“გურია ნიუსთან” ექსკლუზიურ ინტერვიუში, ბიძინა ივანიშვილი ამბობს, რომ მისი ოჯახის წევრებიდან, ამაში ჩარევის საშუალება მხოლოდ მის მეუღლეს აქვს.
_ ბატონო ბიძინა, როგორც ამბობენ, საკადრო პოლიტიკაში, განსაკუთრებით გურიაში, თქვენი ძმა ერევა და სწორედ მის სახლში წყდება ვიღაც-ვიღაცეების დანიშვნის ბედი…
_ კარგია რომ ეს შეკითხვა დამისვით. მე ვარ ძალიან მკაცრი მაგ საკითხებში. ტყუილად მიყრიან მასეთ ჭორებს. ჯერ ერთი, ოჯახში არავინ არ ერევა. თუ ჩაერევა, ჩემს მეუღლეს აქვს ამის საშუალება, მაგრამ თვითონ არ უნდა პრინციპულად. სხვა არ არსებობს _ ძმა, დედა, მამა… გამორიცხულია ეს ყველაფერი. მე ოჯახური ბიზნესი არ მომწონდა. როდესაც კერძო საკუთრება მქონდა, მაშინ არ ვრევდი ოჯახის წევრებს და ახლა როგორ შეიძლება სახელმწიფო საკუთრებაში ჩემი ოჯახის წევრებით გადავწყვიტო. აბსულუტურად გამორიცხულია. ეს თვითონაც ძალიან კარგად იციან. მაგის მცდელობები ადრეც ჰქონდათ, ბიზნესის დროს და მე ადრევე ამოკვეთილი მქონდა. მცდელობაც კი არ აქვს არცერთ, რომ ჩაერიოს. ასევე, ხან ერთ ასახელებენ ჩემი გუნდის წევრებიდან, ხან მეორეს, რომ ვიღაც მასწავლის ჭკუას. მე არ ვარ თვითონ უჭკუო. საკმაოდ კარგი ორგანიზატორი ვარ და თვითონ ვახერხებ ყველაფერს. ყველას თავისი ადგილი აქვს ჩემს გუნდში.
_ გია ხუხაშვილს გულისხმობთ?
_ გია ხუხაშვილსაც ძალიან კარგი ადგილი აქვს ჩემს გუნდში, ძალიან ბევრს მეხმარება. მას აქვს თავისი სფერო და ესაა საკმარისი.
_ ამბობენ, რომ ბიზნეს ლობირებს და კეზერაშვილის ბიზნესებიც გადაიბარა….
_ გამორიცხულია ასეთი რამ. კარგია, რომ მისვამთ ასეთ კითხვებს. როგორ წარმოგიდგენიათ _ მე მოვედი საქართველოში, პრემიერ-მინისტრი და ლობირებას დავიწყებ სხვადასხვა ბიზნესის და ჩემი გუნდის წევრები ამას გაბედავენ?! _ წარმოუდგენელია ეს. გია ხუხაშვილს მე დავავალე რამდენიმე კომპანიასთან სიტუაციის დალაგება მათთან, ვინც სახელმიწფო ბიზნესით იყო დაკავებული. სამ-ოთხ ბიზნესმენთან იყო ყველაფერი დასალაგებელი და გადავეცით რკინიგზას, რომელიც სახელმწიფო საკუთრებაშია. ის, რომ ბიზნესს ეძახდნენ და ამ დროს სახელმწიფოს საკუთრება იყო, ეს მოვაგვარეთ. ამაში გია ხუხაშვილი დამეხმარა და ძალიან მადლობელი ვარ. გია ხუხაშვილი არის უწესიერესი ადამიანი და აბსულუტურად გამორიცხულია, რომ მაგან იკადროს თვითონ და მერე, ჩემს გვერდით არ გავაჩერებ ასეთ კაცს.
გუშინ ვუყურებდი ტელევიზორს. ხუხაშვილთან ჰქონდათ ინტერვიუ და ვიღაც ახალგაზრდა კაცთან, ფარესაშვილთან, რომელზეც რაღაც უჩვენებიათ. ეს რომ არ არის ახალი გუნდის სტილი და ხელწერა, მე მგონი ჟურნალისტებისთვის გასაგებია. ძალიან ჰგავს “ნაციონალური მOძრაობის” ხელწერას ეს ყველაფერი. აგებული სქემაა. ჯერ კადრები ჩაუწერეს ოდესღაც, მერე სწორად მიაწოდეს და მერე ეს გვარებიც. კითხვა უნდა დაისვას სწორად. როდესაც ფარესაშვილი მოიხსენიებს ხვედელიძეს, ნაცვლიშვილს, ხუხაშვილს და აგინებს, ვის უნდა ეს. როგორ ფიქრობთ თქვენ, ვისი სურვილია, რომ ეს ასე მოხდეს და განვითარდეს?! მგონი მისი დაგეგმილი და გაკეთებულია ეს ყველაფერი და ეს პიროვნება, მსხვერპლია იმ ძალადობის, იმ იდეოლოგიის, რაც, რამდენიმე წლის განმავლობაში ხორციელდებოდა საქართველოში.
