ აჩუქა ეს შენობა და ვინ რა და რამდენად იყიდა. ეს მაღაზია ყველას გვჭირდება. წლობით გვაქვს ნისიები, თავს ამით ვირჩენთ, პენსიონრები ამით ვცოცხლობთ! არავის წავართმევინებთ, საჭმელი გვინდა, ტანსაცმელი ხომ არაა _ პური, შაქარი და ზეთია აქ!“
ბადრი ანდღულაძე: “ამ შენობაში ვმუშაობდი 40 წელი. შევინარჩუნე, რომ არ დანგრეულიყო, ვარემონტებდი და აქამდე მოვიყვანე. 15 000 ლარს ვიხდიდი ამ შენობაში, მაგრამ არ მომცეს, მეგრელიშვილს კი 1 ლარად გადასცეს. ვითხოვთ, გაუქმდეს ეს ხელშეკრულება! არ ვეხებით მეორე სართულს, იყოს მისი მეორე სართული. რამაზ ნიკოლაიშვილმა აჩუქა 1 ლარად, მერე ამ მთავრობამ ვერ გაბედა ჩუქება გაეფორმებინა და კაპიკებად მისცეს“
მაყვალა ჭელიძე: “აქ ვმუშაობთ 43 წელია, ყველა ზამთარში ვპატრონობთ, დაგვანებონ თავი, ამ პირველ სართულზე დაგვაყენონ, გვიჩივლეს და 14 000 ლარი აქეთ უნდა გადავიხადოთ თურმე. ჩვენ პატარა ჯიხურს არ ჩაგვადგმევინებდნენ აქ. ვინ მფარველობს მეგრელიშვილებს?! იქნება ჩვენ უნდა გვეყიდა? “
აღნიშნულ პროტესტს ეთანხმება სოფლის გამგებელიც:
“მტყუან-მართალს გაარჩევს სასამართლო! მაშინ რამაზ ნიკოლაიშვილმა გასცა ბრძანება, დაანგრიეთ ეს შენობა, ცუდი ფასადი აქვსო. გადავირიეთ, კაცო, რა დავანგრიოთო, მაშინ ლარად აჩუქეთ ვინმესო და ფასადი გააკეთესო. დემური იყო იქ და აი, დემურს აჩუქეთო. მან დაისაკუთრა მეორე სართული და თქვა, რომ პირველ სართულზე ვაჭრობს ეს ხალხი და ამას არ შევეხებიო.
რას ჰქვია ეს მაღაზიები დაიხუროს?!ეს რომ არ იყოს, ცოლ-შვილი მშიერი მომიკვდება, მეც წინააღმდეგი ვარ, ვუერთდები მოსახლეობას პროტესტს“, _ ამბობს შარაშენიძე.
“გურია ნიუსი“ დაუკავშირდა ბახვის მკვიდრ გოგიტა ცეცხლაძეს, რომელმაც მეგრელიშვილებთან ახლო და მეგობრული ურთიერთობა დაადასტურა, თუმცა, უარყო აღნიშნულ საქმეში რაიმე სახით ჩარევა:
“მე რა შუაში ვარ, ვინ ახსენა ჩემი სახელი?! მასე ჩემთან ნახევარი საქართველო მეგობრობს, არაფერში არ ვერევი მე. ველაპარაკე თემურს, როგორც ის მიხსნის, იურიდიულად მართალია. ნუ ნერვიულობთ თქვენ, საქმე სასამართლოშია და სასამართლო გადაწყვეტს“, _ ამბობს ცეცხლაძე და განმარტავს, რომ მისი ინტერესი აქ მხოლოდ ის არის, რომ სოფელში იყოს სიმშვიდე და არ იყოს დაძაბულობა.
“გურია ნიუსი“ დაუკავშირდა აწ გარდაცვლილი დემურ მეგრელიშვილის შვილს თემურ მეგრელიშვილს, რომელიც ამბობს, რომ მის ოჯახს ყველანაირი პროცედურა კანონიერად აქვს ჩატარებული:
“იმ დროს სააკაშვილს ელოდებოდნენ ბახვში, საარჩევნო პერიოდი იყო. მოსული იყო რამაზ ნიკოლაიშვილი, რომელსაც არ მოეწონა ეს შენობა და თქვა, დაანგრიეთო. მამაჩემმა უთხრა, ფასადს წინ მე გავაკეთებო, კარგი, მაშინ შენ გქონდეს და გააკეთეო. შემდეგ გამგებელი იყო კოტე შარაშენიძე და გავაფორმეთ უზურფრუქტის წესით 30-წლიანი ხელშეკრულება, ფაქტობრივად, 5 წელი გასულია უკვე. ამის შემდეგ ვიხდით ყოველ წლიურად მიწისა და ქონების გადასახადს _ 1300 ლარს და ვერ ვსარგებლობთ. ახლა სასამართლოშია საქმე და გადავწყვეტთ ასე. შესულები არიან ვიღაცეები, აკეთებენ ფულს, ჩვენ კი გადასახადს ვიხდით.
არანაირად არ მიუცია რამაზს ეს. მაშინ კი იცით, როგორი პერიოდი იყო, ეს იყო დავალება და უნდა გაეკეთებინა მამაჩემსაც. მე ფული გამოვაგზავნე, მეც ჩამოვედი რომ მოგვესწრო ეს ყველაფერი. გადავიხადე მუშების კვების ფული. ყველას მოეწონა მაშინ ის იდეა, რომ გაკეთებულიყო სარიტუალო დარბაზი, წარმოგიდგენიათ? ახლა გამოდიან და რამაზმა აჩუქაო, რა აჩუქა, მისი იყო თუ ბებიამისის?“_ ამბობს თემურ მეგრელიშვილი.
აღნიშნულ საქმესთან დაკავშირებით ოზურგეთის რაიონულ სასამართლოში პროცესები მიმდინარეობს.
